¿Tlakg tlan nalatapaya komo nakgalhtawakgaya chu nakgalhiya tumin?

Lhuwa latamanin lakpuwankgo pi tiku lhuwa kgalhtawakgakgonit chu kgalhikgo lhuwa tumin nakgalhikgo tlakg tlan latamat kkilhtamaku nema aku mima. Lakpuwankgo pi komo naʼankgo kʼuniversidad tlakg tlan nakakitaxtuni kxtaskujutkan, kxfamiliajkan chu kxkachikinkan. Na lakpuwankgo pi komo tlakg nakgalhtawakgakgo, nakgalhikgo akgtum taskujut niku tlakg nakaxokgonikan, chu komo tlakg nakgalhikgo tumin, tlakg napaxuwakgo.

TUKU TLAWAKGO LHUWA LATAMANIN

Zhang Chen, chatum chixku xalak China, wan: «Xaklakpuwan pi komo ni xakkalh kʼuniversidad, ankgalhin limaxkgen xaklitaxtulh chu pi lu xakama paxuwa komo xakkgalhilh akgtum taskujut niku lu tlan xkixokgonika».

Xlakata tlakg tlan latamat nakgalhikgo kkilhtamaku nema aku mima, lhuwa latamanin kgalhtawakgaputunkgo kʼuniversidades nema tlakg kalakgapaskan maski xliʼanatkan kʼatanu países. Uma lu chuna xtlawakan asta akxni chilh tajatat COVID-19, chu uma tlawalh pi tlakg tuwa xkitaxtulh. Akgtum tamakatsin nema mastalh kkata 2012 Organización para la Cooperación y el Desarrollo Económicos, wan: «Xliputum tiku ankgo kgalhtawakgakgo kʼatanu países kxlikalanka Katiyatni, 52% minkgoyacha kʼAsia».

Lhuwa natlatni lu skujkgo xlakata xkamanankan naʼankgo kʼuniversidades kʼatanu países. Qixiang, xalak Taiwán, lakapastaka: «Kinatlatni ni xkgalhikgo lhuwa tumin. Maski chuna, kamalakgachakgolh kgalhtati xkamanankan kʼEstados Unidos xlakata nakgalhtawakgakgo». Xlakata tlan nakaxokgonikgo xtakgalhtawakgakan, xfamilia Qixiang, chuna la amakgapitsin, lhuwa tumin xlaklinkgo.

TUKU KITAXTUNIT

Tsiswamaja, chatum tsumat wi kxlakatin xcomputadora. Tlakgwanit chu nitlan makgkatsi. — Lhuwa tiku lu kgalhtawakgakgo chu kgalhiputunkgo lhuwa tumin, alistalh nitlan makgkatsikgo.

Xlikana pi komo kgalhtawakgakan tlan natlawa pi tsinu tlakg tlan nawan kilatamatkan, pero lhuwa tiku kgalhtawakgakgonit akxilhkgonit pi nichuna kitaxtunit la xlakaskinkgo. Akgtum liʼakxilhtit, lhuwa ni tekgskgonit taskujut nema lakaskinkgo, maski lhuwa kata limaxtukgonit chu lhuwa tumin laklinkgonit. Akgtum tamakatsin nema mastalh periodista Rachel Mui kBusiness Times xalak Singapur, wan: «Tlakg lhuwa tiku kgalhtawakgakgonit kʼuniversidad ni tekgskgo taskujut». Jianjie, chatum chixku tiku lu kgalhtawakganit chu lama kTaiwán, wan: «Lhuwa latamanin makglhtinankgo taskujut maski ni wa tuku katsinikgonit kʼuniversidad».

Makgapitsi liskujkgo tuku katsinikgonit kʼuniversidad, pero max ni kgalhikgo latamat nema xlakpuwankgo. Niran, chatum chixku xalak Tailandia, alh kgalhtawakga kʼakgtum universidad anta kReino Unido. Akxni taspitli kxpaís, tekgsli akgtum taskujut nema xkatsininit kʼuniversidad. Xla wan: «Chuna la xaklakpuwan, xlakata lu xakkgalhtawakganit ktekgsli akgtum taskujut niku lu tlan xkixokgonikan. Pero xlakata xaktlajalh lhuwa tumin, xtalakaskin pi tlakg lhuwa horas xakskujli. Titaxtulh kilhtamaku, niku xakskuja katamakxtuka lhuwa skujnin chu akit na kintamakxtuka. Kakxilhli pi ni anan akgtum taskujut nema putum kilhtamaku namakgapala».

