Kakamakgtayaw tiku titaxtumakgo tuku tuwa

1. ¿La kakgalhti Jehová xʼoracioneskan kskujnin?

¿XKATSIYA wix pi Jehová tlan nalimaklakaskinan xlakata nakgalhti xʼoración chatum tala? Wix tlan namakgtayanana kaxatukawa taskujut lakgayat, max wix chatum kgolotsin, siervo ministerial, precursor, publicador, kgawasa, tiku lina kata, chixku o puskat. Akxni chatum tiku paxki Jehová tasaskini tamakgtay, kiDioskan tlan nakamaklakaskin lakgkgolotsin chu amakgapitsi kskujnin xlakata “tlan nakamamakgkatsini” natalan (Col. 4:11). Akgtum lanka talakgalhaman skujnaniyaw Jehová chu kamakgtayayaw kinatalankan. Tlan chuna natlawayaw akxni anan akgtum epidemia, akxni kaj lakapala wi tuku la o akxni kinkaputsastalanikanan.

AKXNI ANAN AKGTUM EPIDEMIA

2. ¿Tuku xlakata tuwa kitaxtu nakamakgtayayaw natalan akxni anan akgtum epidemia?

² Akxni anan akgtum epidemia max tuwa namakgkatsiyaw nalamakgtayayaw. Akgtum liʼakxilhtit, max akinin kalakgapaxialhnamputunaw natalan kxchikkan, pero max nila chuna katitlawaw. O max na kawaniputunaw pi kaminkgolh wayankgo kkinchikkan natalan tiku ni kaʼakchani xtuminkan, pero na nila chuna katitlawaw. Max lu kamakgtayaputunaw amakgapitsin, pero kifamiliajkan na tuwa tuku titaxtumakgolh. Maski chuna, kamakgtayaputunaw natalan chu Jehová lu makgapaxuwa akxni akxilha pi tlawayaw putum tuku matlaniyaw (Prov. 3:27; 19:17). Wa xlakata, ¿tuku tlan natlawayaw?

3. ¿Tuku kinkamasiyaniyan xliʼakxilhtitkan lakgkgolotsin xalak xcongregación Desi? (Jeremías 23:4).

³ Tuku tlan natlawakgo lakgkgolotsin. Komo wix chatum kgolotsin xalak congregación, liwana kakalakgapasti natalan (kalikgalhtawakga Jeremías 23:4). Desi, tiku lichuwinaw kʼartículo nema titaxtulh, wan: «Lakgkgolotsin tiku pulalinkgo grupo xlakata naklichuwinanaw Dios, xlismanikgonit lhuwa tuku xkinkatatlawakgoyan chu akxtum xkinkataʼankgoyan xlakata naklichuwinanaw Dios akit chu amakgapitsi natalan».b Xlakata tuku tlawakgolh, umakgolh lakgkgolotsin ni tuwa makgkatsikgolh namakgtayakgo Desi akxni tsukulh pandemia xla COVID-19 chu nikgolh makgapitsi tiku xalak xfamilia xlakata uma tajatat.

4. ¿Tuku xlakata lakgkgolotsin tlan makgtayakgolh Desi, chu tuku kinkamasiyaniyan?

⁴ Desi wan: «Lakgkgolotsin kiʼamigos xlitaxtukgo, wa xlakata ni tuwa kmakgkatsilh nakkawani tuku xakmakgkatsi chu tuku xaklilakgaputsa». ¿Tuku kamasiyani lakgkgolotsin uma? Kalimaxtutit kilhtamaku nakalakgapaxialhnanatit natalan chu xʼamigos nalitaxtuyatit akxni nina min tuku tuwa. Komo anan akgtum epidemia chu nila kalakgapaxialhnanatit kxchikkan, kalakputsatit la nakatachuwinanatit. Desi lakapastaka: «Lakgachunin, makgapitsi lakgkgolotsin xkintachuwinankgo kteléfono chu xkimalakgachanikgo mensajes watiya kilhtamaku. Textos nema xkimalakgachanikgo lu xlakgchan kinaku, maski makglhuwata xaklikgalhtawakganit».

5. ¿La nakatsikgo lakgkgolotsin tuku maklakaskinkgo natalan, chu la tlan nakamakgtayakgo?

