¿Lu tlan makgtayana klitaxtu?

1. ¿La makgtayanan lichatiy ankan lichuwinankan Dios?

¹ Akgtum kilhtamaku, Jesús kamalakgachalh 70 kstalaninanin xlakata xʼankgolh lichuwinankgo Dios chu «xlichatiyun ntimalakgachakgolh» (Luc. 10:1). Xlikana, xlakata chatiyun kamalakgachalh mastalh talakaskin pi kstalaninanin xlamakgtayalh chu xlamatliwakglhli. Akxni wi tiku taʼanaw lichuwinanaw Dios, ¿la tlan namakgtayayaw?

2. Akxni tiku taʼanaw chuwinama, ¿la kuenta natlawayaw tuku wan chu tuku xlakata?

² Nakgaxmataw. Liwana kakgaxpatti tuku wan akxni tiku tapina wi tiku tachuwinama (Sant. 1:19). Komo nalikgalhtawakga akgtum texto, na kalikgalhtawakga kmiBiblia tuku lekgalhtawakgama. Kaʼakxilhti tiku chuwinama, max wa tiku tapina o tiku tachuwinampatit. Komo wix kuenta nakatlawaniya tiku chuwinamakgolh, uma natlawa pi tiku lakgpinitantit na kuenta natlawa.

3. ¿La tlan namakgtayayaw tiku taʼanitaw lichuwinanaw Dios?

³ Akxni kilichuwinatkan. Akxni tiku tapina chuwinama chu maxkiya talakaskin nachuwinan chuna limasiyaya pi maxkiya kakni (Rom. 12:10). Uma wamputun pi ni namalaktlawiya. Komo nialh katsi tuku nawani tiku tachuwinama, wi tiku ni kgaxmatputun o wi tiku natlawani akgtum takgalhskinin chu lakaskin tamakgtay, kalakputsa la namakgtayaya pero ni atanu tema nalichuwinana. Watiya kalichuwinanti tuku xlichuwinama (Pro. 16:23; Ecl. 3:1, 7). Chuna, tuku nawana nakgalhmakgtaya tuku lichuwinalh tiku tapina (1 Cor. 14:8).

4. ¿Tuku nakinkamakgtayayan xlakata tlan namakgkatsiyaw chu napaxuwayaw akxni naʼanaw lichuwinanaw Dios?

⁴ Akxni 70 kstalaninanin Jesús taspitparakgolh akxni xlichuwinankgonit xtachuwin Dios xlakan «chapaxuwana ntitaspitpalakgolh» (Luc. 10:17). Akinin na tlan nalimakgkatsiyaw chu nalipaxuwayaw akxni nalichuwinanaw Dios komo tlan makgtayana nalitaxtuyaw, akxni kuenta natlawaniyaw tiku taʼanaw chu nachuwinanaw akxni natalakaskin.