La namaklakaskinaw folleto Lakwan tamakatsin masta Dios
Tlawaka xlakata nakinkamakgtayayan natlawayaw revisitas chu namatsukiyaw takgalhtawakga xalak Biblia
1. ¿Tukuya likgalhtawakga mastaka ktamakxtumit «Kuenta katlawaw kinakujkan» xlakata nakinkamakgtayakgoyan natlawayaw revisitas, namatsukiyaw takgalhtawakga xalak Biblia?
1 ¡Lu lipaxuw makglhtinaw uma folleto kLanka Tamakxtumit xʼakgtutu kilhtamaku «Kuenta katlawaw kinakujkan», xlakata natlawayaw revisitas chu namatsukiyaw takgalhtawakga xalak Biblia! Folleto Lakwan tamakatsin masta Dios lilakgpalika folleto ¿Tuku kinkaskiniyan Dios?, nachuna ni lhuwa takgalhtawakga limin chu lu makgtayanan, chu ni tuwa nalimatsukiyaw takgalhtawakga xalak Biblia kxmalakchakan latamanin. Folleto ¿Tuku kinkaskiniyan Dios?, lu xlichuwinan tuku xlitlawatkan kstalaninanin Cristo, chu tiku aku xkatsinimakgolh tuwa xmakgkatsikgo namakgantaxtikgo. Pero, xasasti folleto tlakg lichuwinan lakwan tamakatsin nema lichuwinan Biblia (Hech. 15:35).
2. ¿Tuku xlakata tlawaka folleto Lakwan tamakatsin masta Dios?
2 ¿Tuku xlakata tlawaka xasasti folleto? Natalan xlikalanka katiyatni kskimakgolh likgalhtawakga nema ni tuwa chu xlakgatikgolh latamanin chu xkamakgtayalh nalikgalhtawakgamputunkgo libro ¿Tuku xlikana masiyay Biblia?, nema limakgalhtawakgananaw. Xlakata latamanin ni likgalhtawakgaputunkgo libro, pero lakgatikgo nema ni xatuwa. Nachuna, maktum folleto tlan matitaxtikan klhuwa tanu tanu tachuwin.
3. ¿Tuku ni xtachuna uma folleto la amakgapitsi likgalhtawakga?
3 La tlawakanit uma folleto. Lhuwa kilikgalhtawakgakan katlawakan xlakata latamanin tlan xakstukan nalikgalhtawakgakgo chu naʼakgatekgskgo, o makgachakgxi tuku xlikana masiya Biblia. Pero uma folleto ni xtachuna: talakaskin chatum makgalhtawakgena namakgtaya. Wa xlakata, akxni namastaya, tlakg tlan nalikgalhtawakgayatit akgtum o akgtiy párrafos. Xlakata ni lu laklhman, tlan nakatalikgalhtawakgaya kxmalakcha o niku skujma. Maski xapulana takgalhtawakga kajku nalimatsukiya, pero putum tlan nalimatsukiyaw takgalhtawakga.
4. ¿La kinkamakgtayayan uma folleto nakamasiyaniyaw tuku wan Biblia, tiku kamakgalhtawakgayaw?
4 Klhuwa kilikgalhtawakgakan, xatakgalhtin anta wi kpárrafo nema lakgchan. Pero kʼuma folleto, xatakgalhtin min ktextos xalak Biblia nema tatsokgnit, xlakata lhuwa tlakg lakgatikgo katsinikgo tuku wi kBiblia nixawa tuku wan kilikgalhtawakgakan. Wa xlakata, kaj ni lhuwa textos katsokgwilikanit. Tlakg tlan anta kBiblia nalikgalhtawakgaya. Chuna tiku kgalhtawakgamakgolh nakatsikgo pi tuku katsinimakgolh xla Dios (Is. 54:13).
5. ¿Tuku xlakata lu xlakaskinka makgalhtawakgena liwana nalakkaxtlawa tuku natamatitaxti?