⁵ Pulaktum la lakgkgolotsin tlan nakatsikgo tuku maklakaskinkgo natalan wa pi nakatlawanikgo takgalhskinin pero kuenta xlitlawatkan xlakata ni namakgtanukgo kxlatamatkan (Prov. 20:5). Max tlan nakakgalhskinkgo: ¿kgalhiya putum tuku maklakaskina xlakata liwat chu likuchun? ¿Namakgatsankgaya mintaskujut chu minchik xlakata ni kgalhiya tuku nalilakgaxokgoya? ¿Lakaskina nakkamakgtayayan xlakata nakaskiniya tamakgtay mapakgsinanin? Akxni Desi titaxtulh tuku tuwa, makgapitsi natalan limakgtayakgolh tuku xkgalhikgo. Pero tuku tlakg makgtayalh wa pi lakgkgolotsin tlan mamakgkatsinikgolh chu matliwakglhnikgolh xtakanajla. Xla wan: «Xlakan xkintatlawakgo oración. Ni liwana klakapastaka tachuwin nema xmaklakaskinkgo, pero klakapastaka la kimamakgkatsinikgolh. Xtachuna la komo Jehová xkiwanima “Ni miʼakstu wila”» (Is. 41:10, 13).

6. ¿La tlan nalamakgtayayaw kcongregación? (Kaʼakxilhti dibujos).

⁶ Tuku tlan natlawa congregación. Katsiyaw pi lakgkgolotsin wa tiku pulana kamakgtayakgo natalan. Pero Jehová kinkaskiniyan putum akinin pi kakamakgpuwantiniw chu kakamakgtayaw amakgapitsin (Gál. 6:10). Maski kaj aktsu tamaskiwin namaxkiyaw tiku tatatla, lu xlakaskinka naʼakxilha. Laktsu kamanan tlan natlawakgo maktum tarjeta o akgtum dibujo xlakata nalimakgpuwantinikgo chatum tala. Lakgkgawasan o laktsuman max tlan naʼankgo tamawananikgo chatum tala. Amakgapitsin tlan natlawakgo liwat chu nalinikgo kxchik tiku tatatla. Xlikana, akxni akgtum tajatat talakgatuminit, putum akinin maklakaskinaw pi kakinkamakgpuwantinikan. Wa xlakata max talakaskin natamakgxtakgaw akxni nasputa tamakxtumit xlakata nakatachuwinanaw natalan kPukgalhtawakga o kvideoconferencia. Chu lakgkgolotsin na maklakaskinkgo pi kakamakgpuwantinika. Makgapitsi natalan katsokgnanikgo aktsu carta xlakata nakapaxtikatsinikgo putum xtaskujutkan, xlakata akxni talakgatumi akgtum xalixkajni tajatat, lakgkgolotsin tlakg lhuwa taskujut kgalhikgo. Xlikana pi lu tlan nakitaxtu komo kimputumkan namakgantaxtiyaw uma tastakyaw xalak Biblia: «Chuntiya kalamatliwakglhtit chu kalamakgtayatit chatunu chatunu» (1 Tes. 5:11).

AKXNI KAJ LAKAPALA WI TUKU LA

7. ¿Tuku max nitlan kitaxtu akxni kaj lakapala wi tuku la?

⁷ Akxni kaj lakapala wi tuku la, tlan nalakgpalini putuminika xlatamat chatum lataman. Max namakgatsankga tuku kgalhi chuna la xchik o nani chatum tiku lu xpaxki. Chu uma nachuna titaxtukgo kinatalankan. ¿La tlan nakamakgtayayaw?

8. ¿Tuku xlitlawatkan lakgkgolotsin chu natlatni akxni nina min tuku masputunan?

