¿Xkatsiyata?
¿Tuku xlakata tlan xkitaxtu pi israelitas tlan xmakamastakgolh tórtolas chu palomas?
KLIMAPAKGSIN nema maxkikanit Moisés, xwan pi Jehová xmakgamakglhtinan tórtolas chu palomas la akgtum tamakamastan. Umakgolh pulaktiy tsiktsi ankgalhin akxtum kalichuwinankan klimapakgsin xlakata tamakamastan. Israelitas tlan xmakamastakgolh tórtolas o palomas (Lev. 1:14; 12:8; 14:30). Lu tlan xwanit uma xlakata ni ankgalhin tlan xkatekgskan tórtolas. Kaʼakxilhwi tuku xlakata.
Tórtola
Tórtolas makgapitsi papaʼ ankgo alakatanu kachikinin. Tamakgxtakgkgo kʼIsrael papaʼ akxni tlakg chichinan. Papaʼ octubre (akxni tsuku akgayujnan), umakgolh tsiktsi ankgo kpaíses nema wilakgolh kxpakgalhu Israel xlakata anta tlakg katsitsijwan, chu taspitparakgo kʼIsrael akxni tsuku xananan (Cant. 2:11, 12; Jer. 8:7). Wa xlakata, israelitas tuwa xkatekgskgo tórtolas akxni xlonkgnan xlakata tlan xmakamastakgolh.
Paloma brava
Pero palomas ni ankgo alakatanu kachikinin, wa xlakata tlan xkatekgskan kʼIsrael putuminika kata. Nachuna, latamanin xkawilikgo anta kxchikkan (katamalakxtupi Juan 2:14, 16). Chuna la wan maktum libro, kputum laktsu kachikinin xalak ama tiyat, «latamanin xkawilikgo palomas anta kxchikkan. Kʼakgatunu chiki xkawilikanit niku xkatamaknukan palomas, nema akgtum lhuku xwanit kʼakgtum patsaps, niku umakgolh tsiktsi tlan xtanukgo» (katamalakxtupi Isaías 60:8).
Paloma nema tanuma klhuku
¿Tuku kinkamasiyaniyan uma xpalakata Jehová? Pi xla chatum Dios tiku lu xapaxkina chu akgatekgsninan, xlakata xmasta talakaskin pi israelitas xmakamaxkikgolh tsiktsi nema ni tuwa xtekgskan putuminika kata.