5 Uma folleto ni putum lichuwinan textos. Chuna tlawaka xlakata tiku nalimakgalhtawakgekan nakgalhskininan chu tiku lichuwinan Dios liwana namasiyani. Wa xlakata, tlakg talakaskin liwana nakgalhtawakgaya akgatunu takgalhtawakga. Pero, ni lhuwa nachuwinana. Maski akinin lu lakgatiyaw wanaw tuku wamputun textos, pero tlakg tlan, wa tiku makgalhtawakgemaw kakinkawanin tuku akgatekgsnilh. Liwana nalakapastakaw la nakgalhskinaw chu tsinu tsinu akstu nakatsi tuku wamputun texto (Hech. 17:2).
6. ¿La tlan namaklakaskinaw uma folleto 1) niku latamanin ni kanajlanikgo Dios chu Biblia? 2) akxni lichuwinankan Dios kʼakgatunu chiki? 3) akxni tunkun malaknukan takgalhtawakga xalak Biblia? 4) akxni tlawakan revisitas?
6 Xtachuna la amakgapitsi likgalhtawakga, uma folleto tlan namalaknuyaw maski ni wa lakgchan namakgpitsikan ama papaʼ. Lhuwa tiku ni tuwa nalimaklakaskinkgo uma folleto, tunkun namalaknukgo takgalhtawakga xalak Biblia kʼakgtunu chiki. Nachuna, la wanka ktamakxtumit xaʼakgtutu kilhtamaku, «uma folleto makgtayanan nalipaxuwayaw natlawayaw revisitas» (kaʼakxilhtit recuadro kpágina 5 asta 7).
7. ¿La tlan nalimakgalhtawakgenanaw uma folleto?
7 La nalimakgalhtawakgenanaw. Tlan nalimatsukiyaw natlawayaw takgalhskinin xalakgtsitsakga letra chu alistalh párrafo tuku stalani. Alistalh, kaputsaw kBiblia textos nema wi kcursivas chu katlawaniw takgalhskinin xlakata liwana namaʼakgatekgsniyaw. Chu akxni nina matitaxtiyaw atanu sección, amakgtum katlawaparaw takgalhskinin xlakata nakatsiyaw komo xlikana akgatekgsli. Akxni aku lakgpimpat tlakg tlan nawan kaj akgtum o akgtiy takgalhskinin natlawaniya. Alistalh, tlan tlakg lhuwa nalikgalhtawakgayaw chu asta max xliʼakgtuminika lección.
8. ¿Tuku kuentakilitlawatkan akxni nalikgalhtawakgayaw akgtum texto xalak Biblia, chu tuku xlakata?
8 Textos xalak Biblia niku wan kalikgalhtawakga wa mastakgo xtakgalhtin takgalhskinin nema xalakgtsitsakga. Akxni likgalhtawakgayaw akgtum texto xalak Biblia, ni nawanaw uma tachuwin «wa apóstol Pablo tsokgnalh» o «kaʼakxilhti tuku wan xtatsokgni palakachuwina Jeremías», xlakata max nalakpuwankgo pi tuku kalikgalhtawakganimaw kaj lakchixkuwin lichuwinankgolh. Tlakg tlan chuna nawanaw «wa xTachuwin Dios wan» o «kaʼakxilhti tuku talichuwinalh kBiblia».
9. ¿Nakalikgalhtawakgakan putum textos nema tatsokgnit kpárrafos?
9 ¿Kilikgalhtawakgatkan putum textos xalak Biblia, o kajwatiya niku wan «kalikgalhtawakga»? Wix naʼakxilha komo talakaskin putum nalikgalhtawakganiya textos. Xlikana pi referencias masiyakgo pi tuku wan párrafo xalak Biblia; pero na lhuwa tuku kinkamasiyaniyan. Pero, komo tiku kgalhtawakgama ni lhuwa kilhtamaku kgalhi, komo ni lu katsiputun o ni liwana katsi kgalhtawakga, tlakg tlan nawan natalikgalhtawakga kaj niku wan «kalikgalhtawakga».
10. ¿La nakatsiyaw akxni namaklakaskinaw libro ¿Tuku xlikana masiyay Biblia?
