«Kakatasanilh lakgkgolotsin»

1. ¿La limasiyanit Jehová pi lu kapaxki putum kskujnin?

JEHOVÁ kapaxki putum kskujnin. Xla kalitamawaxtulh xkgalhni Jesús chu kalakgayawanit lakgkgolotsin pi kakakuentajtlawakgolh (Hech. 20:28). Dios lakaskin pi kakalimasiyanika tapaxkit. Chu lakgkgolotsin tlawakgo tuku kawani Jesús, xʼakgxakga congregación. Kamakgpuwantinikgo putum kskujnin Dios chu kamakgtayakgo akxni wi tuku laktlawaputun xtakanajlakan (Is. 32:​1, 2).

2. ¿Tiku tlakg kalilakgaputsa Jehová? (Ezequiel 34:​15, 16).

² Jehová kalilakgaputsa putum kskujnin, pero tlakg kalilakgaputsa tiku patinamakgo. Xla kalimaklakaskin lakgkgolotsin xlakata nakamakgtaya tiku tlawakgonit tuku nitlan nema laktlawama xtakanajlakan (kalikgalhtawakga Ezequiel 34:​15, 16). Wa xlakata, ¿tuku kilitlawatkan komo maklakaskinaw tamakgtay? Dios lakaskin pi katlawaniw oración chu kakaskiniw tamakgtay «kuentajtlawananin chu makgalhtawakgenanin» xalak congregación (Efes. 4:​11, 12).

3. ¿Tuku xlakata uma artículo nakinkamakgtayayan kimputumkan?

³ Kʼuma artículo nalichuwinanaw la kamaklakaskin Jehová lakgkgolotsin xlakata nakinkamakgtayayan namatliwakglhparayaw kintakanajlakan. Nakgalhtiyaw umakgolh takgalhskinin: ¿tuku kilhtamaku kiliputsatkan xtamakgtaykan lakgkgolotsin?, ¿tuku xlakata chuna kilitlawatkan? chu ¿la kinkamakgtayakgoyan? Uma artículo na nalitamakgtayakgo tiku la uku tliwakga kgalhikgo xtakanajlakan xlakata tuku nakinkalitachuwinanan natlawa pi xtapalh naliʼakxilhaw chuna la Jehová kalimaklakaskin lakgkgolotsin xlakata nakinkamakgtayayan. Na nakinkamasiyaniyan tuku kilitlawatkan komo namin kilhtamaku namaklakaskinaw xtamakgtaykan lakgkgolotsin.

¿TUKU KILHTAMAKU NAKATASANIYAW LAKGKGOLOTSIN?

4. ¿La likatsiyaw pi tuku wan Santiago 5:​14-16, 19, 20 kilhchanima chatum tiku tatatla kxtakanajla? (Na kaʼakxilhti dibujos).

⁴ Discípulo Santiago lichuwinalh la kamaklakaskin Jehová lakgkgolotsin xlakata nakinkamakgtayayan. Tsokgwililh: «¿Wi tiku tatatla kmilakgstipankan? Kakatasanilh lakgkgolotsin xalak congregación» (kalikgalhtawakga Santiago 5:​14-16, 19, 20). Unu, Santiago lichuwinama chatum tiku tatatla kxtakanajla o wi tuku laktlawama xtakanajla. Chuna wanaw xlakata Santiago ni wani tiku tatatla pi kalakgalh chatum makuchina, wata wani pi kakatasanilh lakgkgolotsin. Na wan pi uma tiku tatatla, paksa akxni tapatikan xtalakgalhin. Akxni chatum lataman wi tuku laktlawama xtakanajla, xtachuna la chatum tiku tatatla. Akxni tatatlayaw, lakganaw chatum makuchina, waniyaw tuku kinkaʼakgspulaman chu tlawayaw tuku kinkawaniyan. Xtachuna la uma, akxni wi tuku laktlawama kintakanajlakan, talakaskin nalakganaw chatum kgolotsin, nawaniyaw tuku kinkaʼakgspulaman chu nastalaniyaw xtastakyaw nema kikilhtiyanit kBiblia.

5. ¿Tuku kilitlawatkan xlakata nakatsiyaw komo wi tuku laktlawama kintakanajlakan?

