Kamalaknu revista nema nina makgas taxtunit o atanu folleto

Papaʼ nema malaknuyaw libro ¿Tuku xlikana masiyay Biblia? chu namatsukiyaw takgalhtawakga xlakata Biblia akxni xapulana kalakgapaxiʼalhnanaw latamanin, na tlan malaknuyaw revista nema nina makgas taxtunit o atanu folleto akxni tiku katachuwinamaw kgalhikgoya libro chu ni lakaskin akgtum takgalhtawakga. ¿Tuku xlakata?

Folletos chu revistas nema nina makgas taxtunit liminkgo lhuwa temas nema latamanin niku lichuwinanaw Dios max lu nakatsiputunkgo. Wa xlakata akxni naʼanaw lichuwinanaw Dios kaliw umakgo likgalhtawakga. Komo ni kgalhiya revistas nema nina makgas taxtunit, kaskini tala tiku masta revistas. Akxni natachuwinana chatum lataman tiku kgalhiya libro ¿Tuku xlikana masiyay Biblia? pero ni lakaskin nalimakgalhtawakgekan Biblia, kamasiyani makgapitsi folletos o revistas nema nina makgas taxtunit chu kawani pi tlan nalaksaka nema tlakg nalakgati. Nawaniya pi atanu kilhtamaku nataspitparaya. Chuntiya katlawa pi tlakg nakatsiputun, max natitaxtu kilhtamaku namatsukiya takgalhtawakga xalak Biblia.