Kgalhiyaw takaksni maski titaxtumaw tuku tuwa

1. ¿Tuku “takaksni nema masta Dios”, chu la litamakgtayayaw? (Filipenses 4:6, 7).

ANAN akgtum takaksni nema latamanin ni lakgapaskgo. Wa “takaksni nema masta Dios”. Uma takaksni wa tuku makgkatsi chatum lataman tiku lu tlan talalin xTlat xalak akgapun. Akxni kgalhiyaw takaksni nema masta Dios, lu tlan makgkatsiyaw (kalikgalhtawakga Filipenses 4:6, 7). Lipaxuwayaw xlakata katalalinaw tiku paxkikgo Jehová chu xlakata talalinaw «Dios tiku masta takaksni» (1 Tes. 5:23). Akxni liwana lakgapasaw kinTlatkan, tlakg lipawanaw chu kgalhakgaxmataw, kgalhiyaw takaksni nema masta. Uma takaksni tlan kinkamamakgkatsiniyan akxni titaxtuyaw tuku tuwa.

2. ¿Tuku xlakata liwana katsiyaw pi tlan nakgalhiyaw takaksni nema masta Dios?

² ¿Xlikana tlan nakgalhiyaw takaksni nema masta Dios akxni titaxtuyaw tuku tuwa? ¿Tlan kgalhiyaw takaksni akxni anan akgtum pandemia, akxni wi tuku kaj lakapala la, akxni latalatlawakgo latamanin o akxni kinkaputsastalanikanan? Putum uma max nakinkamakgapekuanan. Pero Jesús kamaxkilh uma tastakyaw kstalaninanin: «Ni kamastatit talakaskin pi nataʼakglhuwi chu napekuan minakujkan» (Juan 14:27). Lhuwa natalan tlawakgonit tuku lichuwinalh Jesús. Jehová kamakgtayanit nakgalhikgo takaksni maski titaxtukgonit tuku lu tuwa.

¿LA NAKGALHIYAW TAKAKSNI AKXNI ANAN AKGTUM PANDEMIA?

3. Akxni anan akgtum epidemia o pandemia, ¿la natlawa pi nialh nakgalhiyaw takaksni?

³ Akgtum epidemia o pandemia max tlan nalakgpali putum kilatamatkan. Kalilakpuwaw la kalakgpalininit xlatamatkan lhuwa latamanin COVID-19. Akxni kakgalhskinka lhuwa latamanin, liwaka itat wankgolh pi kʼuma pandemia lu tuwa makgkatsikgolh nalhtatakgo. Na taliwakalh latamanin tiku kgalhikgo tajatat xla talakgaputsit chu talipuwan, tiku wakgo kuchu chu drogas, tiku katlawanikan tuku nitlan kxchikkan chu tiku xʼakstukan kamakgniputunkan. Komo anan akgtum epidemia niku lapat, ¿tuku tlan natlawaya xlakata ni lu nalakgaputsaya chu nakgalhiya takaksni nema masta Dios?

4. ¿Tuku xlakata kinkamaxkiyan takaksni tuku Jesús lichuwinalh pi xʼama la kxaʼawatiya kilhtamaku?

⁴ Jesús lichuwinalh pi kxaʼawatiya kilhtamaku xʼama anan laklixkajni tajatat «lakatum lakatum» (Luc. 21:11). ¿Tuku xlakata uma kinkamaxkiyan takaksni? Xlakata katsiyaw pi xʼama la uma, ni kaks kinkamalakawaniyan. Akxilhaw pi kgantaxtuma chuna la Jesús lichuwinalh. Wa xlakata stalaniyaw tastakyaw nema wa xpalakata tiku xlatamakgolh kxaʼawatiya kilhtamaku. Xla wa: «Ni kapekuantit» (Mat. 24:6).

5. 1) Chuna la wan Filipenses 4:8, 9, ¿tuku kiliskinitkan Jehová akxni anan akgtum epidemia? 2) ¿La kinkamakgtayayan nakgaxmataw takgalhtawakga xalak Biblia nema grabarlikanit?