⁵ Santiago capítulo 5 kinkamakgpuwantiniyan pi nakaskiniyaw tamakgtay lakgkgolotsin komo naʼakxilhaw pi wi tuku laktlawama chuna la talalinaw Jehová. Pero ni talakaskin nakgalhkgalhiyaw asta akxni nakitlawayaw akgtum lanka talakgalhin. Wata talakaskin alisokg naskinaw tamakgtay. Chu lu kuenta kilitlawatkan uma, xlakata Biblia kinkawaniyan pi max kiʼakstukan nataʼakgskgawiyaw chu nalakpuwanaw pi lu tlan talalinaw Jehová maski nichuna (Sant. 1:22). Wa uma tuku kaʼakgspulalh makgapitsi kstalaninanin Cristo xalak Sardis. Xlakpuwankgo pi lu tlan xtalalinkgo Jehová, pero Jesús kawanilh pi ni xlikana xwanit (Apoc. 3:​1, 2). ¿Tuku tlan natlawayaw xlakata nakatsiyaw komo wi tuku laktlawama kintakanajlakan? Kililakpuwanatkan la limakgkatsiyaw la uku akxni skujnaniyaw Jehová chu la xmakgkatsiyaw akxni aku xtamununitaw (Apoc. 2:​4, 5). Kalilakpuwaw umakgolh takgalhskinin: «¿Klipaxuwa klikgalhtawakga Biblia chu klilakpuwan chuna la xaktlawa makgasa? ¿Kkan putuminika tamakxtumit chu klakkaxwili tuku natalichuwinan? ¿Chuntiya xlakaskinka kliʼakxilha naklichuwinan Dios? ¿Tlakg xlakaskinka kliʼakxilha tuku klilakgastanan chu tuku lhuwa xtapalh?». Chuna la nakgalhtinanaw pulakatunu takgalhskinin nakinkamakgtayayan nakatsiyaw komo wi tuku tlawamaw nema alistalh nakinkamatlawiyan tuku tlakg nitlan. Komo nila kiʼakstukan lakkaxtlawayaw uma o komo tlawanitawa tuku Jehová ni lakgati, talakaskin nakaskiniyaw tamakgtay lakgkgolotsin.

6. ¿Tuku xlitlawat chatum tiku tlawanit akgtum lanka talakgalhin?

⁶ Pero komo chatum lataman tlawanit akgtum lanka talakgalhin nema xtlawalh pi xtamakxtuka kcongregación, xlitachuwinat chatum kgolotsin (1 Cor. 5:​11-13). Uma lataman maklakaskin tamakgtay xlakata tlan natalalimpara Jehová. Chu Jehová tlan natapati kajwatiya komo nalimasiya pi makgxtakgnita xtalakgalhin (Hech. 26:20). Chu pulaktum la nalimasiya uma, wa pi nakawani lakgkgolotsin tuku tlawanit.

7. ¿Tiku na maklakaskinkgo xtamakgtaykan lakgkgolotsin?

⁷ Lakgkgolotsin ni kajwatiya kamakgtayakgo tiku tlawakgonit akgtum lanka talakgalhin. Na tlan nakamakgtayakgo tiku taxlajwaninit xtakanajlakan (Hech. 20:35). Kalilakpuwaw pi wix liskujpat xlakata ni natlawaya tuku nitlan tlawaputuna, chu min kilhtamaku makgkatsiya pi nila makgatlajaya. Max uma tlakg tuwa kitaxtuniyan komo akxni nina xlakgapasa Jehová xwaya drogas, xʼakxilha pornografía o xtlawaya talakgxtumit nema ni xlitatlawat. Pero kalakapastakti pi ni talakaskin miʼakstu namakgatlajaya uma. Tlan nawaniya chatum kgolotsin tiku lipawana putum tuku makgkatsiya. Xla namaxkiyan tastakyaw chu namalakapastakayan pi Jehová chuntiya namakgtayayan komo chuntiya naliskuja ni natlawaya tuku nitlan tlawaputuna (Ecl. 4:12). Komo min kilhtamaku litaxlajwaniya xlakata tlawaputuna tuku nitlan, lakgkgolotsin namalakapastakakgoyan pi uma limasiya pi ni makgalipuwamputuna Jehová chu ni miʼakstu lipawankana (1 Cor. 10:12).

