¡Tlan namakgatlajayaw tasitsi!

Komo wix niti sitsininitan, pero max akxilhnita la kasitsinikan amakgapitsin. Anta knoticias kaʼakxilhaw la kasitsinikan latamanin, xlakata xkilhtsukutkan, la tasiyakgo o xlakata lakgatikgo xtachixkukan o xtapuskatkan. Wa xlakata lhuwa mapakgsinanin wilikgo limapakgsin xlakata namasputukgo tuku tlawa pi nalasitsinikan.

Makglhuwa, tasitsi tlawa pi tlakg nalasitsinikan. Tiku kasitsinikan makgapuspitnankgo, chu chuna tasitsi ni sputa.

Max wix titaxtunita talaksakpaxkit, likgalhkgamanankanita, wanikanita tuku nitlan chu amakgapitsi latamanin max wanikgonitan pi natlawanikgoyan tuku nitlan. Pero lasitsinikan, tlakg lhuwa tuku kilhchanima. Makglhuwa, latalatlawakan, lamatlawikan tuku nitlan, tlawanikan tuku nitlan tuku katapakgsini amakgapitsin, lawilinikan, lalikgamanankan, lamakgnikan chu asta katlawanikan tuku nitlan lhuwa latamanin xla akgtum kachikin.

Uma revista lichuwinan pi tlan makgatlajakan tasitsi chu nakgalhti umakgolh takgalhskinin:

• ¿Tuku xlakata anan lhuwa tasitsi?

• ¿La tlan namachokgoyaw tasitsi?

• ¿Namin kilhtamaku nasputa tasitsi?