⁵ Akxni anan akgtum epidemia, xlikana pi ni katsiyaw tuku natlawayaw chu lu pekuanaw. Wa uma tuku titaxtulh chatum tala tiku wanikan Desi.b Akxni xkuku, xtapuxnimat chu xmakuchina lakgnikgolh COVID-19, xpekuan napasa uma tajatat chu namapasi xtse tiku xlina kata. Na xlilakgaputsa namakgatsankga xtaskujut, chu xlilakpuwan niku xʼama tiya tumin xlakata xtamawalh liwat chu tuku nalilakgaxokgo niku xwi. Kajwatiya xlilakpuwan uma, wa xlakata nila klhtata. Pero kgalhipa takaksni. ¿La tlawalh? Tlawanilh oración Jehová chu wanilh tuku xlilakgaputsa xlakata xmakgtayalh nakgalhipara takaksni chu kajwatiya nalilakpuwan tuku tlan (kalikgalhtawakga Filipenses 4:8, 9). Xlakata tlan nakgaxmatni Jehová, xla xkgaxmata grabaciones xalak Biblia. Desi wan: «Lu tlan xkimamakgkatsinikgo tiku xlikgalhtawakgakgo Biblia chu xkimalakapastaknikgo pi Jehová xkililakgaputsa» (Sal. 94:19).

6. ¿La nakinkamakgtayayan kiʼakstukan nakgalhtawakgayaw chu ankgalhin naʼanaw ktamakxtumit?

⁶ Akxni anan akgtum epidemia lhuwa tuku talakgpali kkilatamatkan. Pero ni kamastaw talakaskin nalaktlawa la kiʼakstukan kgalhtawakgayaw chu natlawa pi nialh naʼanaw ktamakxtumit. Kilikgalhtawakgakan chu videos lichuwinankgo xliʼakxilhtitkan makgapitsi natalan tiku titaxtumakgo taʼakglhuwit nema xtachuna la uma chu ni makgxtakgkgonit Jehová (1 Ped. 5:9). Tamakxtumit kinkamakgtayayan nalilakpuwanaw textos xalak Biblia nema nalitamakgtayayaw, na kinkamaxkiyan talakaskin nakamakgpuwantiniyaw amakgapitsin chu na nakinkamakguwantinikanan (Rom. 1:11, 12). Komo nalilakpuwanaw la Jehová kamakgtayanit kskujnin akxni xtatatlakgo, xpekuankgo o xmakgkatsikgo pi xʼakstukan xwilakgo, kintakanajlakan tlakg natatliwakglha chu liwana nakanajlayaw pi xla na nakinkamakgtayayan.

7. ¿La tlan nastalaniyaw xliʼakxilhtit apóstol Juan?

⁷ Lu kaliskujwi chuntiya nakatachuwinanaw kinatalankan. Akgtum epidemia o pandemia tlan natlawa pi asta nialhla nakatalakatsuwiniyaw kinatalankan chu amakgapitsin latamanin. Akxni chuna titaxtuyaw, max namakgkatsiyaw chuna la apóstol Juan, tiku lu xlakaʼakxilhputun Gayo, xʼamigo (3 Juan 13, 14). Pero xkatsi pi makgapitsi kilhtamaku nila xʼama akxilha xʼamigo. Wa xlakata tlawalh putum tuku matlanilh: malakgachanilh maktum carta. Komo nila xkaʼakxilhwi kinatalankan, max tlan xwa xkatachuwinaw kteléfono, xkatlawaniw akgtum videollamada, o xkamalakgachiw akgtum mensaje. Akxni katachuwinanaw kinatalankan tlawa pi ni namakgkatsiyaw pi kiʼakstukan wilaw chu ni lu nalakgaputsayaw. Pero ¿chu komo lu lakgaputsamaw? Kakatachuwinaw lakgkgolotsin chu kamakgamakglhtinaw tamakgtay nema xatapaxuwan kinkamaxkikgoyan (Is. 32:1, 2).

KGALHIYAW TAKAKSNI AKXNI KAJ LAKAPALA WI TUKU LA

8. Akxni kaj lakapala wi tuku la, ¿la natlawa pi nialh nakgalhiya takaksni?

⁸ Komo niku lapat litatsamanalh chuchut, tachikilh tiyat o lhkunanalh, max chuntiya lu lilakgaputsaya uma. Chu komo nilh tiku xpaxkiya o makgatsankga tuku xkgalhiya, max lu makgapatinanan, makgalipuwanan chu asta lisitsiya. Pero uma ni wamputun pi wix paxkiya tuku lhuwa xtapalh o ni tliwakga wi mintakanajla. Wix titaxtu tuku lu tuwa chu amakgapitsin katsikgo pi max chuntiyaku lu nitlan limakgkatsiya uma (Job 1:11). Pero maski lu tuwa tuku titaxtumaw, tlan nakgalhiyaw takaksni. Kaʼakxilhwi la tlan nakgalhiyaw.

