Pulaktutu tuku nakinkamakgtayayan tlakg tlan namasiyayaw
1. ¿Tuku xlakata kilikatsinitkan la tlakg tlan namasiyayaw?
1 Putum tiku lichuwinan Dios chatum makgalhtawakgena. Akxni lichuwinanaw Dios, tlawayaw akgtum revisita o wi tiku limakgalhtawakgeyaw Biblia, akinin kamasiyaniputunaw latamanin tuku lu xlakaskinka. Akxni kalitachuwinanaw «xtatsokgnun Dios», kamakgtayayaw xlakata “naʼakgaputaxtukgo” (2 Tim. 3:15). ¡Lu lanka tasikulunalin! ¿Ni xlikana pi lu tlan nawan nakatsiniyaw la tlakg tlan namasiyayaw? Kaʼakxilhwi pulaktutu la tlan chuna natlawayaw.
2. ¿La natlawayaw xlakata ni tuwa la namasiyayaw?
2 Ni tuwa la namasiyayaw. Max akxni lichuwinamaw tuku lu lakgapasaw, nialh nalakapastakaw pi tiku katachuwinamaw kajku katsinimakgolh chu tuwa akgatekgskgo. Wa xlakata akxni makgalhtawakgenanaw, ni lhuwa tuku nakawaniyaw. Tlakg tlan nakamasiyaniyaw tuku tlakg xlakaskinka. Tlakg tlan masiyayaw akxni ni lhuwa tuku wanaw (Pro. 10:19). Na ni talakaskin naputsayaw putum textos xalak Biblia; tlakg tlan nawan kaj nalikgalhtawakgayaw textos nema tlakg xlakaskinka. Chu akxni likgalhtawakganitawa kaʼakxilhwi la kgalhmakgtaya tema nema lichuwinamaw. Kalakapastakwi pi Jesús masiyalh tuku xaxlikana chu tuwa akgatekgskan kTakgalhchuwin xalak Sipi (Mat., caps. 5-7). Maski chuna, ni lu tuwa la tlawalh chu ni lhuwa chuwinalh.
3. ¿Tuku xlakata lu xlakaskinka liʼakxilhtit, chu tuku tlakg makgtayanankgo?
3 Kalimaklakaskiw liʼakxilhtit. Liʼakxilhtit tlawa pi nalakapastakaw, chan kinakujkan chu tlawa pi natamakgxtakga kkintalakapastaknikan. Ni talakaskin lu nakatsiniyaw xlakata nalimaklakaskinaw liʼakxilhtit. Liʼakxilhtit nema xlimaklakaskin Jesús ni laklhman xwankgonit chu ni laktuwa (Mat. 7:3-5; 18:2-4). Atanu tuku na makgtayayan wa dibujos nema akinin tlan natlawayaw. Komo akinin pulana nakgalhtawakgayaw max nalakpuwanaw lhuwa tuku nakinkamakgtayayan akxni namasiyananaw.
4. ¿La tlan liwana nalimaklakaskinaw takgalhskinin?
4 Liwana kalimaklakaskiw takgalhskinin. Takgalhskinin tlawa pi tiku kgalhtawakgama nalakapastaka. Wa xlakata akxni tlawayaw, nakgalhkgalhinanaw xlakata nakgalhtinankgo. Komo tunkun nakakgalhtiyaw, ni katikatsiw tuku katsinilh tiku makgalhtawakgemaw. Chu komo nitlan xtakgalhtin, na ni tunkun kawaniw pi nitlan tuku wa; max tlakg tlan nawan komo natlawaniyaw atanu takgalhskinin xlakata xakstu nawan xatlan takgalhtin (Mat. 17:24-27). Xlikana, ni anan makgalhtawakgena nema putum katsi. Wa xlakata Biblia kinkawaniyan pi kuenta kilitlawatkan la masiyayaw, chu wa uma tuku kinkamakgtayayan chu na nakamakgtaya tiku kinkakgaxmatnikgoyan (1 Tim. 4:16).