Tamakxtumit akxni natalichuwinan Dios makgantaxti tuku xlakata tatlawanit
1. ¿Tuku xlakata tatlawa tamakxtumit akxni ankan lichuwinankan Dios?
1 Akgtum kilhtamaku, Jesús katatamakxtumilh 70 kstalaninanin akxni nina xkamalakgacha xlakata naʼankgo lichuwinankgo Dios (Luc. 10:1-11). Kamatliwakglhli akxni kawanilh pi ni xakstukan xwilakgo chu tiku xkapulalima wa «Malana wa nti xla lananat», Jehová. Nachuna, kamasiyanilh tuku xkamakgtayalh xlakata tlan xmakgantaxtikgolh xtaskujutkan chu kalakkaxwililh xlakata «xlichatiyun [x]timalakgachakgolh». La uku, tamakxtumit akxni ankan lichuwinankan Dios na watiya tuku tlawa: kinkamatliwakglhkanan, kinkamasiyaniyan chu kinkalakkaxwilikanan.
2. Lata abril, ¿la xlilhuwa namakgapala tamakxtumit akxni ankan lichuwinankan Dios?
2 Asta la uku, tamakxtumit akxni ankan lichuwinankan Dios xmakgapala 10 asta 15 minuto. Uma kilhtamaku xlakkaxwilikan grupos, niku xʼankan lichuwinankan Dios chu xtatlawa oración. Pero lata abril, natsuku makgapala 5 chu 7 minutos. Chu komo natatlawa akxni sputnita tamakxtumit xalak congregación, tlakg ni lhuwa xlimakgapalat, xlakata tiku natamakxtumikgo lhuwata tastakyaw kgaxmatkgonit ktamakxtumit. Komo tamakxtumit nema tatlawa akxni ankan lichuwinankan Dios, ni lhuwa kilhtamaku makgapala namasta talakaskin tlakg lhuwa kilhtamaku nalichuwinankgo Dios. Nachuna, precursores chu tiku lichuwinankgo Dios nema tsukukgonit lichuwinankgo Dios akxni nina xtsuku tamakxtumit, uma nakitaxtu pi kaj tsinu tuku nakamalaktlawi.
3. ¿La xlitalakkaxwilit tamakxtumit nema tatlawa akxni ankan lichuwinankan Dios?
3 Tamakxtumit akxni ankan lichuwinankan Dios liwana xlitalakkaxwilit nema nakamakgtaya tiku lichuwinankgo Dios. Lhuwa congregaciones akxilhkgonit pi makgtayanan akxni akgatunu grupo tanu tanu niku tamakxtumikgo, uma natlawa pi max lakatsu nakataxtunikgo niku nalichuwinankgo Dios. Chuna tlakg ni tuwa kalakkaxwilikan natalan chu tiku pulalinkgo grupos tlakg tlan nakakuentajtlawakgo tiku kalakgayawakanit. Lakgkgolotsin nalakkaxwilikgo tuku tlakg tlan nakitaxtuni congregación chuna la maklakaskin. Akxni nina limasputukan oración, putum xlikatsitkan niku nakalakgchan chu tiku nataʼankgo.
4. ¿Tuku xlakata tamakxtumit nema tatlawa akxni ankan lichuwinankan Dios na lu xlakaskinka?
4 Na lu xlakaskinka chuna la amakgapitsi tamakxtumit. Kʼuma tamakxtumit kajwatiya ankgo tiku naʼankgo lichuwinankgo Dios, ni talakaskin putum congregación naʼankgo. Pero, uma ni wamputun pi ni xlakaskinka naliʼakxilhaw o ni tlakg xlakaskinka la amakgapitsi tamakxtumit. Chuna la putum tamakxtumit, xtamaskiwin Jehová xlakata tlan nakalimasiyaniyaw tapaxkit putum natalan chu natlawayaw tuku tlan (Heb. 10:24, 25). Wa xlakata talakaskin pi tiku pulalinkgo tamakxtumit liwana nalakkaxwilikgo tuku natamatitaxti xlakata natamalanki Jehová chu nakamakgtaya tiku naʼankgo. Komo matlanikgo, akxni tiku naʼankgo lichuwinankgo Dios xliʼanatkan kʼuma tamakxtumit.
Tamakxtumit xlakata akxni lichuwinankan ni nalakpuwanaw pi ni xlakaskinka o ni tlakg xlakaskinka ni xawa amakgapitsi tamakxtumit
5. 1) ¿Tuku taskujut lakgaya tiku pulalin la lichuwinankan Dios akxni lakkaxwili tamakxtumit la natalichuwinan Dios? 2) ¿La xlipulalit tala puskat tamakxtumit xlakata natalichuwinan Dios?