⁸ Tuku tlan natlawakgo lakgkgolotsin. Lakgkgolotsin, kakamakgtayatit natalan xlakata nalakkaxwilikgo tuku namaklakaskinkgo akxni kaj lakapala wi tuku nala. Kakawanitit putum congregación tuku xlitlawatkan xlakata nitu nalanikgo akxni min tuku masputunan chu pi lu xlakaskinka tunkun nakatachuwinankgoyan. Margaret, tiku lichuwinaw kʼartículo nema titaxtulh, wan: «Kʼakgtum taʼakgchuwin xlakata tuku xlitlawat congregación, lakgkgolotsin kinkamalakapastakakgon pi chuntiya klhkunanama, chu pi komo mapakgsinanin xkinkawanikgon pi xaktaxtuw o komo kilatamatkan kalipekua xwi, tunkun xaktaxtuw». Uma taʼakgchuwin lu kamakgtayalh, xlakata akgkitsis semana alistalh lhkunanalh niku xlamakgo. Natlatni, akxni nakakninaniyatit Dios kfamilia, kalichuwinantit tuku tlan natlawayatit akxni min tuku masputunan. Komo wixin chu minkamanankan katsiyatit tuku natlawayatit akxni namin tuku masputunan, ni lu katililakgaputsatit.

9. ¿Tuku xlitlawatkan lakgkgolotsin akxni nina min chu akxni titaxtunita nawan tuku masputunan?

⁹ Komo wix superintendente de grupo, ni kakgalhkgalhi asta akxni namin tuku masputunan xlakata nakaskiniya xnumerojkan natalan. Katlawa akgtum lista chu kalakgpalitilha komo natalakaskin. Chuna, akxni nala tuku masputunan, tlan nakatachuwinana natalan chu nakatsiya tuku maklakaskinkgo. Kamaxki uma lista kgolotsin tiku kamakgtaya nalakkaxwilikgo xtaskujutkan amakgapitsi lakgkgolotsin chu xla natachuwinan superintendente de circuito. Akxni akxtum skujkan lu tlan tuku kitaxtu. Akxni klhkunanankgonita, ksuperintendente Margaret ni lhtatalh 36 horas xlakata xkawanima lakgkgolotsin tuku xlitlawatkan xwanit xlakata xkatekgskgolh 450 natalan tiku lakatum lakatum ankgolh akxni tsalataxtukgolh (2 Cor. 11:27). Xlakata chuna tlawakgolh, katekgsnika niku tlan xtamakgxtakgkgolh natalan.

10. ¿Tuku xlakata lu xlakaskinka pi lakgkgolotsin nakakuentajtlawakgo natalan? (Juan 21:15).

¹⁰ Lakgkgolotsin kalakgayawakanit nakamatliwakglhnikgo xtakanajlakan natalan chu tlan nakamamakgkatsinikgo (1 Ped. 5:2). Akxni la tuku masputunan, pulana kuenta xlitlawatkan pi chatunu chatunu natalan tlan wilakgo, kgalhikgo liwat, lhakgat chu niku natamakgxtakgkgo. Pero max natalakaskin pi akglhuwa papaʼ chuntiya nakamatliwakglhnikan xtakanajlakan chu tlan nakamamakgkatsinikan tiku titaxtukgolh tuku nitlan (kalikgalhtawakga Juan 21:15). Harold, tiku makgtapakgsi kComité de Sucursal chu katachuwinanit natalan tiku titaxtukgonit tuku masputunan, wan: «Lhuwa kilhtamaku titaxtu xlakata tlan namakgkatsiparakgo. Natalan max tsinu tsinu tlan tsukuparakgo makgkatsikgo, pero min kilhtamaku lakapastakparakgo tuku titaxtukgolh, max xlakata nilh chatum tiku lu xpaxkikgo, makgatsankgakgolh tuku lu xtapalh xʼakxilhkgo familia o xlakata lu kalipekua tawi xlatamatkan. Putum uma tlawa pi lu nalilipuwanparakgo. Pero uma ni wamputun pi ni tliwakga xtakanajlakan; xlakan lu tuwa tuku titaxtumakgo».

11. ¿Tuku tamakgtay namaklakaskinkgo familia?

¹¹ Lu xlakaskinka pi lakgkgolotsin nastalanikgo uma tastakyaw: «Kakatatasatit tiku tasamakgo» (Rom. 12:15). Tiku titaxtukgonit tuku masputunan maklakaskinkgo pi chuntiya nakamalakapastakakan pi Jehová chu xnatalan lu kapaxkikgo. Lakgkgolotsin tlan nakamakgtayakgo familias xlakata chuntiya namatliwakglhkgo xtakanajlakan, natlawakgo oración, nakgalhtawakgakgo, naʼankgo ktamakxtumit chu nalichuwinankgo Dios. Nachuna, tlan nakamakgpuwantinikgo natlatni nakamasiyanikgo xkamanankan pi akxni min tuku masputunan wi tuku nila lakxtlawa. Natlatni, kakamalakapastakatit minkamanankan pi Jehová ankgalhin xʼamigojkan nalitaxtu chu ankgalhin nakamakgtaya. Chu kakamasiyanitit pi natalan litaxtukgo akgtum lanka familia nema ankgalhin nakamakgtayakgo (1 Ped. 2:17).

