La tlan natalalipimparaya Jehová

AKGATUNU kata nema titaxtu, lhuwa latamanin tiku katamakxtukanit kcongregación kamakgamakglhtinamparakan. Kalilakpuwaw la xlilhuwa “tapaxuwan anan kʼakgapun” akxni chatum xborrego Jehová taspitpara (Luc. 15:7, 10). Komo wix taspitparanita kcongregación, liwana kakatsi pi Jesús, ángeles chu Jehová lu lipaxuwakgo. Pero akxni namatliwakglhtilhaya la talalipina Jehová max tuwa tuku natitaxtuya. ¿Tuku max tuwa natitaxtuya chu tuku namakgtayayan?

MAKGAPITSI TUKU TUWA NATITAXTUYA

Lhuwa natalan, chuntiya taxlajwanikgo maski taspitkgonita kcongregación. Komo wix chuna titaxtupat, max akgatekgsa la makgkatsilh mapakgsina David. Maski xtapatikanita xtalakgalhin, wa: «Lu nitlan klimakgkatsi lhuwa tuku nitlan ktlawanit» (Sal. 40:12; 65:3). Tiku lakgtaspita Jehová max chuntiya nitlan makgkatsi chu maxanan maski titaxtunita lhuwa kata. Akgtum li’akxilhtit, Isabelle,a tiku xtamakxtukanit liwaka 20 kata, wa: «Nila xakkanajla pi Jehová tlan xkintapatilh». Komo wix taxlajwaniya, max na nataxlajwani mintakanajla (Prov. 24:10). Kaliskujti xlakata nichuna na’akgspulayan.

Amakgapitsin nitlan limakgkatsikgo akxni lakpuwankgo putum tuku xlitlawatkan xlakata tlan natalalimparakgo Jehová. Akxni xmakgamakglhtinankanita, Antoine wa: «Xakpatsankganita putum tuku xaktlawa akxni xakskujnanima Jehová». Xlakata chuna makgkatsikgo, max makgapitsi ni lu maliwakakgo taskujut nema makamaxkikgo Dios.

Kawiliw akgtum li’akxilhtit. Komo akgtum chiki lakla xlakata titaxtulh akgtum huracán, max tiku xmalana chiki lu nitlan nalimakgkatsi akxni nalilakpuwan la xlilhuwa kilhtamaku chu litliwakga nalimaxtu xlakata nakaxtlawapara. Xtachuna la uma, komo nialh lu tlan talalipina Jehová xlakata tlawanita akgtum lanka talakgalhin, max na’akxilha pi lu talakaskin naliskuja xlakata tlan natalalipimparaya. Pero kgalhiya tamakgtay.

Jehová kinkawaniyan: «Katantit, chu kalakkaxtlawaw taʼakglhuwit» (Is. 1:18). Wix liskujnitata xlakata tlan natalalipimparaya Jehová, chu xla lu paxkiyan. Kalilakpuwanti: Jehová tlan nalimaklakaskin miliʼakxilhtit xlakata tlan nalimasiyani Satanás pi xa’akgsanina (Prov. 27:11).

Akxni lakgtaspitti Jehová, wix talakatsuwini chu xla malaknuniyan pi nachuna natlawa (Sant. 4:8). Lu tlan pi amakgapitsin na’akxilhkgo pi wix taspitnita kcongregación, pero wi atanu tuku militlawat. Chuntiya milimatliwakglhat tapaxkit nema kgalhiniya minTlat chu mi’Amigo, Jehová. ¿La tlan chuna natlawaya?

KALAKKAXWILI TUKU TLAN NAMAKGANTAXTIYA

Kalakkaxwili tuku tlan namakgantaxtiya. Max chuntiya lakapastaka tuku katsininita xlakata Jehová chu xtamalaknun. Pero talakaskin chuntiya naliskuja, uma wamputun ankgalhin nalichuwinana Dios, napina ktamakxtumit chu nalimaxtuya kilhtamaku xlakata makxtum nakatatawilaya natalan. Kaʼakxilhwi makgapitsi tuku tlan nalakgchipina.

