Liwana kalakkaxtlawaw tuku nakalitachuwinanaw latamanin
1. ¿Tuku xlakata lu xlakaskinka liwana nalakkaxwiliyaw tuku nawanaw akxni nalichuwinanaw Dios?
1 Akxni anaw wayanaw niku kinkawanikan, pulana kinkamakgalhwanikanan liwat xlakata natsinksaw. Nachuna, xlakata latamanin nakgaxmatkgo akxni kalitachuwinamaw xalak Biblia, talakaskin kilhtamaku chu liwana nalakkaxtlawayaw tuku nakalitachuwinanaw (Prov. 15:28). Ni kajwatiya talakaskin la namakgapala chu la xlilhuwa tuku nawanaw xlakata tlan nakitaxtu akxni lichuwinanaw Dios. Wa xlakata, ¿tuku kililakapastakatkan akxni nalakkaxwiliyaw tuku nawanaw?
2. ¿La tlan nalakkaxwiliyaw tuku nawanaw xlakata nalakgatikgo latamanin?
2 Tuku nakgaxmatputunkgo latamanin. Komo tuku nakalitachuwinanaw ni lakgatikgo, max nialh kintikakgaxmatniputunkgon. Wa xlakata kalakapastakwi tukuya temas nalakgatikgo latamanin. ¿Lakaskinkgo chatum lu tlan mapakgsina? ¿Lakaskinkgo pi xatapaxuwan katawi xfamiliajkan? ¿Lakaskinkgo pi kasputli guerra? Xlakata lhuwa latamanin lakgatikgo wankgo tuku lakpuwankgo, max tlan nakakgalhskinaw tuku lakpuwankgo. Max na tlan namaklakaskinaw liʼakxilhtit tuku limin La Natlawayaw xTaskujut Dios. ¿Tlan xwa komo xlimakgatawakgaw xlakata la ankan lichuwinankan Dios, akxni nakakninaniyaw Dios kfamilia?
3. ¿La nalakputsayaw tuku nawanaw akxni kalitachuwinanaw Dios latamanin tiku tanu la lismanikgonit chu tuku kanajlakgo?
3 Tuku lismanikgonit chu tuku kanajlakgo latamanin. Kmakgapitsi kachikinin latamanin lakaskinkgo tunkun nakawaniyaw tuku xlakata kalakgamaw. Pero atanu talakaskin max pulana nakakgalhskinaw la wilakgolh chu atanu tuku nakalitachuwinanaw alistalh nakawaniyaw tuku xlakata kalakgapaxialhnamaw. Niku latamanin xlakaskinka akxilhkgo Biblia, max tunkun tlan nakalitachuwinanaw tuku wan Biblia (Hech. 2:14-17). Pero niku ni lhuwa kanajlanikgo Cristo o niku ni kgalhikan akgtum takanajla, max natalakaskin atanu kilhtamaku nakalitachuwinanaw tuku wan Biblia (Hech. 17:22-31).
4. ¿Tuku liwana nalakapastakaw akxni wi tiku natsukuyaw litachuwinanaw Dios?
4 Tuku nalimatsukiyaw. Liwana nalakputsayaw tachuwin. Ni lhuwa tuku nawanaw chu ni laktuwa. Pero ni kajwatiya kuenta natlawayaw tuku wanaw na xlakaskinka la chuwinanaw. Xatapaxuwan kachuwinaw chu kalimasiyaw pi kanajlayaw tuku lichuwinamaw. Kalakapastakti pi tiku limasiya pi paxuwa tlawa pi tlan nakgaxmatnikan. Komo chuna natlawayaw la kinkawanikanan natlawa pi latamanin nawayamputunkgo «kxpuway nkinTlatikan» (1 Cor. 10:21).