9. ¿La kinkamakgtayayan tuku lichuwinalh Jesús xlakata skgalalh natawilayaw akxni kaj lakapala wi tuku la?

⁹ Kʼuma kakilhtamaku, latamanin lakpuwankgo pi nikxni katititaxtukgolh tuku tuwa. Pero akinin ankgalhin lakapastakaw tuku Jesús wa. Katsiyaw pi tlakg talhuwima tuku masputunan chu max na nakinkatlawanikgoyan tuku nitlan. Jesús kawanilh kstalaninanin pi kxaʼawatiya kilhtamaku “xʼama tachiki tiyat” chu xʼama anan atanu tuku namasputunan (Luc. 21:11). Na lichuwinalh pi xʼama talhuwi tuku nitlan, chu putum uma akxilhaw akxni latamanin lakatsalakgo limapakgsin, latalatlawakgo chu lamakgnikgo (Mat. 24:12). Jesús ni lichuwinalh pi putum uma kajwatiya chuna xʼamakgo titaxtukgo tiku ni skujnikgo Jehová. Chu lhuwa kskujnin Jehová lu lipatinankgonit putum uma tuku masputunan (Is. 57:1; 2 Cor. 11:25). Jehová max ni katitlawalh akgtum milagro xlakata nakinkamakgtayayan akxni kaj lakapala wi tuku la, pero tlan nakinkamakgtayayan ni lu nalakgaputsayaw chu nakgalhiyaw takaksni.

10. ¿Tuku xlakata limasiyayaw takanajla akxni lakkaxwiliyaw tuku natlawayaw akxni nina min tuku masputunan? (Proverbios 22:3).

¹⁰ Akxni kaj lakapala wi tuku nala, ni lu katilakgaputsaw komo makaxnitaw putum tuku namaklakaskinaw. ¿Pero ni katilimasiyalh uma pi ni lipawanaw Jehová? Nichuna. Akxni lakkaxwiliyaw tuku natlawayaw, limasiyayaw pi kanajlayaw pi xla nakinkakuentajtlawayan. ¿Tuku xlakata chuna wanaw? Xlakata Biblia kinkamasiyaniyan ni kalipekua nawiliyaw kilatamatkan (kalikgalhtawakga Proverbios 22:3). Jehová ankgalhin kinkawaninitan pi wi tuku kalakkaxwiliw xlakata akxni min tuku masputunan chu limaklakaskinit likgalhtawakga, tamakxtumit chu tamakatsinin.c ¿Tuku natlawayaw komo lipawanaw Jehová? Namakgantaxtiyaw la uku putum umakgolh tastakyaw, xlakata nina min tuku masputunan.

11. ¿Tuku kinkamasiyaniyan xliʼakxilhtit Margaret?

¹¹ Kalilakpuwaw tuku titaxtulh chatum tala tiku wanikan Margaret. Mapakgsinanin wanikgolh pi xtaxtulh kxchik xlakata klhkunanama niku xlama. Xlakata lhuwa latamanin xtsalataxtumakgo, tiji litatsamalh lhuwa putlaw chu nila xtitaxtukan. Xʼanan lhuwa jin, chu Margaret tamakgxtakgli kxputlaw. Pero lakgtaxtulh xlakata liwana xlakkaxwilinit tuku natlawa. Xlakata xlin akgtum mapa makgtayalh natekgsa atanu tiji. Xla xkilanita kʼuma tiji xlakata tlan xʼalh anta komo wi tuku kaj lakapala xlalh. Lakgtaxtulh xlakata liwana xlakkaxwilinit tuku natlawa.

12. ¿Tuku xlakata kgalhakgaxmataw tuku kinkawanikanan akxni kaj lakapala wi tuku la?

