¿Nakgalhiya tlakg tlan latamat komo tlan nalikatsiya?

Akglhuwa ciento kata, lhuwa latamanin lakpuwankgonit pi xlakata nakgalhikgo tlakg tlan latamat, xlilat tlan nalikatsikgo. Akgtum liʼakxilhtit, Confucio, chatum makgalhtawakgena chu filósofo tiku max latamalh lata kkata 551 asta 479 akxni nina xmin Jesús, wa: «Ni kakatlawani amakgapitsin tuku ni lakaskina natlawanikana».a Lhuwa latamanin xalak Asia nachuna lakpuwankgo.

TUKU TLAWAKGO LHUWA LATAMANIN

Amakgapitsin na lakpuwankgo pi xlakata nakgalhikgo tlakg tlan latamat kkilhtamaku nema aku mima, talakaskin ni natlawakgo tuku nitlan. Wa xlakata liskujkgo nakamaxkikgo kakni amakgapitsin, tlan talismanin nakgalhikgo, nalinkgo xlatamatkan chuna la xlilat chu tlan natawila xtalakapastaknikan. Linh, chatum puskat xalak Vietnam, wan: «Ankgalhin xaklakpuwan pi komo ni xakʼakgskgawinalh chu ni xakkgalhanalh lu tlan xʼama kinkitaxtuni».

Watiya uma puskat kamujuni liwat lakglimaxkgenin chu tiku ni kgalhikgo xchikkan.

Makgapitsi lhuwa tuku tlan tlawakgo xlakata wa uma tuku kamasiyani xtakanajlakan. Chatum chixku xalak Taiwán, tiku wanikan Hsu-Yun, kinkawaniyan: «Kimasiyanika pi akxni chatum lataman niy, napaxuwa o napatinan putum kilhtamaku kaj xlakata tuku tlawalh kxlatamat».

TUKU KITAXTUNIT

Akxni kgalhsputa kilhtamaku, watiya uma puskat chaxnit aktsu xkgawasa, tlakgwanit chu lilipuwama.

Xlikana pi akxni tlawayaw tuku tlan xpalakata amakgapitsin tlan kinkakitaxtuniyan. Pero lhuwa latamanin tiku kamakgtayakgo amakgapitsin, akxilhkgo pi ni ankgalhin tlan kitaxtu chuna la xlakpuwankgo. Shiu Ping, chatum puskat xalak Hong Kong, wan: «Xlakata tuku ktitaxtunit, tlan nakwan pi tiku tlawakgo tuku tlan ni ankgalhin makglhtinankgo tuku tlan. Akit lu kliskujli xlakata xakkuentajtlawalh kifamilia chu xlakata xaktlawalh tuku tlan, pero nitlan la kitaxtulh kintamakgaxtokgat chu kinchixku kinkamakgxtakgni kinkgawasa chu akit».

Lhuwa latamanin akxilhkgonit pi tuku kanajlakan ni ankgalhin tlawa pi latamanin tlakg tlan nalikatsikgo. Etsuko, chatum puskat xalak Japón, wan: «Xakmakgtanuma kʼakgtum takanajla chu akit xakpulalin tuku xtlawakgo lakkamanan. Lu nitlan klimakgkatsilh akxni kakxilhli pi tiku xkgalhikgo watiya takanajla la akit, ni xlinkgo xlatamatkan chuna la xlilat, xlatalatlawakgo xlakata tlakg xmapakgsinamputunkgo chu nitlan la xmaklakaskinkgo tumin xalak pusikulan».

«Akit lu kliskujli xlakata xakkuentajtlawalh kifamilia chu xlakata xaktlawalh tuku tlan, pero nitlan la kitaxtulh kintamakgaxtokgat chu kinchixku kinkamakgxtakgni kinkgawasa chu akit» (SHIU PING, HONG KONG)

Makgapitsi tiku lu kanajlanikgo Dios lu nitlan makgkatsikgo akxni akxilhkgo pi nitu litaxtulh putum tuku tlan tlawakgolh. Chuna makgkatsilh Van, chatum puskat xalak Vietnam. Xla wa: «Chali chali xakwili liwat chu xanat kxpumakamastankan kifamilia tiku xnikgonita xlakata tlan xkisikulunatlawakgolh kkilhtamaku nema aku xmima. ¡Akglhuwa kata ktlawalh tuku tlan chu kmakgantaxtilh kintalismanin...! Chu xaʼawatiya kinchixku lu tatatlalh. Chu alistalh kintsumat, tiku xkgalhtawakgama kʼatanu país, nilh akxni xkgalhi 20 kata».