5 La xlitalakkaxwilit tuku natamatitaxti. Xlakata wi tiku nalakkaxwili tuku lakgchan, xlakaskinka pi sokg namaxkikan. Nachuna kitaxtu tamakxtumit nema tatlawa akxni ankan lichuwinankan Dios. Akxni grupos lakalhuwa niku tamakxtumikgo, tiku pulalinkgo grupos chu tiku makgtayakgo wa napulalinkgo tamakxtumit. Pero akxni putum congregación lakatuma niku nataxtukgo, tiku pulalin la lichuwinankan Dios nawani chatum tala xlakata wa napulalin. Makgapitsi tiku pulalinkgo la natalichuwinan Dios kamaxkikgo akgtum programa natalan tiku kalakgchan chu na mawakakgo ktablero xla tamakatsin. Xlakata wa natalan tiku kalakgchan tlawakgo pi liwana katamasiyalh chu liwana katalakkaxwililh uma tamakxtumit, wa xlakata tiku pulalin la lichuwinankan Dios liwana nalaksaka tiku napulalinankgo. Komo akgtum kilhtamaku niti tiku napulalin la chatum kgolotsin, siervo ministerial o chatum tala tiku tamununita, tiku pulalin la talichuwinan Dios xlilaksakat chatum tala puskat tiku tamununita chu katsini la napulalin. (Kaʼakxilhti «Komo chatum tala puskat napulalin tamakxtumit».)
6. ¿Tuku xlakata liwana nalakkaxwili tiku napulalin tamakxtumit?
6 Akxni kinkamaxkikanan taʼakgchuwin Niku Masiyakan xlakata la Lichuwinankan Dios o kTamakxtumit xlakata xTaskujut Dios, xlakaskinka akxilhaw chu liwana lakkaxwiliyaw. Max ni lhuwa tiku xlakpuwankgolh tuku nawankgo. Komo nakinkawanikanan pi akinin napulalinaw tamakxtumit akxni nalichuwinankan Dios, nachuna kiliʼakxilhatkan. La uku komo nialh lhuwa kilhtamaku nawan lu xlakaskinka liwana nalakkaxwiliyaw xlakata namakgtayanan chu sokg nakgalhsputa. Xlakata liwana lakkaxwilikan na lu xlakaskinka naputsaya niku nalichuwinanaw Dios akxni nina tsuku tamakxtumit.
7. ¿Tuku tlan nalichuwinankgo tiku napulalin tamakxtumit?
7 Tuku nalichuwinanaw. Xlakata talakgpali niku lamaw, wa xlakata «skujni xatalipaw» ni lakkaxwilinit tuku nawankan ktamakxtumit. Recuadro «Tuku tlan nalichuwinankan ktamakxtumit akxni talichuwinan Dios» limin pulaklhuwa tuku tlan natlawayaw. Kʼuma tamakxtumit nakawanikan natalalin pi kawankgolh tuku lakpuwankgo. Lakgachunin, tlan matitaxtikan liʼakxilhtit o video xla jw.org xlakata la lichuwinankan Dios. Akxni lakgchan tiku pulalin tamakxtumit akxni lichuwinankan Dios talakaskin nalakpuwan tuku nakamatliwakglha chu nakamakgtaya uma natalan tiku nataxtukgo.
Akxni naʼakxilha tuku namatitaxti, tiku napulalin uma tamakxtumit xlilakapastakat tuku nakamatliwakglha chu tuku nakamakgtaya natalan tiku nataxtukgo uma kilhtamaku
8. ¿Tuku tlakg tlan xmatitaxtika ktamakxtumit akxni ankan lichuwinankan Dios sábado chu domingo?
8 Sábados, atsinu ni putum natalan malaknukgo revistas Makatsinina chu ¡Despertad! lhuwa tiku taxtukgo sábados nila taxtukgo atanu kilhtamaku, wa xlakata max tuwa namakgkatsi nalakapastaka akgtum liʼakxilhtit nema kgalhikgolh akxni kakninanikgolh Dios kfamilia. Wa xlakata, max tlan xwa pi tala tiku pulalin uma tamakxtumit xlichuwinalh makgapitsi liʼakxilhtit nema limin xaʼawatiya página La Natlawayaw xTaskujut Dios. Atanu na tlan lichuwinankan kʼakgtum revista nema limin akgtum tamakatsin, o tuku titaxtunit o pascua nema ananit anta. Na tlan lichuwinankan la lakkaxwilikan xlakata nalakgtaspitparayaw tiku makglhtinankgolh revistas. Nachuna komo wi chatum tala tiku mastakgo revistas xalaksasti akgatunu papaʼ kalichuwinalh tuku lu tlan kitaxtunit. Domingos max tlan nachuna xtlawaka xlakata likgalhtawakga nema tamakgpitsima uma papaʼ. Ktamakxtumit xlakata akxni lichuwinankan Dios tlan lichuwinankan liʼakxilhtit, Lakwan tamakatsin masta Dios, Kakgalhakgaxpatti Dios o libro ¿Tuku xlikana masiyay Biblia?, nema natamakgpitsi katuwa kilhtamaku chu maklakaskinaw akxni mastaya takgalhtawakga.
9. Akxni congregación namakgtayanan kʼakgtum campaña ¿tuku tlan lichuwinankan ktamakxtumit sábado chu domingo akxni lichuwinankan Dios?