¹² Xlakata nitu nalaniyaw chu tlan tuku nakitaxtu, max mapakgsinanin nakinkawanikgoyan pi anta katamakgxtakgwi o kataxtuw kkinchikkan o atanu tuku nakinkawanikgoyan pi katlawaw. Makgapitsi latamanin ni tlawaputunkgo uma xlakata ni makgxtakgputunkgo tuku kgalhikgo. Pero ¿tuku tlawayaw akinin kstalaninanin Cristo? Biblia kinkawaniyan: «Xpalakata Malana, kakakgalhakgaxpattit mapakgsinanin nema latamanin kalaksakkgonit, tlakg chuna mapakgsina, xlakata tlakg xlakaskinka litaxtu nixawa wixin, komo wa gobernador o tiku malakgachakgo» (1 Ped. 2:13, 14). Xkachikin Jehová na kinkamaxkiyan makgapitsi tastakyaw xlakata nitu nalaniyaw. Ankgalhin kinkamalakapastakayan pi kakamaxkiw kinumerojkan lakgkgolotsin xlakata xlakan tlan nakinkatachuwinankgoyan akxni wi tuku kaj lakapala la. Chu akinin, ¿chuna tlawanitaw? Max xkachikin Jehová nakinkawaniyan pi katamakgxtakgwi kkinchikkan o pi kilitaxtutkan, o katamawawiliw tuku namaklakaskinaw. O max nakinkawaniyan la tlan nakamakgtayayaw amakgapitsin. Komo ni nakgalhakgaxmataw, max kalipekua nawiliyaw kilatamatkan chu nachuna xlatamatkan lakgkgolotsin, lakchixkuwin tiku ni makgxtakgnankgo chu kalakgayawakanit nakinkakuentajtlawakgoyan (Heb. 13:17). Margaret wa: «Liwana kkatsi pi xlakata kkgalhakgaxmatli xtapulalitkan lakgkgolotsin chu xkachikin Jehová, lakgmaxtulh kilatamat».

13. ¿Tuku tlawakgo lhuwa kstalaninanin Cristo tiku makgxtakgkgonit niku xlamakgo xlakata chuntiya nakgalhikgo takaksni chu tapaxuwan?

¹³ Xlakata tuku masputunan, guerras o xlakata latalatlawakgo latamanin, lhuwa natalan tsalataxtukgonit niku xlamakgo. Xlakan tlawakgo tuku matlanikgo xlakata lakapala nalismanikgo niku chankgo chu tunkun liskujkgo tuku xla xtakanajlakan. Chu chuntiya “lichuwinankgo xtachuwin Dios anta niku chankgo”, chuna la tlawakgolh xapulana kstalaninanin Cristo akxni makgxtakgkgolh xchikkan xlakata taputsastalanit (Hech. 8:4). Akxni lichuwinankgo Dios kamakgtaya nalilakpuwankgo Tamapakgsin chu ni wa xtaʼakglhuwitkan, chu uma tlawa chuntiya nakgalhikgo tapaxuwan chu takaksni.

KGALHIYAW TAKAKSNI MASKI ANAN TAPUTSASTALANIT

14. ¿Tuku xlakata taputsastalanit tlawa pi nialh nakgalhiyaw takaksni?

¹⁴ Akxni kinkaputsastalanikanan lhuwa tuku makgatsankgayaw nema xkinkamaxkiyan takaksni chu tapaxuwan, chuna la tamakxtumit, la xlichuwinanaw Dios chu atanu tuku xtlawayaw xla kintakanajlakan nema ni xlipekuanaw nakinkatamaknukanan kpulachin. Akxni nialh kinkamaxkikanan talakaskin natlawayaw putum uma, max nalilakgaputsayaw tuku nakitaxtu alistalh. Ni talakgalhin chuna namakgkatsiyaw. Pero ni namastayaw talakaskin pi taputsastalanit namaxlajwani kintakanajlakan, chuna la Jesús kawanilh kstalaninanin (Juan 16:1, 2). Wa xlakata, ¿tuku tlan natlawayaw xlakata chuntiya nakgalhiyaw takaksni akxni kinkaputsastalanikanan?

15. ¿Tuku xlakata ni kilipekuanitkan taputsastalanit? (Juan 15:20; 16:33).