TUKU XLAKATA NI KAJWATIYA TALAKASKIN TLAN NALIKATSIYAW

Maski xlakaskinka tlan nakalikatsiniyaw amakgapitsin, ni kajwatiya uma talakaskin xlakata nakgalhiyaw tlakg tlan latamat kkilhtamaku nema aku mima. ¿Tuku xlakata? Kaʼakxilhti tuku wan xaSanto Tatsokgni.

NI PUTUM LATAMANIN TLAWAPUTUNKGO TUKU TLAN.

«Kaj chatum makglakgalhina tlan namasputu tuku tlan» (ECLESIASTÉS 9:18).

Maski chatum lataman lu liskuja xlakata tlan nalikatsi, tuku tlawakgo amakgapitsin tiku xʼakstukan kapaxkikan tlan kalipekua nawili xlatamat. Akgtum liʼakxilhtit, akxni anan pandemia, max wix kgalhakgaxpata tuku wankgo mapakgsinanin chu ni makxtum katalaya amakgapitsin. Chu ¿komo amakgapitsin ni chuna tlawakgo? Tuku tlawakgo max kalipekua nawili xlatamatkan tiku tlawaputunkgo tuku tlan.

LHUWA NI KATSIKGO TUKU TLAN CHU TUKU NITLAN.

«Wi kgantum tiji nema kxlakatin chixku xatlan tasiya, pero linan kkalinin» (PROVERBIOS 14:12).

Kilhtamaku nema titaxtunit anankgonit latamanin tiku xlakpuwankgo pi xtlawamakgo tuku tlan, pero alistalh akxilhkgolh pi nichuna xwanit. Maski tlawaputunaw tuku tlan, ni wamputun pi ni katititaxtuw tuku nitlan xlakata tuku laksakaw.

NI KATSIYAW LA NAWAN KILATAMATKAN.

«Wixin ni katsiyatit tuku nakaʼakgspulayan chali» (SANTIAGO 4:14).

Asta chatum lataman tiku tlan likatsi max tlan kaj lakapala naniy. Akgtum liʼakxilhtit, chuna la ananit tajatat xla COVID-19, lhuwa tiku xatapaxuwan xmakgtayanamakgo nikgolh xlakata xkamakgtayamakgolh amakgapitsin. Kalichuwinaw tuku titaxtulh Liting, chatum puskat xalak China tiku nilh xtlat akxni putlaw chocarlakgolh. Xla wan: «Nila xakʼakgatekgsa. ¿Tuku xlakata nilh chatum lataman tiku lu tlan xlikatsi? Kintlat lu xaskujni xwanit, ni tlankajwa xwanit, tlan xlikatsi, chu kajwatiya xla nilh».

Wa xlakata, komo tlan likatsikan ni wa tuku natlawa pi tlan latamat nakgalhiyaw kkilhtamaku nema aku mima, ¿tuku nakinkamakgtayayan? Xlakata nakatsiyaw, maklakaskinaw akgtum xatalipaw tastakyaw, niku tlan natekgsaw xtakgalhtin kintakgalhskininkan chu nema nakinkawaniyan la nakgalhiyaw tlakg tlan latamat kkilhtamaku nema aku mima. ¿Niku tlan natekgsaw uma tastakyaw?

a Komo tlakg katsiputuna tuku xmasiya Confucio, kalikgalhtawakga párrafos 31 asta 35 anta kcapítulo 7 xla libro El hombre en busca de Dios, nema tlawakgonit xtatayananin Jehová chu tlan namaktiya www.jw.org.