12. ¿Tuku tlan natlawa congregación xlakata namakgtayanan akxni wi tuku masputunan? (Kaʼakxilhti dibujo).

¹² Tuku tlan natlawa congregación. Komo lalh tuku masputunan lakatsu niku wila, kakakgalhskinti lakgkgolotsin tuku tlan natlawaya xlakata namakgtayanana. Max tlan nakamakgamakglhtinana kminchik natalan tiku lakxlakgolh xchikkan o tiku namakgtayanankgo niku lalh tuku masputunan. Max na tlan nalimakgtayanana liwat o atanu tuku tamaklakaskin. Chu maski lakgamakgat lalh tuku masputunan, chuntiya tlan namakgtayanana. ¿La natlawaya? Natlawaya oración xpalakatakan tiku titaxtukgolh tuku tuwa chu xatapaxuwan nalimakgtayanana mintumin (2 Cor. 1:8-11; 8:2-5). Chu komo matlaniya napina niku wi tuku masputunalh, kakakgalhskinti lakgkgolotsin tuku natlawaya xlakata namakgtayanana. Komo nawanikana pi kapit, max namasiyanikana la tlawakan taskujut xlakata tlan namakgtayanana niku tlakg talakaskin.

AKXNI KINKAPUTSASTALANIKANAN

13. ¿Tuku lu tuwa titaxtukgo natalan tiku lamakgo niku malakgachokgokanit kintaskujutkan?

¹³ Taputsastalanit tlawa pi lu tuwa nawan xlatamatkan kinatalankan. Tiku lamakgo niku malakgachokgokanit kintaskujutkan, chuntiya titaxtumakgo tuku tuwa xlakata ni anan tumin, tatatlakgo chu makgatsankgakgonit tiku lu xkapaxkikgo. Xlakata malakgachokgokanit kintaskujutkan, lakgkgolotsin max nila kalakgapaxialhnankgo natalan tiku maklakaskimakgo tamakgtay xlakata nakamakgpuwantinikgo. Wa uma tuku titaxtulh Andréi, tiku lichuwinaw kʼartículo nema titaxtulh. Chatum tala puskat tiku makgtapakgsi kxgrupo xtitaxtuma tuku tuwa xlakata ni xkgalhi tumin chu alistalh lu nitlan tuku akgspulalh kxputlaw. Xlakata talakaskilh makglhuwa nachukukan, nila kskuja. Maski xmalakgachokgokanit kintaskujutkan chu xʼanan pandemia, natalan tlawakgolh putum tuku xmatlanikgo xlakata namakgtayakgo, chu Jehová ankgalhin xmaxkima tamakgtay nema xmaklakaskin.

14. ¿La limasiyakgo lakgkgolotsin pi lipawankgo Jehová?

¹⁴ Tuku tlan natlawakgo lakgkgolotsin. Andréi tlawanilh oración Jehová chu tlawalh tuku xmatlani. ¿Chu la kgalhtilh Jehová? Jehová kamaklakaskilh makgapitsi natalan xlakata xmakgtayakgolh uma tala puskat. Makgapitsi natalan xlinkgo kpumakuchin chu amakgapitsi xmaxkikgo tumin. Jehová sikulunatlawalh putum tuku tlawakgolh chu chuna la makxtum xwilakgo (Heb. 13:16). Lakgkgolotsin, akxni namalakgachokgokan kintaskujutkan, kakawanitit amakgapitsin pi tlan namakgtayanankgo (Jer. 36:5, 6). Pero tuku tlakg xlakaskinka, kalipawantit Jehová. Xla nakamakgtayayan xlakata nakamaxkiyatit natalan tuku maklakaskinkgo.

