Wix mililaksakat tuku natlawaya
Tayat nema nalaksakaw nalinaw kkilatamatkan natlawa pi napaxuwayaw o natlawa pi nitlan nakinkakitaxtuniyan. Jehová katsi uma, chu wa xlakata lakaskin pi kalilatamaw xlimapakgsin.
Jehová lakaskin pi kakgalhiw takaksni chu tapaxuwan.
«Akit, Jehová, akit miDios, tiku masiyaniyan xlakata tlan nakitaxtuniyan, tiku pulalinan ktiji niku militlawanat. ¡Komo xkgalhakgaxpatti kilimapakgsin!, mintakaksni xtachuna xwa la akgtum kgalhtuchokgo, chu tuku xaʼakgstitum xtlawa xtachuna xwa la takgayawana xalak pupunu» (Isaías 48:17, 18).
Pulaklhuwa la tlan xliw kilatamatkan. Pero xlakata Jehová wa kiMalakatsukinakan, katsi tuku tlakg tlan nakinkakitaxtuniyan. Xla lakaskin pi kastalaniw xtapulalit xlakata katsi pi wa tuku tlakg tlan kimpalakatakan. Komo nakgalhakgaxmataw xlimapakgsin, liwana kakatsiw pi tlan nakinkakitaxtuniyan. Ankgalhin nalaksakaw tuku tlan chu uma nakinkaliminiyan tapaxuwan chu takaksni.
Jehová ni kinkaskiniyan tuku nila tlawayaw.
«Umakgolh limapakgsin nema klimapakgsiman la uku ni lu tuwa chu tlan namakgantaxtiya» (Deuteronomio 30:11).
Xlakata nalilatamayaw xlimapakgsin Dios, max natalakaskin nalakgpaliyaw tuku tlawayaw chu la lakpuwanaw. Pero Jehová ni kinkaskiniyan tuku nila tlawayaw. Xlakata xla kiMalakatsukinakan, wa tiku tlakg liwana katsi tuku nila tlawayaw. Akxni tlakg lakgapasaw, akxilhaw pi «xlimapakgsin ni akgtum takuka» (1 Juan 5:3).
Jehová malaknu pi nakamakgtaya tiku lilatamaputunkgo xlimapakgsin.
«Akit, Jehová miDios, kchipanit mimpakgastakat; akit tiku waniyan: “Ni kapekuanti. Akit nakmakgtayayan”» (Isaías 41:13).
Tlan nalilatamayaw xlimapakgsin Dios xlakata xla kinkamakgtayayan. Limaklakaskin xTachuwin, Biblia, xlakata nakinkamakgtayayan, nakinkamatliwakglhan chu nakinkamaxkiyan takgalhkgalhin.
Kxlikalanka katiyatni, lhuwa latamanin akxilhkgonit pi xlakata lilatamakgonit xtastakyaw Biblia lu tlan kakitaxtuninit. ¿Chu wix? ¿Namastaya talakaskin pi Biblia napulalinan? ¿Tlakg liwana lakgapasputuna xtastakyaw? Tlan xtsuku likgalhtawakgaya folleto Kalipaxuwa latamat. Ni taxokgo chu wi kjw.org. K’uma folleto natekgsa umakgolh pulaktutu lecciones:
«¿La tlan namakgtayayan Biblia?».
«Biblia kinkamaxkiyan takgalhkgalhin».
«¿Tlan lipawankan tuku wan Biblia?».
Akxni tlakg nalikgalhtawakgaya xTachuwin Dios, na’akxilha pi xtastakyaw chuntiya kinkamakgtayayan chu «putum kilhtamaku tlan lipawankan» (Salmo 111:8). Akxni lilatamayaw xtastakyaw Biblia tlakg tlan kinkakitaxtuniyan. Pero Dios ni kinkamafuerzajliniyan nakgalhakgaxmataw (Deuteronomio 30:19, 20; Josué 24:15). Wix lakgchanan nalaksaka komo nakgalhakgaxpata o ni katikgalhakgaxpatti.