Kamaklakaskiw folleto Lakwan tamakatsin masta Dios xlakata namasiyayaw
1. ¿La tlawakanit folleto Lakwan tamakatsin masta Dios?
1 Chuna la akxilhwi kʼartículo La Natlawayaw xTaskujut Dios xla julio, uma folleto Lakwan tamakatsin masta Dios makgtayanan xlakata nakamasiyaniyaw tuku xaxlikana amakgapitsin. Kʼuma folleto, ni tatsokgtawilanit versículos xalak Biblia xlakata tiku kgalhtawakgama anta naputsa kxBiblia. Maski putum kilikgalhtawakgakan tlawakanit xlakata xakstu nakatsini, uma folleto tlawakanit xlakata wi tiku namasiyaniyan. Wa xlakata, akxni namastayaw folleto, kalimasiyaniw la makgalhtawakgananaw chu chuna nakatsi pi lu tlan akxni katsinikan xalakwan tamakatsin (Mat. 13:44).
2. ¿La tlan nalimaklakaskinaw folleto Lakwan tamakatsin masta Dios akxni xlimakgtumku nalakganaw?
2 Akxni kajku makgtum lakgpinita. Tlan nawana: «Xlakata tuku kgaxmataw knoticias, lhuwa latamanin lilakgaputsakgo kilhtamaku nema aku mima. ¿Lakpuwana wix pi tlakg tlan natawila? [Kamaxki talakaskin nakgalhtinan.] ¿Katsiya pi Biblia kinkamaxkiyan takgalhkgalhin? Uma folleto masiya makgapitsi takgalhskinin nema Biblia kgalhti». Kamaxki folleto chu kawani pi kalaksakli akgtum takgalhskinin nema limin kxaʼawatiya página. Kamasiyani la tatlawa takgalhtawakga xalak Biblia kalimaklakaskinti xapulana párrafo xla lección nema kgalhti takgalhtin. Na tlan namasiyaniya la folleto namakgtaya la tlan natekgsa xtakgalhtin takgalhskinin xla lección nema wix laksakti. Komo wi www.jw.org/jw-tot akgtum video nema lakgchan takgalhtawakga, tlan masiyaniya.
3. Kalichuwinanti la limakgalhtawakgenankan folleto Lakwan tamakatsin masta Dios.
3 La tlan nalimaklakaskinaw xlakata nalimakgalhtawakgananaw. 1) Kalikgalhtawakga takgalhskinin nema xalakgtsitsakga xlakata lataman nakatsi tuku tlakg xlakaskinka. 2) Alistalh, kalikgalhtawakga párrafo. 3) Kalikgalhtawakga textos nema xacursiva wilakgolh chu xlakata tlan nalikgalhtinana Biblia takgalhskinin nema xatsitsakga, kalimaklakaskinti atanu takgalhskinin nema liwana lakpuwanita. 4) Komo takgalhskinin akgchipa akglhuwa párrafos, chuna katlawa la wa 2 chu 3. Komo wi akgtum video nema kgalhti xtakgalhskinin chu komo nina masiyaniya, la uku tlan namasiyaniya. 5) Chu xaʼawatiya, kawani lataman pi kawanin xtakgalhtin takgalhskinin, chuna nakatsiya komo akgatekgsli tuku masiyani.
4. ¿Tuku nakinkamakgtayayan xlakata tlakg liwana namaklakaskinaw uma folleto?
4 Liwana kalakgapasti uma folleto nema lu xlakaskinka chu ankgalhin kamaklakaskinti. Akxni nina pina makgalhtawakgenana, kalilakapastakti tiku makgalhtawakgapat chu la tlan nalimaklakaskina versículos xla takgalhtawakga xlakata tlan naʼakgatekgsa (Prov. 15:28; Hech. 17:2, 3). Akxni tlakg liwana namaklakaskina folleto, tlakg namaklakaskimputuna xlakata nakamasiyaniya amakgapitsi tuku xaxlikana.