KILATAMATKAN LA KSTALANINANIN CRISTO
Katatayaw xlimapakgsin Jehová xlakata la nalatamayaw
Jehová wa tiku lakkaxwili limapakgsin xlakata la nalinkan latamat. Akgtum liʼakxilhtit, lakkaxwilinit pi akxni tamakgaxtokga chatum chixku chu chatum puskat niti xlilakxtlawat (Mt 19:4-6, 9). Nitlan akxilha putum talakgxtumit xalimaxana (1Co 6:9, 10). Na masta tastakyaw xlakata la nalhakganankgo chu natakaxtayakgo xkachikin chu ni xtachuna natasiyakgo la amakgapitsi latamanin (Dt 22:5; 1Ti 2:9, 10).
Kkakilhtamaku lhuwa latamanin lakgmakgankgo xlimapakgsin Jehová (Ro 1:18-32). Xlakan tlawakgo tuku lhuwa latamanin lakpuwankgo xlakata la nalhakganankan, natakaxtayakan chu la nalikatsikan. Lhuwa tiku lanka kalimakgkatsikan tuku nitlan tlawakgo chu nitlan kalichuwinankgo tiku ni tlawakgo tuku xlakan tlawakgo (1Pe 4:3, 4).
Xtatayananin Jehová, kilitatayatkan xlimapakgsin xlakata la nalinaw latamat (Ro 12:9). ¿La natlawayaw? Lakatitum nakawaniyaw tuku Jehová tlan akxilha chu na nalilatamayaw umakgolh limapakgsin. Akgtum liʼakxilhtit, akxni nalaksakaw la natakaxtayayaw o la nalhakgananaw kililakpuwanatkan: «Tuku klaksaka, ¿limasiya pi kstalani xlimapakgsin Jehová o xla kakilhtamaku? ¿Limasiya la ktasiya pi kskujni Dios akit?». O akxni laksakaw akgtum programa o película, kililakpuwanatkan komo Jehová tlan akxilha, tuku tayat masiya chu komo uma talakgastan natlawa pi nialh na’akxilhaw xlimapakgsin Jehová chuna la xlilat (Sl 101:3). ¿La nakakitaxtuni kifamiliajkan o amakgapitsi latamanin xlakata tuku laksakaw? (1Co 10:31-33).
¿Tuku xlakata lu xlakaskinka natatayayaw xlimapakgsin Jehová? Xlakata Jesucristo nialh makgas nakamasputu putum kachikinin chu tuku nitlan, chu kajwatiya nalatamakgo tiku nakgalhakgaxmatkgo Dios (Eze 9:4-7; 1Jn 2:15-17). Wa xlakata, katatayaw xlimapakgsin Jehová, komo chuna natlawayaw tiku nakinkaʼakxilhkgoyan namalankikgo Dios (1Pe 2:11, 12).
¿Tuku masiya kintalhakgan chu la ktakaxtaya xlakata la klin kilatamat?
AKXNI AKXILHNITANTITA VIDEO XʼAMIGO JEHOVÁ KAWANTI: CHATUM CHIXKU CHU CHATUM PUSKAT, KAKGALHTITIT UMAKGOLH TAKGALHSKININ:
¿Tuku xlakata kilikgalhakgaxmatatkan xlimapakgsin Jehová?
¿Tuku xlakata natlatni xlimasiyanitkan xkamanankan xlimapakgsin Jehová lata akxni laktsujku?
¿La tlan tiku lakkamanan chu tiku laklankata nakamakgtayakgo latamanin nalitamakgtayakgo xtalakgalhaman Dios?