Ankgalhin katachuwinanti Jehová. MinTlat xalak akgapun akgatekgsa pi max lu tuwa makgkatsiya natachuwinana komo chuntiya nitlan limakgkatsiya tuku nitlan tlawanita (Rom. 8:26). Maski chuna, chuntiya katlawani oración chu kawani Jehová pi lu tlan talalipimputuna (Rom. 12:12). Andrej lakapastaka: «Lu nitlan xakmakgkatsi chu xakmaxanan. Pero akxni xaktlawa oración tlakg tlan xakmakgkatsi chu xakkgalhi takaksni». Komo wix ni katsiya tuku nalichuwinana kmioración, kalilakpuwanti oraciones xla Salmos 51 chu 65 nema tlawalh mapakgsina David akxni nitlan limakgkatsilh xtalakgalhin.

Ankgalhin kalikgalhtawakga Biblia. Uma namakgtayayan xlakata namatliwakglha mintakanajla chu tapaxkit nema kgalhiniya Jehová (Sal. 19:7-11). Felipe wa: «Tuku tlawalh pi xaktaxlajwanilh chu xakmakgatsankgananilh Jehová wa pi nialh xaklikgalhtawakga Biblia. Xlakata nialh chuna xaktitaxtuputun, klakkaxwililh liwana nakkgalhtawakga». Wix na tlan chuna natlawaya. Komo ni katsiya tuku nalikgalhtawakgaya, tlan naskiniya tamakgtay chatum amigo tiku tliwakga kgalhi xtakanajla.

Kakatalalipimpara natalan. Makgapitsi tiku taspitparakgo kcongregación lilakgaputsakgo xlakata amakgapitsin nitlan nakaʼakxilhkgo. Larissa wan: «Lu xakmaxanan. Xaklakpuwan pi nitlan tuku xaktlawaninit congregación. Chuna kmakgkatsilh lhuwa kilhtamaku». Liwana kakatsi pi lakgkgolotsin chu amakgapitsi natalan tiku tliwakga kgalhikgo xtakanajlakan lu makgtayaputunkgoyan xlakata tlan natalalipimparaya Jehová (kaʼakxilhti recuadro «Tuku tlan natlawakgo lakgkgolotsin»). Lu lipaxuwakgo pi wix taspitnita chu lakaskinkgo pi kapaxuwa (Prov. 17:17).

¿Tuku tlan natlawaya xlakata tlakg lakatsu natawilaniya congregación? Kapit putum ktamakxtumit chu ankgalhin akxtum kakatalichuwinanti natalan xlakata Dios. ¿La namakgtayayan umakgolh taskujut? Félix wa: «Congregación xkgalhkgalhima pi akit xaktaspitli. Xakmakgkatsi pi lu xkimpaxkikgo. Xputumkan kimakgtayakgolh xlakata nakmakgkatsi pi kmakgtapakgsipa kcongregación, pi Jehová xkintapatinit chu chuntiya tlan xakskujnilh» (kaʼakxilhti recuadro «Tuku tlan natlawaya»).

NI KATAXLAJWANI

Akxni naliskuja xlakata tlan natalalipimparaya Jehová, Satanás chuntiya namalakgachaniyan «taʼakglhuwit» xlakata namaxlajwaniputunan (Luc. 4:13). Komo skgalalh tawilaputuna, kaliskujti la uku xlakata tliwakga natawila mintakanajla.

Akxni kalichuwinan xborregos, Jehová malaknu: «Nema tsankgakgonit nakkaputsa, chu nema anu anu lamakgolh nakkalimimpara, chu nema talaktukxkgonit nakkachini niku talaktukxkgonit chu nema ni lakgtliwakgan nakkamatliwakglha» (Ezeq. 34:16). Jehová kamakgtayanit lhuwa xlakskujnin xlakata tlan natalalimparakgo. Wa xlakata liwana kakatsi pi na makgtayaputunan xlakata chuna la talalipina tlakg natatliwakglha.