Liwana kamaklakaskiw revistas nema nina makgas titaxtukgonit

Nitu katilitaxtulh revistas komo kaj namakiyaw o kaj namakganaw, wa xlakata tlakg tlan namakgpitsiyaw. Maski kaj maktum revista, wi tiku tlan namakgtaya xlakata nakatsiputun xaxlikana chu naputsaputun Jehová (Rom. 10:13, 14). Nalichuwinanaw la namaklakaskinaw revistas nema nina makgas taxtukgolh.

• Akxni naʼanaw niku ni lu lichuwinankan Dios, max tlan namakgxtakgaw maktum revista kchiki niku ni wilaka, niku ni naʼakxilhkgo tiku titaxtukgo.

• Akxni namakglichuwinanaw Dios niku taxtukgo autobuses, tlan nakakgalhskinaw tiku anta yakgolh komo wi tuku likgalhtawakgaputunkgo chu nakamasiyaniyaw makgapitsi revistas xlakata nalaksakkgo nema nalakgatikgo.

• Akxni nalichuwinanaw Dios niku ankgo lhuwa latamanin la clínicas o atanu, tlan nakakgalhskinaw tiku wilakgolh anta komo wi tuku nalikgalhtawakgaputunkgo o nakamasiyaniyaw revistas xlakata wa nalaksakkgo. Komo naʼakxilhaw tiku lakgaya tlan pulana naskiniyaw talakaskin. Komo wija revistas tlakg tlan nialh namakgxtakgaw.

• Akxni naʼamparayaw tlawayaw revisitas, pulana kalakpuwaw tuku nalakgatikgo latamanin. ¿Kgalhikgo kamanan? ¿Lakgati an paxialhnan atanu kachikin? ¿Lakgati kaxtlawa jardines? Pulana naputsayaw makgapitsi revistas chu naʼakxilhaw makgapitsi artículos nema max nalakgati chu namakgxtakgniyaw.

• Akxni natachuwinamparaya tiku akglhuwata papaʼ ni manokglhu, tlan namasiyaniya revistas nema ni makgxtakgninita.