La tlan napaxkiyaw Dios chu kintalatamankan

Maski kstalaninanin Cristo nialh tapakgsiniyaw xlimapakgsin Moisés, pulaktiy xlimapakgsin nema tlakg xlakaskinka: paxkikan Dios chu kintalatamankan, wa uma tuku kgalhkgalhi Dios pi katlawakgolh kskujnin (Mt 22:37-39). Uma tapaxkit ni talakachinaw, talakaskin namakgalayaw, ¿la natlawayaw? Pulaktum tuku natlawayaw, wa nalikgalhtawakgayaw Biblia chali chali. Akxni lilakpuwanaw tuku likgalhtawakgayaw, katsiniyaw xalakstlan xtayat Jehová chu katsiniyaw la xla tlan likatsi (Sl 27:4). Chu tuku kitaxtu, wa pi tlakg paxkiyaw chu tsukuyaw lakapastaknanaw la xla lakapastaka. Uma kinkamakgpuwantiniyan nakgalhakgaxmataw xlimapakgsin, na anta makgtanu nakapaxkiyaw amakgapitsin (Jn 13:34, 35; 1Jn 5:3). Kaʼakxilhwi pulaktutu tuku nakinkamakgtayayan tlakg nalakgatiyaw akxni nalikgalhtawakgayaw Biblia.

• Kamaklakaskiw kintalakapastaknikan chu pulakkitsis tuku kinkamalakpuwaniyan tuku anan. Kalilakpuwaw pi anta wilaw. Kaʼakxilhwi tuku lama, kakgaxmatwi tuku makawan chu tuku takgankgawanan. Kalilakpuwaw tuku xmakgkatsikgo tiku talichuwinan.

  

• Kalakgpalitilhaw la tlawayaw: Tlan pixlanka nalikgalhtawakgayaw o nakgaxmataw akgtum grabación chu nastalaniyaw takgalhtawakga. Komo ni likgalhtawakgaputunaw Biblia niku tsuku asta niku kgalhsputa, tlan nalikgalhtawakgayaw xlatamat chatum tiku lichuwinan Biblia o akgtum tema. Akgtum liʼakxilhtit, tlan namaklakaskinaw secciones 4 chu 16 xla folleto Tuku liputsananikan xTachuwin Dios xlakata nalikgalhtawakgayaw xlatamat Jesús. Apulaktu wa nalikgalhtawakgayaw capítulo niku takilhtinit texto xala chali chali o libros xalak Biblia chuna la tsokgtilhakanit.

  

• Kakgalhtawakgaw xlakata naʼakgatekgsaw. Tlakg tlan nalikgalhtawakgayaw maski kaj akgtum capítulo chali chali xlakata naʼakgatekgsaw chu nalilakpuwanaw, nixawa lhuwa capítulos nalikgalhtawakgayaw kaj xlakata likgalhtawakgaputunkgoyaw. Kalilakpuwaw tuku pulana chu tuku alistalh tatsokgnit, kalilakpuwaw pulakatunu tuku talichuwinan, kamaklakaskiw mapas chu notas nema limin Biblia, chu maski kaj pulaktum kaputsananiw tuku wamputun tuku ni akgatekgsaw. Komo matlaniyaw, kalimaxtuw watiya xlilhuwa kilhtamaku xlakata nalilakpuwanaw la akxni kgalhtawakgayaw.