¹⁵ Xtachuwin Dios kinkawaniyan: «Putum tiku kakninaniputunkgo Dios kxlatamatkan chuna la kstalaninanin Cristo Jesús, na nakaputsastalanikan» (2 Tim. 3:12). Chatum tala tiku wanikan Andréi lu tuwa makgkatsilh nakanajla pi malakgachokgoka kintaskujutkan kpaís niku lama. Xla xlakpuwan: «Unu anan lhuwa xtatayananin Jehová; nila putum nakinkatamaknukanan kpulachin». Pero uma ni maxkilh takaksni. Wata ankgalhin lu xlilakgaputsa. Pero amakgapitsin natalan xlipawankgo Jehová chu ni xlakpuwankgo pi nikxni xʼamaka katamaknukan kpulachin. Xlakan xkatsikgo pi max chuna xʼama kakitaxtuni chu ni lu xlilakgaputsakgo chuna la Andréi. Wa xlakata, stalanilh xliʼakxilhtitkan umakgolh natalan chu xliputum xnaku lipawa Dios. Ni lhuwa kilhtamaku titaxtulh, kgalhilh takaksni chu la uku paxuwa maski kgalhi lhuwa taʼakglhuwit. Akinin nachuna tlan namakgkatsiyaw. Xlikana pi Jesús kinkawanin pi xʼamaka kinkaputsastalanikanan, pero na kinkawanin pi tlan ni xmakgxtakgwi Dios (kalikgalhtawakga Juan 15:20; 16:33).

16. ¿Tuku tastakyaw kilikgalhakgaxmatatkan akxni kinkaputsastalanikanan?

¹⁶ Akxni nialh namastakan talakaskin natlawayaw kintaskujutkan, max natalan xalak sucursal o lakgkgolotsin nakinkawanikgoyan tuku kilitlawatkan xlakata nakinkakuentajtlawakgoyan, xlakata chuntiya namakgamakglhtinanaw tuku xla kintakanajlakan chu tlan nalichuwinanaw Dios chuna la namatlaniyaw. Uma kilhtamaku, natalakaskin nakgalhakgaxmatnanaw maski ni putum naʼakgatekgsaw tuku nakinkawanikanan (Sant. 3:17). Chu ni nakalitachuwinanaw amakgapitsin xpalakatakan kinatalankan o tuku tlawayaw kcongregación (Ecl. 3:7).

17. Chuna la apóstoles, ¿tuku lakkaxwilinitaw natlawayaw?

¹⁷ Pulaktum tuku xlakata Satanás kaputsastalani xkachikin Dios, wa pi «kalakgayawakanit nalichuwinankgo Jesús» (Apoc. 12:17). Ni kamastaw talakaskin pi Satanás chu xkakilhtamaku nakinkamakgapekuanan. Akxni lichuwinanaw Dios chu masiyayaw xaxlikana maski kinkaputsastalanikanan, tlawa pi napaxuwayaw chu nakgalhiyaw takaksni. Kxapulana siglo, akxni mapakgsinanin judíos kawanikgolh apóstoles pi nialh xlichuwinankgolh xatlan tamakatsinin, xlakan ni makgxtakgkgolh Dios chu kgalhakgaxmatkgolh. Chuntiya lichuwinankgolh xatlan tamakatsinin chu uma lu kamakgapaxuwalh (Hech. 5:27-29, 41, 42). Xlikana pi akxni namalakgachokgokan kintaskujutkan, natalakaskin nalimasiyayaw liskgalala akxni nalichuwinanaw Dios (Mat. 10:16). Komo lu naliskujaw, nakgalhiyaw takaksni nema limin akxni makgapaxuwayaw Jehová chu akxni kalitachuwinanaw amakgapitsin tamakatsinin nema nakalakgmaxtu.

«DIOS TIKU KGALHI CHU MASTA TAKAKSNI, NAKASIKULUNATLAWAYAN»

18. ¿Tiku kinkamaxkiyan takaksni nema maklakaskinaw?

¹⁸ Liwana kilikatsitkan pi asta akxni titaxtumaw tuku lu tuwa, tlan nakgalhiyaw takaksni. Uma kilhtamaku, kilikatsitkan pi takaksni nema maklakaskinaw wa nema Dios masta, uma wamputun, takaksni nema kajwatiya Jehová tlan kinkamaxkiyan. Kalipawaw Jehová akxni anan akgtum pandemia, akxni kaj lakapala wi tuku la o akxni kinkaputsastalanikanan. Kalipawaw xkachikin Jehová chu kalilakpuwaw tasikulunalin nema namakglhtinanaw kkilhtamaku nema aku mima. Komo chuna natlawayaw, «Dios tiku kgalhi chu masta takaksni» ankgalhin nakinkamakgtayayan (Filip. 4:9). Kʼatanu artículo, nalichuwinanaw tuku tlan natlawayaw xlakata tlan nakamakgtayayaw kinatalankan nakgalhikgo takaksni nema Dios masta akxni titaxtukgo tuku tuwa.