Tiku kgalhikgo lhuwa tumin chu lakpuwankgo pi nitu katsankgani, na kgalhikgo taʼakglhuwit kxfamiliajkan chu tatatlakgo, o lu lakgaputsakgo xlakata kgalhikgo tumin. Katsutoshi, chatum chixku xalak Japón, wan: «Maski xakkgalhi lhuwa tumin, ni xakpaxuwa xlakata amakgapitsin xkilakgkatsalakanikgo chu nitlan xkilikatsinikgo». Lam, chatum puskat xalak Vietnam, wan: «Kakxilhnit la lhuwa latamanin lu liskujkgonit xlakata nakgalhikgo lu tlan taskujut chu ni nakgatsankgani tumin. Pero nichuna kakitaxtuni, wata lu talakgaputsikgo chu talipuwanikgo, tatatlakgo chu pekuankgo».

NI KAJWATIYA TALAKASKIN TAKGALHTAWAKGA CHU TUMIN

Xlikana pi talakaskin nakgalhtawakgayaw chu nakgalhiyaw tumin xlakata tlan nalatamayaw akinin chu kifamiliajkan. Pero ni kajwatiya uma talakaskin xlakata tlakg tlan latamat nakgalhiyaw kkilhtamaku nema aku mima. ¿Tuku xlakata? Kaʼakxilhwi tuku wan Biblia.

KOMO LU NAKGALHTAWAKGAYA NI KILHCHANIMA PI TLAN NAKITAXTUNIYAN.

«Ni putum kilhtamaku tlajanankgo tiku lakapala kgosnankgo [...], nipara tiku lakgskgalalan putum kilhtamaku kgalhikgo taway chu tuku lhuwa xtapalh, na ni putum kilhtamaku tlan kakitaxtuni tiku lhuwa tuku katsikgo, xlakata putum kaʼakgspula tuku nitlan chu tuku kaj xalan lay» (ECLESIASTÉS 9:11).

Lakgachunin, asta tiku tlakg kgalhtawakgakgonit ni lu tlan kakitaxtuni kxlatamatkan xlakata anan lhuwa tuku nila lakgpalikgo. Akgtum liʼakxilhtit, komo naʼanan taʼakglhuwit xlakata tumin chu xlakata política, o komo latamanin nitlan nakalikatsinikgo kaj xlakata la tasiyakgo, uma natlawa pi ni namakgantaxtikgo tuku xlakpuwankgonit.

MAX NI PUTUM KILHTAMAKU KATIKGALHIW TUMIN.

«Ni kalakgnitamakganti xlakata nakgalhiya tumin. Katachokgo chu kalimasiya pi kgalhiya taʼakgatekgsni. Akxni nalakglakapina, nalakgsputa, xlakata nataxtuni xpekgen xtachuna la águila chu nakgosa» (PROVERBIOS 23:4, 5).

Tumin kinkamakgtayayan, pero max ni putum kilhtamaku chuna katiwa. Akgtum liʼakxilhtit, taʼakglhuwit xlakata tumin tlan xtlawalh pi lakapala xmakgatsankgaw tuku mastokgnitaw putum kkilatamatkan. Chu tuku masputunan, chuna la akxni tachiki tiyat, akxni lhkunanan chu akxni min tliwakga un, uma max natlawa pi chatum lataman namakgatsankga xchik chu xtumin.

KGALHIKAN LHUWA TUMIN LIMIN TAʼAKGLHUWIT.

«Lhuwa tuku kgalhi rico ni maxki talakaskin nalhtata» (ECLESIASTÉS 5:12).

Wa uma tuku akgspulalh Franklin, tiku lama kHong Kong. Xla lu xkgalhtawakganit chu lhuwa tumin xtlaja kxputaskujut, chu asta gerente limaxtuka. Pero xla wan: «Estrés xkimakgatatatlama. Lu xaktlakgwan chu asta nila xaklhtata». Franklin nialhla xtayani. Xla wampara: «Ktsukulh klakpuwan tuku xlakata chuna xkiʼakgspulama, chu uma tlawalh pi xaklakpuwa tuku xlakata lamaw».

«Ni kalakgnitamakganti xlakata nakgalhiya tumin» (PROVERBIOS 23:4)

Lhuwa tiku nachuna lakpuwankgonit la Franklin: pi lu kgalhtawakgakan chu kgalhikan lhuwa tumin ni limin xaxlikana tapaxuwan. Xlakata nakgalhikgo tlakg tlan latamat kkilhtamaku nema aku mima, lhuwa latamanin ni putsakgo lhuwa tuku nakgalhikgo, kaj liskujkgo pi tlan nalikatsikgo chu nakatlawanikgo tuku tlan amakgapitsin. ¿Wa uma tuku talakaskin xlakata tlakg tlan latamat nakgalhiyaw kkilhtamaku nema aku mima? Artículo nema stala namasta xatakgalhtin.