¿Tlawayaw tuku talakaskin?
1. ¿Tuku natlawayaw xlakata lakapala talakgpalima kakilhtamaku?
1 Chuna la wan 1 Corintios 7:31, kkakilhtamaku xtachuna la akgtum teatro, nema tuku anan chu tiku lamakgolh anta lakapala talakgpalikgo. Putum tuku lama kkakilhtamaku tlawa pi nalakgpaliyaw la lichuwinanaw xTachuwin Dios, la komo tuku hora lichuwinanaw Dios chu la tlawayaw akxni lichuwinanaw. Pero, ¿tlawayaw tuku talakaskin?
2. ¿Tuku kilitlawatkan xlakata natlawanaw la tlawama xkachikin Jehová?
2 La lichuwinanaw xTachuwin Dios. Kstalaninanin Cristo putsakgo la nalichuwinankgo Dios. Akxni Jesús kamalakgachalh kstalaninanin nalichuwinankgo Dios, pulana kawanilh pi ni xlinkgolh mpuxtokgo chu tumin (Mat. 10:9, 10). Pero xlakata xkatsi pi xʼama kaputsastalanikan chu nachuna xʼama talakgatumi xtachuwin Dios, pero alistalh lakgpalilh tuku xkalimapakgsinit (Luc. 22:36). Akgtum ciento kata nema titaxtunita, xkachikin Jehová lakgpalinit la lichuwinan Dios chuna la talakgpalitilha kakilhtamaku. Akgtum liʼakxilhtit, makgasa akxni xlichuwinankan Dios xmaklakaskinkan tarjetas niku xtatsokgnit tamakatsin xalak Biblia, radio, putlaw nema xkgalhikgo bocinas. La uku klakalhuwa kachikinin tuwa tamakgkatsi tekgskgokan latamanin kxchikkan; wa xlakata tlakg kinkawanikan nalichuwinanaw Dios niku tatekgsaw chu niku lhuwa lamakgolh latamanin xlakata lakgachunin ni tekgskgoyaw kxchikkan. Chu xlakata natekgskgoyaw tiku tantaku skujkgo, kinkawanikan nalichuwinanaw Dios katsisni. Xlikana pi xcarruaje xala kʼakgapun Jehová talakgpalitilha la ama. ¿Stalanimaw chu nachuna amaw la ama? (Ezeq. 1:20, 21.)
3. ¿Tuku natlawayaw xlakata la lichuwinanaw Dios tlakg tlan nakinkakitaxtuniyan?
3 Tuku wanaw akxni lichuwinanaw Dios. ¿Tuku lilakgaputsakgo latamanin niku lichuwinanaw Dios? ¿Tumin? ¿Familia? ¿Guerras? Komo liwana naʼakxilhaw tuku lama chu tuku titaxtumakgolh latamanin nakinkamakgtayayan liwana naʼakxilhaw la nalitachuwinankgoyaw Dios latamanin (1 Cor. 9:20-23). Akxni nakinkawanikgoyan latamanin tuku titaxtumakgolh, ni kaj lakapala nakakgalhtikgoyaw, kamakgxtakgwi tsinu tuku lichuwinamaw, wata tlakg tlan wa nalitachuwinankgoyaw tuku lakaskinkgo.
4. ¿Tuku xlakata ni kaj pulaktum la nalichuwinanaw Dios?
4 Nialh makgas kilhtamaku tsankga xlakata namasputukan uma kakilhtamaku chu natsuku lanka talakgaputsit. «Kilhtamaku nkaj atsinu wi» (1 Cor. 7:29). Wa xlakata, katlawaw tuku talakaskin xlakata nalichuwinanaw Dios. Komo chuna natlawayaw namakgantaxtiyaw taskujut maski kaj atsinu kilhtamaku wi.