KILATAMATKAN LA KSTALANINANIN CRISTO
Tlakg kakatsini la nalichuwinana Dios: Kakatachuwinanti putum latamanin tiku wilakgo niku lichuwinana Dios
TUKU XLAKATA LU XLAKASKINKA: Zacarías wa pi «tipalhuwa kachikinin chu tipalhuwa xtachuwinkan» xʼamakgo makgamakglhtinankgo xalakwan tamakatsin (Zac 8:23). Pero ¿tiku xʼama kamasiyani? (Ro 10:13-15). Kgalhiyaw talakgalhaman chu talakgatay pi nakalitachuwinanaw xalakwan tamakatsin putum latamanin niku lichuwinanaw Dios (od-S pág. 84 párrs. 10, 11).
LA NATLAWAYAW:
Kalakkaxwili. ¿Tekgsnitata tiku chuwinankgo atanu tachuwin? Kamaklakaskinti aplicación JW Language xlakata nakatsiniya tsinu tuku nakawaniya. Na tlan namaklakaskina micelular chu namasiyaniya tiku tachuwinampat la tlan natekgsa likgalhtawakga kxtachuwin anta kjw.org.
Kuenta katlawa. Komo lichuwinampat Dios kʼakgatunu chiki, ni kaj paxkat katlawa minkilhtamaku, kakalitachuwinanti tiku titaxtumakgo ktiji chu tiku kgalhkgalhinamakgo kputlaw. Akxni lichuwinampat Dios niku lhuwa anankgo latamanin, kuenta katlawa xlakata tlan nalichuwinana Dios.
Kaliskujti. Ni kataxlajwani. Kakaputsapara tiku ni xwilakgo kxchikkan. Kaliskujti xlakata wi tiku natachuwinana kʼakgatunu chiki, max atanu hora o atanu kilhtamaku. Makgatunu natalakaskin pi makgapitsi latamanin nakatsokgniyaw carta, nakatachuwinanaw kteléfono o ktiji.
Chuntiya kalakgapaxialhnanti. Ni makgas kataspitti xlakata chuntiya nalakgati tuku litachuwinanti. Komo chuwinan atanu tachuwin, kaputsa xtamakgtay chatum tala tiku na watiya xtachuwin. Chuntiya kalakgapaxialhnanti asta akxni natalan tiku chuwinankgo xtachuwin natsukukgo lakgapaxialhnankgo (od-S págs. 93, 94 párrs. 39, 40).
KAʼAKXILHTI VIDEO KLICHUWINANAW DIOS ASTA NIKU TLAKG LAKGAMAKGAT KKATIYATNI CHU ALISTALH KAKGALHTI UMAKGOLH TAKGALHSKININ:
¿Tuku tlawakgolh natalan xlakata tlan xkatachuwinankgolh tiku lu makgat wilakgo? (1Co 9:22, 23).
¿Tuku tuwa titaxtukgolh chu makgatlajakgolh?
¿Tuku tasikulunalin makglhtinankgolh?
¿Tuku tlan natlawaya xlakata tlakg lhuwa latamanin nakatachuwinana niku lichuwinanatit Dios?