10 La nakatsiyaw akxni namaklakaskinaw ¿Tuku xlikana masiyay Biblia? Akxni ni makgxtakga kgalhtawakga, namatsukiyaw talikgalhtawakgayaw ¿Tuku xlikana masiyay Biblia? o tlan chuntiya xmasputuw folleto. Wa tiku lichuwinankgo Dios nalakapastakkgo akxni namatsuki atanu likgalhtawakga. Pero ¿talakaskin xapulana capítulo nalikgalhtawakgayaw xalak libro? Akinin nalaksakaw tuku natlawayaw, xlakata chatunu latamanin tanu tanu lakapastaknankgo. Pero tiku kgalhtawakgama max tlakg namakgtaya nalakgatsalapara, makgapitsi temas klibro ¿Tuku xlikana masiyay Biblia?
11. ¿Tuku xlakata liwana namaklakaskinaw uma folleto?
11 Kkakilhtamaku niku anan lhuwa nitlan tamakatsin, lanka talakgalhaman kgalhiyaw xlakata namakatsininanaw tlakg xatlan tamakatsin nema ni anan xtachuna: xTamapakgsin Dios mapakgsinamaja chu nialh makgas natlawa pi kKatiyatni xaʼakgstitum nawan (Mat. 24:14; 2 Ped. 3:13). Xlikana pi tiku nakgaxmatkgo uma tamakatsin na nalakapastakkgo la wan uma xtachuwin Dios: «Lu lilakgatit xtantunkan tiku liminkgo, xalakwan xalaksasti, tiku lichuwinan takaksni, tiku lichuwinan tuku tlakg xatlan, tiku lichuwinan lakgtaxtut, tiku wani Sión: “¡MiDios mapakgsina wanit!”» (Is. 52:7). Liwana kamaklakaskiw uma xasasti folleto xlakata nakaliniyaw xatlan xtamakatsin Dios putum tiku tlakg katsiniputunkgo.
[Recuadro xla página 7]
Xlakata tlan namaklakaskinaw niku latamanin ni kanajlanikgo Dios chu Biblia
● Kmakgapitsi kachikinin, akxni maklakaskinkan tachuwin Dios chu Biblia latamanin nialh kgaxmatputunkgo. Tlakg tlan nawan nalichuwinankan tuku katsiputunkgo latamanin, xlakata talakaskin chatum xatlan mapakgsina, niku tlan natekgskan tastakyaw xlakata familia chu tuku tlan nakgalhiyaw kkilhtamaku nema aku mima. Akxni makglhuwata tachuwinanitawa lataman chu akxni masiyaninitawa pi wi Dios chu pi tlan nalipawanaw xTachuwin, tlan namasiyaniyaw folleto Lakwan tamakatsin masta Dios.
[Recuadro xla página 8]
Xlakata tlan nalimaklakaskinaw akxni lichuwinanaw Dios kʼakgatunu chiki
● «Lhuwa latamanin kakgalhskinkan tuku lakapastaknit Dios natlawa xpalakata latamanin, chu kmasiyaniputunan pi ni tuwa nakatsiyaw uma. Akgtum liʼakxilhtit, ¿lakpuwana komo Dios masputuputun tapatin? [Kamaxki talakaskin nakgalhtinan.] Uma folleto namakgtayayan natekgsa kmibiblia xtakgalhtin uma takgalhskinin. [Kamaxki folleto, kalikgalhtawakga xapulana párrafo xla xapulana lección chu Jeremías 29:11.] Chuna la wan unu, ¿ni xlikana pi Dios lakaskin pi tlan kakinkakitaxtunin kkilhtamaku nema aku mima? [Kamaxki talakaskin nakgalhtinan.] Tlan nakmakgxtakgniyan uma folleto, chu akxni naklakgmimparayan tlan nalikgalhtawakgayaw párrafo akgtiy xlakata naʼakxilhaw la namasputu Dios tuku tlawa kaʼanalh tapatin.» Komo tlakg kgalhi kilhtamaku, tlan xlikgalhtawakgatit párrafo akgtiy chu akgtutu textos xalak Biblia nema limin. Katalakkaxla xlakata nalakgpimparaya chu nalikgalhtawakgayatit atanu takgalhskinin.
