Ni kaj kinkataʼanan
1. ¿La tlan natlawayaw la tlawalh apóstol Pablo akxni kataʼanaw lichuwinanaw Dios kinatalankan?
1 Akxni apóstol Pablo akxtum xkatatawila amakgapitsi tiku na xlichuwinankgo Dios xlakputsa xlakata «makxtum nalamakgpuwantini» (Rom. 1:12). Chu akinin, ¿liwana maklakaskinaw kilhtamaku akxni lichuwinamaw Dios xlakata nalamakgtayayaw chu nalamakgpuwantiniyaw? Ni kajwatiya nakataʼanaw, tlan nakawaniyaw tuku kinkamakgtayanitan xlakata tlakg liwana nalichuwinanaw Dios.
2. ¿La tlan nakamakgtayayaw tiku kinkataʼanan xlakata nialh napekuankgo, chu tuku xlakata wanaw pi lu xlakaskinka?
2 Kakamakgtayaw xlakata ni napekuankgo. Makgapitsi tiku lichuwinankgo Dios pekuankgo, tasiya kxlakankan o chuna la chuwinankgo. Nialh katipekuankgolh komo nakawaniyaw tachuwin nema nakamatliwakglha. ¿Tuku atanu tlan nakamakgtaya xlakata nialh napekuankgo? Chatum superintendente viajante kawani natalan tiku katalichuwinan Dios pi na pekuan chu talakaskin natlawani oración Jehová xlakata namaxki takaksni. Atanu tala wan pi makgtaya ni napekwan: «Makgtayanan komo nalitsina. Pero lakgachunin lu kpekuan, komo ni naktlawa oración nipara la klitsin». ¿Wi tuku kinkamakgtayanitan akxni anaw lichuwinanaw Dios xlakata nialh napekuanaw? ¿Tlan xwa komo xkawaniw tiku kinkataʼanan?
3. ¿Tuku tlan nalichuwinanaw xlakata tuku kinkamakgtayanitan akxni kataʼanaw lichuwinanaw Dios kincompañeroskan?
3 Kalichuwinaw tuku kinkamakgtayanitan. ¿Wi akgtum tachuwin o takgalhskinin nema kinkamakgtayanitan xlakata tlan nakatachuwinanaw latamanin o wi tuku titaxtunit nema xla nakatsi? ¿Wi tuku tlan kinkakitaxtuninitan komo maklakaskiw akgtum liʼakxilhtit chu lichuwinaw atanu tuku lakpuwaw pi nalakgati? Ni kaj kiakstukan kakatsiw uma tuku lu tlan kitaxtu (Prov. 27:17). Akxni taʼamaw kincompañerojkan kʼakgtum revisita, tlan nawaniyaw tuku lakaskinaw kakitaxtulh chu tuku tlawamaw xlakata chuna nala. Akxni masputuw akgtum takgalhtawakga xalak Biblia, tlan nawaniyaw tuku xlakata liwana lichuwinaw akgtum versículo o tuku lu xlakaskinka o lakpuwaw pi chuna tlakg tlan namasiyaniyaw.
4. ¿Tuku xlakata talakaskin nakamakgtayayaw kinatalankan akxni katalichuwinanaw Dios?
4 Kstalaninanin Cristo xapulana siglo ni kajwatiya xkamakgtayakgo latamanin, nachuna xlamakgtayakgo chatunu, chatunu (Hech. 11:23; 15:32). Wa xlakata, apóstol Pablo makgtayalh Timoteo chu wanilh pi xkamasiyanilh amakgapitsin tuku xkatsininit (2 Tim. 2:2). Komo akinin na nakamasiyaniyaw tuku katsininitaw, xatapaxuwan natlawakgo xtaskujut Dios, chu tlakg tlan nakakitaxtuni. Pero tuku tlakg tlan nakitaxtu, namakgapaxuwayaw kinTlatkan xalak akgapun (Heb. 13:15, 16).