Tlakg kakatsini la nalichuwinana Dios: kalimasiya pi kalilakgaputsaya latamanin

Tuku xlakata xlakaskinka. Jesús lu xkalilakgaputsa latamanin. Akgtum kilhtamaku makuchilh chatum chixku tiku akgatapa xwanit chu, xlakata max akxilhli pi xpekuama, lakatanu lilh, anta niku ni xʼakxilhkgolh latamanin (Mar. 7:31-35). Na xkalilakgaputsa kstalaninanin, ni lhuwa tuku xkamasiyani xlakata xkatsi pi nila putum xʼakgatekgskgolh (Juan 16:12). Maski kʼakgapun wilacha Jesús chuntiya kalilakgaputsa latamanin (2 Tim. 4:17). Kstalaninanin Cristo nachuna liskujaw xlakata tlawayaw la tlawalh (1 Ped. 2:21; 1 Juan 3:16, 18). Xlakata tlan nakinkakitaxtuniyan akxni naʼanaw lichuwinanaw Dios, nalimasiyayaw pi kalilakgaputsayaw latamanin chu naʼakxilhaw tuku matlanikgo, tuku lakgatikgo chu tuku lilakgaputsakgo.

La natlawayaw:

Liwana kalakkaxwili tuku nawana. Ni kapekuanti, tlan kalikatsi chu kalakalitsinti.
Liwana kaʼakxilhti tuku anan. ¿Tiku tachuwinampat kgalhi laktsu kamanan, lakgati chan xanat o kgalhi laktsu animales? ¿Kgalhi akgtum takanajla? Max uma namakgtayayan akxni natsukuya tachuwinana.
Kakgalhskinti tuku lakpuwan chu liwana kakgaxpatni, ni kachuwinanti akxni xla chuwinama. Kalakaʼakxilhti chu kalimasiya pi kgaxpatpat. Kapaxtikatsini tuku nawaniyan, kalichuwinanti tuku tlan wa. Ni katalakgalhti.
Wa kalichuwinanti tuku lakgati. Wa nalichuwinana tuku nalakgati kgaxmata lataman. Uma ni tuwa, xlakata tratados, folletos chu revistas nema kgalhiyaw pulaklhuwa tuku lichuwinan. Komo tiku lakgpimpat wi tuku tlawama, ni lhuwa tuku kalitachuwinanti.

Chuna kalitsakgsa putum papaʼ:

Kalitsakgsa akxni nakakninaniya Dios kfamilia, o akxni nalichuwinana Dios, wa nalitachuwinana tuku tlakg lakgati lichuwinan lataman.
Tala tiku pulalin tamakxtumit akxni ankan lichuwinankan Dios, na tlan nalichuwinan tuku natlawayaw xlakata nalimasiyayaw pi kalilakgaputsayaw latamanin, o namatitaxti akgtum liʼakxilhtit.