● «Makglhuwa tlawaniyaw oración Dios chu tlakg chuna tlawayaw akxni kgalhiyaw taʼakglhuwit, ¿ni xlikana? [Kamaxki talakaskin nakgalhtinan.] ¿Lakpuwana pi kgaxmata Dios putum oraciones, o max wi makgapitsi nema ni lakgati? [Kamaxki talakaskin nakgalhtinan.] Klimin maktum folleto nema kinkamasiyaniyan niku tlan natekgsaw xtakgalhtinkan uma takgalhskinin kBiblia. [Kamaxki, chu kalikgalhtawakgatit párrafo akgtum xla lección 12, chu nachuna textos niku wan «kalikgalhtawakga».] Lipaxuwayaw pi Dios kinkawaniyan katalakatsuwiniw kʼoración; pero xlakata tlakg nalipaxuwayaw uma talakgalhaman, liwana kililakgapasatkan. [Kaputsa lección 2 chu kamasiyani subtítulos.] Komo lakaskina, tlan nakmakgxtakgniyan folleto chu naktaspitpara atanu kilhtamaku xlakata naʼakxilhaw takgalhtin nema masta Biblia.»
● «Kkalakgapaxialhnamaw latamanin xlakata kkatsiyaw pi katsiputunkgo xlakata kilhtamaku nema aku mima. ¿Lakpuwana wix pi tlakg tlan nawan kilhtamaku nema aku mima? [Kamaxki talakaskin nakgalhtinan.] ¿Xkatsiya pi kBiblia wi lakwan tamakatsin nema kinkamaxkiyan takgalhkgalhin? Kaʼakxilhti makgapitsi tuku lichuwinan Biblia.» Kamaxki folleto chu kawani kalaksakli takgalhskinin nema wilakgolh kxaʼawatiya página. Kaputsa lección nema laksakli chu kamasiyani la likgalhtawakgakan uma folleto. Katalakkaxla xlakata nalakgpimparaya chu nalikgalhtawakgayatit xliʼakgtiy takgalhskinin.
[Recuadro xla página 9]
Xlakata tunkun namalaknuniya
● «Kaj lakapala kkalakgapaxialhnamaw latamanin, xlakata nakkamasiyaniyaw xasasti la likgalhtawakgakan Biblia. Uma folleto limin 15 lecciones nema masiya niku natekgsaw kBiblia xtakgalhtin uma lu xlakaskinka takgalhskinin. [Kamasiyani xmakni folleto chu xaʼawatiya página.] ¿Milh kilhtamaku xʼakgatekgsputuna tuku wan Biblia? [Kamaxki talakaskin nakgalhtinan.] Kimaxki talakaskin nakmasiyaniyan pi ni tuwa lecciones limin uma folleto. [Kaputsa lección 3 chu kalikgalhtawakgani xapulana párrafo xla takgalhskinin 3. Alistalh, kalikgalhtawakga Apocalipsis 21:4, 5. Komo akxilha pi tlan nalikgalhtawakganiparaya, kaʼakxilhti xliʼakgtiy párrafo chu textos.] Tlan nakmakgxtakgniyan folleto. Kkawaniyan pi lu tlan komo nalikgalhtawakgaya maski kaj akgtum lección. Komo lakgatiya tlan chuntiya nakgalhtawakgayaw. Akxni nakmimpara, tlan xlikgalhtawakgaw xapulana nema kaj akgtum página kgalhi.»
[Recuadro xla página 9]
Nalimaklakaskinaw akxni natlawayaw revisitas
● «Klipaxuwa pi ktekgsmaparan. Kliminin uma folleto nema limin textos xalak Biblia chu kgalhti takgalhskinin nema lu xlakaskinka. [Kamaxki folleto chu kawani pi kaʼakxilhli xaʼawatiya página.] ¿Tukuya tema tlakg katsiputuna? [Kamaxki talakaskin nakgalhtinan chu kaputsa lección nema laksakli.] Kimaxki talakaskin nakmasiyaniyan la maklakaskinkan uma folleto xlakata natekgsa la kgalhti Biblia uma takgalhskinin.» Kamasiyani la likgalhtawakgakan chu kaʼakxilhti akgtum o akgtiy párrafo chu textos niku wan «kalikgalhtawakga». Namatsukiya akgtum takgalhtawakga ni tuwa. Akxni maxkinitata nawan folleto, kawani pi nataspitparaya. Akxni likgalhtawakgakgolha lección, tlan komo nalaksakpara atunu lección o tlan namatsukiyatit kxapulana.