8. ¿Talakaskin nakawaniyaw lakgkgolotsin putum tuku nitlan tlawayaw? Kawanti tuku xlakata chuna wana.

⁸ Ni talakaskin nakawaniyaw lakgkgolotsin putum tuku nitlan tlawayaw. Kalilakpuwanti uma, max wani chatum tala tuku nitlan limamakgkatsini chu asta lu sitsini. Ni talakaskin nawaniya chatum kgolotsin, wata tlakg tlan natlawaya tuku wa Jesús: natalakkaxlaya mintala (Mat. 5:​23, 24). Na tlan naputsaya kkilikgalhtawakgakan tuku namakgtayayan ni lu lakapala nasitsiya chu namalakgachokgoya tuku tlawaputuna. Pero komo naʼakxilha pi nila lakkaxla taʼakglhuwit, tlan naskiniya xtamakgtay chatum kgolotsin. Carta nema apóstol Pablo kamalakgachanilh filipenses wanilh chatum tala pi xkamakgtayalh Evodia chu Síntique xlakata xlakkaxtlawakgolh tuku xlalimakgasitsinit. Xtachuna la uma, chatum kgolotsin tlan namakgtayayan (Filip. 4:​2, 3).

¿TUKU XLAKATA NAKATASANIYAW LAKGKGOLOTSIN?

9. Maski max maxananaw nakatachuwinanaw lakgkgolotsin, ¿tuku xlakata chuna kilitlawatkan? (Proverbios 28:13).

⁹ Komo makgkatsiyaw pi nila makgatlajayaw tuku nitlan tlawaputunaw o komo tlawanitaw akgtum lanka talakgalhin, max natalakaskin nalipawanaw Jehová chu ni napekuanaw xlakata nakatachuwinanaw lakgkgolotsin. Maski maxananaw, ni kamastaw talakaskin pi uma natlawa pi ni nakaskiniyaw xtamakgtaykan. ¿Tuku xlakata? Kalakapastakwi pi Jehová kawilinit lakgkgolotsin xlakata nakinkamakgtayakgoyan namatliwakglhparayaw kintakanajlakan chu chuntiya tlan natalalinaw. Wa xlakata, akxni putsayaw xtamakgtaykan lakgkgolotsin limasiyayaw pi lipawanaw Dios chu kgalhakgaxmataw. Liwana katsiyaw pi Jehová nakinkamakgtayayan namakgatlajayaw tuku nitlan (Sal. 94:18). Chu kalakapastakwi pi komo nakawaniyaw lakgkgolotsin kintalakgalhinkan chu namakgxtakgaw, Jehová nakinkalimasiyaniyan xtalakgalhaman chu nakinkatapatiyan (kalikgalhtawakga Proverbios 28:13).

10. ¿Tuku xkitaxtulh komo xmatsekgwi kintalakgalhinkan?

¹⁰ Chuna la lichuwinanitaw, tipalhuwa la litamakgtayayaw akxni putsayaw xtamakgtaykan lakgkgolotsin. Pero komo matsekgputunaw kintalakgalhinkan, nitlan kintikakitaxtunin. Kalilakpuwaw mapakgsina David. Akxni matsekglhli tuku nitlan xtlawanit, laktlawalh chuna la xtalalin Jehová, lu xlakgaputsa chu asta makgatatatlalh (Sal. 32:​3-5). Akxni nitlan wi kintakanajlakan, xtachuna la akxni tatlekgeyaw. Komo ni naputsayaw tamakgtay, tlakg nasnunanaw. Jehová katsi uma chu wa xlakata kinkawaniyan pi kakatachuwinaw lakgkgolotsin chu «kalakkaxtlawaw taʼakglhuwit» (Is. 1:​5, 6, 18, La Biblia. Traducción del Nuevo Mundo, TNM).

11. ¿Tuku atanu nitlan kitaxtu akxni matsekgkan talakgalhin?

