Tlakg kakatsini la nalichuwinana Dios: Kakamakgtaya tiku lakaskinkgo nakamakgalhtawakgekan

TUKU XLAKATA XLAKASKINKA. Jehová tlawa pi xaxlikana nastaka kxnakujkan latamanin tiku makgamakglhtinamputunkgo latamat nema nikxni sputa (Hch 13:48; 1Co 3:7). Akxtum taskujaw akxni lu liskujaw nakamakgtayayaw tiku lilatamakgo tuku katsinikgo (1Co 9:26). Umakgolh latamanin xliʼakgatekgsatkan pi komo lakgtaxtuputunkgo, pulana xlitamunutkan (1Pe 3:21). Xlakata tiku kamakgalhtawakgeyaw kstalaninanin Cristo nalitaxtukgo, talakaskin nakamakgtayayaw nalakgpalikgo xlatamatkan, nalichuwinankgo Dios chu nakamasiyanikgo amakgapitsin chu namakamastanikgo xlatamatkan Jehová (Mt 28:19, 20).

LA NATLAWAYAW

• Kakamalakapastaka tiku kamakgalhtawakgeya pi kamakgalhtawakgepat xlakata nalakgapaskgo Jehová chu namakgapaxuwakgo (Jn 17:3).

• Xlakata tlan nastaka xtakanajlakan, kakamakgtaya namakgatlajakgo tuku tuwa, la nixatlan talismanin chu tiku nitlan katalalinkgo.

• Kakamatliwakglhti chu kakamakgpuwantini akxni nina tamunukgo chu akxni tamunukgonita (Hch 14:22).

AKXNI AKXILHNITATA VIDEO JEHOVÁ NAMAKGTAYAYAN, KAKGALHTI UMAKGOLH TAKGALHSKININ:

• ¿Tuku max tlawa pi wi tiku ni natamakamastani Dios chu ni natamunu?

• ¿La tlan lakgkgolotsin nakamakgtayakgo tiku kamakgalhtawakgemaka xlakata nastaka xtakanajlakan?

• ¿Tuku kinkamasiyaniyan xlakata Jehová Isaías 41:10?

• ¿Tuku tayat nakinkamakgtayayan naskujnaniyaw Jehová chuna la xla lakgati maski makglakgalhinanin akinin?