¿Lakapastaka?
¿Likgalhtawakganitata xaʼawatiya artículos xla Makatsinina? Kaʼakxilhti komo tlan nakgalhtiya umakgolh takgalhskinin:
¿Tuku tlan nakitaxtu komo nalimaxtuyaw kilhtamaku natachuwinanaw, nakgaxmatniyaw chu nalilakpuwanaw Jehová?
Tlan tuku nalaksakaw, tlakg tlan makgalhtawakgenanin nawanaw, kintakanajlakan tlakg natatliwakglha chu tlakg napaxkiyaw Jehová (w22.01, páginas 30 chu 31).
¿Tuku xlakata lu xlakaskinka nalipawanaw Jehová chu tiku kalaksaknit nakinkapulalinkgoyan?
La uku tlakg talakaskin nalipawanaw chuna la Dios wi tuku laksaka natlawa. Chuna tlawayaw akxni lipawanaw tuku laksakkgo lakgkgolotsin chu kakgalhakgaxmataw akxni kinkawanikgoyan tuku kilitlawatkan. Akxni tsukunita nawan lhuwa tapatin, akinin tunkun nakgalhakgaxmatnanaw maski nakinkawanikanan katlawaw tuku ni liwana akgatekgsaw o tuku tuwa namakgkatsiyaw namakgantaxtiyaw (w22.02, páginas 4 asta 6).
¿Tuku xlakata chatum ángel wanilh Zacarías pi xʼama akxilha kxmakan mapakgsina Zorobabel akgtum plomada? (Zac. 4:8-10).
Tuku akxilhli Zacarías liwana kamakatsinilh xkachikin Dios pi templo nema xtlawamaka, xʼamaka tlawakgokan chu xʼama makgantaxti xtalakaskin Jehová (w22.03, páginas 16 chu 17).
¿Tuku tlan natlawayaw xlakata tlan liʼakxilhtit nalitaxtuyaw chuna la chuwinanaw? (1 Tim. 4:12).
Tlan kalikatsiw chu kalimasiyaw takaknin akxni lichuwinanaw Dios, xatapaxuwan kakilhtliw ktamakxtumit chu kalismaniw namastayaw kintakgalhtinkan, ni kaʼakgsaninaw, kakamakgpuwantiniw amakgapitsin chu kalakgmakgaw tachuwin nema tlawaninan tuku nitlan (w22.04, páginas 6 asta 9).
¿Tuku xlakata lapanit nema talichuwinan kʼApocalipsis 13:1, 2 tatalakxtumi tantati lapanit (mapakgsinanin) nema lichuwinan capítulo 7 xla Daniel?
Lapanit nema lichuwinan Apocalipsis 13 ni kaj chatum mapakgsina kilhchanima, chuna la Roma. Wata kakilhchanima putum mapakgsinanin tiku kamapakgsinit latamanin (w22.05, página 9).
¿La tlan nalimasiyayaw pi lipawanaw pi Jehová natlawa tuku xaʼakgstitum?
Komo wi tiku kinkatlawanin o kinkawanin tuku nitlan, kaliskujwi nalakgmakganaw tasitsi chu kilimastatkan talakaskin pi wa Jehová nalakkaxtlawa taʼakglhuwit. Xla nalakkaxtlawa putum tuku nitlan tlawanit talakgalhin (w22.06, páginas 10 chu 11).
¿Tuku kuenta xlitlawat chatum tala akxni tlawa oración ktamakxtumit?
Oraciones ni limaklakaskinkan xlakata nakastakyawakan natalan o xlakata namastakan akgtum tamakatsinin. Ni «lhuwa tachuwin» xliwanat, liwaka komo aku tsukuma tamakxtumit (Mat. 6:7) (w22.07, página 24 chu 25).
¿Tuku kilhchanima pi «tiku tlawakgolh tuku nitlan nakamalakastakwanikan xlakata nakalakputsananikan»? (Juan 5:29).
Xlakan ni katikamalakgaxokgeka xlakata tuku tlawakgolh akxni nina xnikgo. Wata naʼakxilhkan la nalikatsikgo chu tuku natlawakgo akxni kamalakastakwanikanita nawan (w22.09, página 18).
¿Tuku lu tlan tamakatsinin mastalh tala Joseph Rutherford kʼakgtum asamblea nema tatlawalh septiembre kata 1922?
Kʼakgtum asamblea xalak Cedar Point (Ohio, Estados Unidos), wa: «¡Kaʼakxilhtit, Mapakgsina mapakgsinamaja! Wixin tiku namakatsininanatit. Wa xlakata, kalichuwinantit, kalichuwinantit, kalichuwinantit Mapakgsina chu xTamapakgsin» (w22.10, páginas 3 asta 5).
Chuna la wan Isaías capítulo 30, ¿tuku pulaktutu kinkalimakgtayayan Dios xlakata tlan natayaniyaw?
Uma capítulo masiya pi Jehová 1) kgaxmata kiʼoracioneskan chu kinkakgalhtiyan, 2) kinkapulalinan chu 3) kinkasikulunatlawayan la uku chu na nakinkasikulunatlawayan kkilhtamaku nema aku mima (w22.11, página 8).
¿Tuku xlakata kanajlayaw pi tuku wan Salmo 37:10, 11, 29 kgantaxtulh makgasa chu na nakgantaxtu kkilhtamaku nema aku mima?
Tuku wa David liwana xmasiya la xʼanan takaksni kʼIsrael kxtamapakgsin Salomón. Akxni xlichuwinama Paraíso nema aku namin, Jesús lichuwinalh versículo 11 (Mat. 5:5; Luc. 23:43) (w22.12, páginas 8 asta 10, chu 14).