15. ¿Tuku kilitlawatkan xlakata makxtum natawilayaw akxni nakinkaputsastalanikanan?

¹⁵ Tuku tlan natlawa congregación. Akxni nakinkaputsastalanikanan, max natalakaskin klaktsu grupos natamakxtumiyaw. Wa xlakata la uku tlakg xlakaskinka pi ni nakatakgalhiyaw taʼakglhuwit amakgapitsin. Ni wa kakatalatlawaw natalan, wata wa Satanás. Kakatapatiw tuku nitlan tlawakgo kinatalankan chu tunkun kalakkaxtlawaw taʼakglhuwit (Prov. 19:11; Efes. 4:26). Akinin kalipulaw nakamakgtayayaw amakgapitsin (Tito 3:14). Xlakata xgrupo Andréi makgtayakgolh chatum tala, lu litamakgtayakgolh putum congregación. Tlakg makxtum tawilakgolh chuna la akgtum familia (Sal. 133:1).

16. Chuna la wan Colosenses 4:3, 18, ¿tuku tlan natlawayaw xpalakatakan natalan tiku kaputsastalanimaka?

¹⁶ Lhuwa kinatalankan skujnanimakgo Jehová maski mapakgsinanin ni kamaxkikgo talakaskin. Makgapitsi tanumakgo kpulachin xpalakata xtakanajlakan. Katlawaw oración xpalakatakan, xpalakata xfamiliajkan chu xpalakata putum tiku kalipekua wilikgo xlatamatkan xlakata nakamaxkikgo tuku maklakaskinkgo chu nakamatliwakglhnikgo xtakanajlakan (kalikgalhtawakga Colosenses 4:3, 18).c Nikxni kalakpuwaw pi kiʼoracioneskan ni makgtayanan (2 Tes. 3:1, 2; 1 Tim. 2:1, 2).

17. ¿Tuku tlan natlawayaw la uku xlakata tlan natayaniyaw taputsastalanit?

¹⁷ Wix chu mifamilia wi tuku tlan natlawayatit la uku xlakata tlan natayaniyatit taputsastalanit (Hech. 14:22). Ni wa kalilakpuwantit tuku max nitlan xkitaxtulh. Wata kamatliwakglhtit la talalipinatit Jehová chu kakamakgtayatit minkamanankan nachuna natlawakgo. Komo namin kilhtamaku wi tuku nalilakgaputsayatit, kalitachuwinantit Jehová (Sal. 62:7, 8). Akxtum kalichuwinantit tuku xlakata tlan nalipawanaw Jehová.d Chuna la xlilakaskinka nakamasiyanikan kamanan nakatsikgo tuku natlawakgo akxni wi tuku lakapala nala, na xlakaskinka nakamasiyanikan tuku natlawakgo akxni naʼanan taputsastalanit chu nakamasiyanikan la nalipawankgo Jehová. Chuna ni katipekuankgolh chu ni katilakgaputsakgolh.

18. ¿Tuku nialh makgas namakgamakglhtinanaw?

¹⁸ Takaksni nema Dios masta tlan kinkamamakgkatsiniyan (Filip. 4:6, 7). Jehová limaklakaskin uma takaksni xlakata tlan nakinkamamakgkatsiniyan akxni anan akgtum epidemia, akxni wi tuku kaj lakapala la chu akxni kinkaputsastalanikanan. Kamaklakaskin lakgkgolotsin, tiku kakuentajtlawakgo kskujnin, chu kinkamaxkiyan talakaskin nalamakgtayayaw kinchatunukan. Uma takaksni tlan nakinkamakgtayayan natayaniyaw tuku tlakg tuwa natitaxtuyaw kkilhtamaku nema aku mima, chuna la akxni «naʼanan lhuwa tapatin» (Mat. 24:21). Uma kilhtamaku, lu xlakaskinka nawan nitu nalilakgaputsayaw chu nakamakgtayayaw amakgapitsin nachuna natlawakgo. Pero akxni titaxtunita nawan lhuwa tapatin, nialh katiʼanalh tuku nakinkamalakgaputsiyan. Nalipaxuwayaw tuku Jehová ankgalhin xlakaskinit kimpalakatakan: nalipaxuwayaw takaksni nema nikxni katisputli chuna la Jehová xlakaskinit (Is. 26:3, 4).