¹¹ Komo namatsekgaw kintalakgalhinkan, na nakamakgstuntlawayaw amakgapitsin. Max xtlawaw pi Jehová nialh xkalimakgtayalh xʼespíritu santo putuminika congregación chu xʼanalh taʼakglhuwit (Efes. 4:30). Chu komo nakikatsiyaw pi chatum tala tlawalh akgtum lanka talakgalhin, talakaskin nawaniyaw pi kakatachuwinalh lakgkgolotsin.a Komo nichuna natlawa, talakaskin pi akinin nawanaw. Kalakapastakwi pi komo xmatsekgwi tuku tlawanit, na xlitawilaw kuenta (Lev. 5:1). Xlakata paxkiyaw Jehová talakaskin nawanaw tuku lanit. Chuna namakgtayananaw nitu nalixkajwanan congregación chu namakgtayayaw tiku tlawanit talakgalhin pi tlan natalalimpara Jehová.

¿LA KINKAMAKGTAYAKGOYAN LAKGKGOLOTSIN?

12. ¿La kamakgtayakgo lakgkgolotsin tiku taxlajwaninit xtakanajlakan?

¹² Biblia kawani lakgkgolotsin pi kakamakgtayakgolh tiku taxlajwaninit xtakanajlakan (1 Tes. 5:14). Komo tlawanita tuku laktlawama chuna la talalipina Jehová, xlakan natlawanikgoyan makgapitsi takgalhskinin xlakata namakgtayakgoyan nawana tuku lakpuwana chu tuku makgkatsiya (Prov. 20:5). Xlakata nakamakgtayaya liwana natlawakgo uma taskujut, kakawani tuku makgkatsiya maski max tuwa chuna natlawaya xlakata la makgastakka, la likatsiya o xlakata limaxanana tuku tlawa. Ni kalilakgaputsa komo wi tuku akglakgwa nawana (Job 6:3). Ni lakapala katilakputsananikgon, wata kaks nakgaxmatnikgoyan chu nalilakpuwankgo putuminika tuku lanit xlakata tlan nastakyawakgoyan (Prov. 18:13). Xlakan katsikgo pi lin kilhtamaku akxni wi tiku makgtayakan chu pi lakgachunin talakaskin pi ni kajwatiya makgtum natachuwinankan.

13. ¿Tuku atanu nalimakgtayakgoyan lakgkgolotsin? (Na kaʼakxilhti dibujos).

¹³ Lakgkgolotsin lu naliskujkgo xlakata ni natlawakgo tuku tlakg nitlan namamakgkatsiniyan. Wata natlawakgo oración mimpalakata. Jehová nakakgaxmatni chu max lu kaks nalilakawana la namatliwakglhan umakgolh oraciones. Xlakan na naʼakmawakakgoyan «aceite kxtukuwani Jehová» (Sant. 5:​14-16). Uma «aceite» kilhchanima tuku xaxlikana masiya xTachuwin Dios. Wa xlakata lakgkgolotsin liwana namaklakaskinkgo Biblia xlakata tlan namamakgkatsinikgoyan chu namakgtayakgoyan tlan natalalipimparaya Jehová (Is. 57:18). Xtastakyawkan nema nakikilhtiyakgo kBiblia namakgtayayan natlawaputuna tuku tlan. Jehová nakamaklakaskin lakgkgolotsin xlakata nawaniyan: «Wa uma tiji. Anta katlawanti» (Is. 30:21).

14. Chuna la wan Gálatas 6:​1, ¿la kamakgtayakgo lakgkgolotsin tiku amakgo «ktiji nema ni xatlan»? (Na kaʼakxilhti dibujos).

¹⁴ (Kalikgalhtawakga Gálatas 6:1). Ankan «ktiji nema ni xatlan» kilhchanima pi ni lilatamakan xlimapakgsin Dios. Max chatum tala natsuku an knixatlan tiji xlakata max ni liwana lakapastaknit tuku tlawama o lakatsalama akgtum xlimapakgsin Dios. Tapaxkit kamakgpuwantini lakgkgolotsin “nakalimasiyanikgo tsatata naku akxni nalitsakgsakgo namaspitkgo ktiji nema xatlan”. Tachuwin xagriego nema matitaxtikan «nalitsakgsayatit namaspitatit» na kilhchanima akxni wi tiku kaxwili lukut nema tatlekgenit o tamuyokgnit xlakata nakaxla. Chatum tlan makuchina lu kuenta tlawa akxni kaxwilini xlukut chatum lataman xlakata ni lu namakgapatinan. Lakgkgolotsin nachuna tlawakgo akxni stakyawakgo chatum tala, limasiyanikgo talakgalhaman chu ni tlawakgo tuku tlakg nitlan namamakgkatsini. Biblia na kawani lakgkgolotsin pi akxni nastakyawanankgo talakaskin “xʼakstukan nakakuentajtlawakan”. Xlakata xlakan na makglakgalhinanin, max na natsukukgo ankgo knixatlan tiji. Wa xlakata ni lakpuwankgo pi xlakan tlakg xaʼakgstitum litaxtukgo nixawa tiku stakyawamakgo, wata taktujukgo chu limasiyanikgo talakgalhaman uma tala (1 Ped. 3:8).

