Niku putum wiliya tuku maklakaskina xlakata namasiyaya
1. ¿La katamalakxtumikan tiku xwaknanin tiku kstalaninanin Cristo?
1 Tiku xwaknanin tipalhuwa xliskujni kgalhikgo. Makgapitsi kaj wi tuku litlawa chu amakgapitsi putum kilhtamaku maklakaskinkgo. Wa tiku tlakg liwana katsikgo ankgalhin linkgo niku mujukgo putum xliskujni nema tlakg maklakaskin chu tuku tlakg liwana lila. Anta kxTachuwin Dios kinkawaniyan pi liwana kaliskujwi la nalichuwinanaw Dios. Wa xlakata, chatunu chatunu xTatayana Jehová nalitaxtu «xtachuna nchatum skujni nti ni kgalhiy ntu nalimaxanan» (2 Tim. 2:15). ¿Tuku liskujni tlakg xlakaskinka kgalhiyaw? Xlikana, wa Biblia, wa nema maklakaskinaw xlakata kstalaninanin Cristo nawankgo (Mat. 28:19, 20). Wa xlakata naliskujaw «mpi aktanks malakatanksaya ntachuwin xla talulokgtat». Wa xlakata, putum kstalaninanin Cristo liwana kilimaklakaskinatkan tuku kgalhiyaw xlakata nakamasiyaniyaw tuku xaxlikana amakgapitsin (Prov. 22:29).
2. ¿Tuku tamakgtay kgalhiyawa xlakata namasiyayaw?
2 Tuku lu maklakaskinaw xlakata namasiyayaw. ¿Kaj watiya Biblia maklakaskinaw o na wi atanu? Libro ¿Tuku xlikana masiyay Biblia? wa nema tlakg limakgalhtawakgenanaw. Akxni masputuyaw uma libro tiku katakgalhtawakgayaw, maklakaskinaw libro «Katamakgxtakgtit kxtapaxkit Dios» xlakata nalilatamakgo xtastakyaw Biblia. wa xlakata, liwana kililakgapasatkan chu liwana kilikatsitkan la namaklakaskinaw uma akgtiy takgalhtawakga. Anta niku kgalhiyaw tuku limaklakaskinaw xlakata namakgalhtawakgananaw na kilikgalhitkan folletos. Chuna la folleto Lakwan tamakatsin masta Dios uma tlan nalimatsukiyaw takgalhtawakga. Komo natekgsaw latamanin tiku nila kgalhtawakgakgo o tanu tachuwin chuwinana chu nitu likgalhtawakga kxtachuwin, tlan nalimaklakaskinaw uma folletos Kakgalhakgaxpatti Dios o Kakgalhakgaxpatti Dios chu nalatapaya putum kilhtamaku. Atanu tuku namaklakaskinaw wa ¿Tiku tlawakgo xtalakaskin Jehová la uku?, uma makgtaya tiku kgalhtawakgama xlakata nalakgapasa la lakkaxwilikanit xkachikin Dios. Videos namakgtayanan xlakata namakgalhtawakganankan liwana kilikatsinitkan la nalimaklakaskinaw. Makgapitsi wa uma ¿Tuku xlakata nalikgalhtawakgaya Biblia?, ¿Tuku tatlawa kPukgalhtawakga? chu ¿Kgalhi xtukuwani Dios?
3. ¿Tuku nakatsiniyaw akgatunu papaʼ xla La Natlawayaw xTaskujut Dios?
3 Akgatunu papaʼ xla La Natlawayaw xTaskujut Dios nakatsiniyaw la liwana namaklakaskinaw tuku kgalhiyaw xlakata nalimakgalhtawakgananaw. Komo naliskujaw xlakata liwana namaklakaskinaw, chuna kgalhakgaxmatmaw xtastakyaw Biblia: «Kuintaj natlawakana, chu na kuintaj natlawaya mintamasiyun; na tliwakga nkatapini; xampi lapi chunu natlawaya, wixa nti naʼakstulakgtaxtuya, chu na namalakgtaxtikgoya wa nti nakgaxmatnikgoyan» (1 Tim. 4:16).