Liwana kamaklakaskiw libro ¿Tuku xlikana masiyay Biblia?

Latamanin tiku kamakgalhtawakgamaw katsinitilhakgo tuku masiya Biblia chu lilatamakgo, tsukukgo limasiyakgo pi stakma xtakanajlakan (Sal. 1:1-3). Komo liwana maklakaskinaw tuku limin libro ¿Tuku xlikana masiyay Biblia?, tlan nakamakgtayayaw xlakata nastaka xtakanajlakan.

Takgalhskinin niku litsuku. Niku tsuku akgtum capítulo limin makgapitsi takgalhskinin nema natakgalhtitilha kʼuma takgalhtawakga. Tlan katlawaniyaw uma takgalhskinin, pero ni talakaskin nakgalhtinankgo, kaj xlakata tlakg nalakgatikgo tuku aku nakatsinikgo. Atanu tuku na tlan natlawaya wa naskiniya tsinu kalichuwinalh takgalhskinin. Max nawan tuku nitlan, pero ni talakaskin lakapala nawaniya pi nitlan tuku wa, xlakata uma limasiya niku natalakaskin tlakg liwana namaʼakgatekgsniya akxni nakgalhtawakgayatit (Prov. 16:23; 18:13).

Tatakgatsin. Komo tiku makgalhtawakgemaw akgatekgsnit tuku wi capítulo, tlan waniyaw pi xakstu kalikgalhtawakgalh tatakgatsin. Akxni nalakgapaxialhnamparayaw, tlan natlawaniyaw makgapitsi takgalhskinin xlakata nakatsiyaw komo wi tuku ni liwana akgatekgsli. Pero komo naʼakxilhaw pi talakaskin, tlan nalimaxtuyaw tsinu kilhtamaku akxni makgalhtawakgamaw xlakata naʼakxilhaw xtatakgatsin putum o kaj tsinu. Tlan nalikgalhtawakgayaw párrafos chu tlan natlawayaw makgapitsi takgalhskinin nema lakkaxwilinitaw.

Recuadro xla repaso. Niku sputa akgatunu capítulo limin akgtum recuadro nema masta xtakgalhtin xapulana takgalhskinin nema wi niku tsuku artículo. Komo naʼakxilhparayaw, nakatsiyaw komo xlikana akgatekgsnit tuku lu xlakaskinka chu tlan lichuwinan. Akxni likgalhtawakganitawa xatakgalhtin chu textos nema limin, kaskiniw kalimaklakaskilh textos xlakata nakinkawaniyan tuku xlakata xlikana tuku wan recuadro (Hech. 17:2, 3).