15. ¿Tuku tlan natlawayaw komo titaxtumaw tuku tuwa?

¹⁵ Tlan nakalipawanaw lakgkgolotsin. Xlakan liwana katsikgo pi ni xlilat nakalitachuwinankgo amakgapitsin tuku chatum tala kalitachuwinanit. Na kamasiyanikanit pi akxni nastakyawanankgo nakikilhtiyakgo xtastakyawkan kBiblia. Chu kamasiyanikanit pi chuntiya kuenta xlitlawatkan xlakata nakinkamakgtayakgoyan (Prov. 11:13; Gál. 6:2). Xlikana pi lakgkgolotsin tanu tanu la likatsikgo chu makgapitsin max tlakg makgasa la skujnanimakgo Jehová, pero komo kgalhiyaw akgtum taʼakglhuwit, tlan natachuwinanaw kaxatikawa kgolotsin. Pero uma ni wamputun pi chatum chatum natachuwinanaw asta akxni nakitekgsaw tiku nakinkawaniyan tuku kgaxmatputunaw. Komo chuna xtlawaw, xlitaxtuw la tiku kajwatiya putsakgo tiku nakawani «tuku xlakan kgaxmatputunkgo» chu ni lakgatikgo nakalistakyawakan «xatlan tamasiy» nema min kxTachuwin Dios (2 Tim. 4:3). Akxni litachuwinanaw chatum kgolotsin kintaʼakglhuwitkan, max nakinkakgalhskinan komo kalitachuwinanitawa uma amakgapitsin lakgkgolotsin chu tuku tastakyaw kinkamaxkikan. Chu xlakata uma kgolotsin taktuju, max nakgalhskin atanu kgolotsin tuku lakpuwan (Prov. 13:10).

TUKU KINKALAKGCHANAN KINCHATUNUKAN

16. ¿Tuku kinkalakgchanan natlawayaw kinchatunukan?

¹⁶ Lakgkgolotsin kinkakuentajtlawakgoyan chu kinkastakyawakgoyan, pero ni kinkawanikgoyan tuku kilitlawatkan. Kinchatunukan kinkalakgchanan nalimasiyaniyaw Jehová chali chali pi paxkiyaw chu makgapaxuwaputunaw (Rom. 14:12). Xla nakinkamakgtayayan nalaksakaw tuku tlan chu ni namakgxtakgaw. Wa xlakata, lakgkgolotsin maklakaskinkgo Biblia xlakata nakinkamakgtayakgoyan naʼakgatekgsaw tuku lakpuwan Jehová chu kinkamaxkikgoyan talakaskin pi akinin nalaksakaw tuku natlawayaw. Uma kinkamakgtayayan nakatsiniyaw namaklakaskinaw kintalakapastaknikan (Heb. 5:14).

17. ¿Tuku liwana kililakkaxwilitkan natlawayaw?

¹⁷ ¡Akgtum lanka talakgalhaman pi kskujnin Jehová litaxtuyaw! Xla malakgachalh Jesús, «xatlan mapuchwayanina», xlakata xkinkalakgmaxtun chu tlan xlatamaw putum kilhtamaku (Juan 10:11). Nachuna, kalimaklakaskin lakgkgolotsin nema wilakgo kputum congregaciones xlakata namakgantaxti uma tamalaknun: «Nakkamaxkiyan mapuchwayaninanin tiku natlawakgo kintalakaskin, xlakan nakgalhikgo liskgalala chu taʼakgatekgsni chu nakamaxkikgoyan miliwatkan» (Jer. 3:​15, TNM). Wa xlakata, komo wi tuku maxlajwanima kintakanajlakan, kakatasaniw lakgkgolotsin xlakata nakaskiniyaw xtamakgtaykan. Liwana kalimaklakaskiw uma xtamaskiwin Jehová.