9 Akxni congregación makgtayanamakgolh akgtum campaña, sábados chu domingos tlan naʼakxilhkan la tlan natamastakan revistas invitación o tratado, o tuku tlan natatlawa komo lakgati tuku litachuwinampat. Atanu tlan nalichuwinankgo tuku tlan kitaxtu akxni tlawakan campañas.
10, 11. ¿Tuku xlakata lu xlakaskinka tiku lichuwinankgo Dios liwana natakaxkgo akxni naʼankgo ktamakxtumit?
10 La tlan nalakkaxwilikgo tiku lichuwinankgo Dios. Tlan kitaxtu tamakxtumit akxni makgtayanankgo tiku ankgo lichuwinankgo Dios. Komo lakkaxwilikgo akxni nina ankgo lichuwinankgo Dios, max akxni kakninanikan Dios kfamilia, uma natlawa pi namastakgo tlan takgalhtin. Xlakata nakgalhiyaw tuku nalinaw, kilitiyatkan likgalhtawakga nema namaklakaskinaw akxni nina tsuku tamakxtumit. Uma natlawa pi sokg nachanaw niku nalichuwinanaw Dios.
11 Lu xlakaskinka sokg nachanaw ktamakxtumit akxni nina tsuku, chuna la tlawayaw kʼamakgapitsi tamakxtumit. Komo ni sokg nachanaw, ni kajwatiya nasakgalinanaw wata na nalaktlawayaw tuku lakkaxwilikanita. ¿Tuku wamputun uma? Xlakata, tala tiku pulalin uma tamakxtumit lhuwa tuku kuentajtlawa akxni nina lakkaxwili grupo. Akgtum liʼakxilhtit, komo ni chalhuwa tiku wilakgolh ktamakxtumit, max putum nakamalakgacha niku tsankga nalichuwinankgokan Dios. Komo makgat wi niku nalichuwinankan Dios, max natamalakgacha tiku ni kgalhi putlaw, wa tiku kgalhi. Chu komo niku kalakgchan nalichuwinankgo Dios lu katuwa, max nakaskini makgapitsi natalan lakchixkuwin na kalichuwinankgolh Dios anta lakatsu niku wi grupo xla natalan lakpuskatin o akxtum nalichuwinankgo Dios. Komo chatum tala tatatla, max namalakgachakan niku kaxtum o niku ni lhuwa escaleras anan. Max nakaskini natalan tiku tlakg katsinikgo la lichuwinankgo Dios nataʼankgo natalan tiku xalaksasti. Pero komo ni sokg nachanaw, max uma natlawa pi nalakkaxwilipara tiku nakatamalakgacha chu nalakgpali tuku xlakkaxwilinita. Xlikana, max namin kilhtamaku nachuna nakinkaʼakgspulayan ni sokg nachanaw xlakata wi tuku xlakaskinka limakgapalaw. Pero, komo chuna nalismaniyaw, max talakaskin nalakpuwanaw komo lu xlakaskinka akxilhaw tamakxtumit nema tatlawa akxni talichuwinan Dios o talakaskin pi liwana nalakkaxwiliya kinkilhtamakujkan.
12. Komo watiya tiku akxtum kalitachuwinanaw Dios natalan, ¿tuku kililakpuwanatkan natlawayaw?
12 Natalan tlan natalakkaxlakgo chatum tala o nakgalhkgalhikgo pi tala tiku pulalima uma ktamakxtumit nakawani tiku nataʼankgo. Pero komo lismaninitaw pi watiya tiku katataxtuyaw, ¿tlan xwa komo na xkatataxtuw amakgapitsin natalan? (2 Cor. 6:11-13.) ¿Tlan namin kilhtamaku natataxtuya tiku aku tsukunit lichuwinan Dios chu tlan namakgtayaya xlakata tlakg tlan namasiya? (1 Cor. 10:24; 1 Tim. 4:13, 15.) Kuentaj kilitlawatkan tuku nakinkawanikanan ktamakxtumit, la niku natsukuyaw lichuwinanaw Dios. Akxni kgalhsputnita tamakxtumit, ni nalakgpaliyaw tuku lakkaxwilikanit chu tunkun kaw niku nalichuwinanaw Dios.
13. Komo kimputumkan natlawayaw tuku kinkalakgchanan, ¿la nakinkamakgtayayan tamakxtumit la talichuwinan Dios?
13 Akxni kamalakgachalh 70 kstalaninanin Jesús xlakata nalichuwinankgo Dios «chapaxuwana ntitaspitpalakgolh» (Luc. 10:17). Xlikana, xlakata Jesús katatamakxtumilh akxni nina xkamalakgachakgo uma tlawalh pi tlan xkakitaxtunilh. Na xtachuna kitaxtu kintamakxtumitkan akxni lichuwinanaw Dios. Komo kimputumkan natlawayaw tuku kinkalakgchanan, uma tamakxtumit nakinkamatliwakglhan, nakinkamasiyaniyan chu nakinkamakgtayayan xlakata liwana nalakkaxwiliyaw xlakata liwana “makatsininanaw kputum laklanka kachikinin” (Mat. 24:14).