3 | Tuku titaxtukgolh tiku kalichuwinankan kBiblia

BIBLIA KALICHUWINAN: Makgapitsi latamanin tiku tlan xlikatsikgo chu “na xmakgkatsikgo chuna la akinin” (SANTIAGO 5:17).

¿Tuku kilhchanima?

Biblia kalichuwinan lhuwa lakchixkuwin chu lakpuskatin tiku xlikana latamakgolh chu tanu tanu tuku xmakgkatsikgo. Komo nalikgalhtawakgayaw tuku titaxtukgolh, max naʼakxilhaw pi wi tiku nachuna titaxtulh tuku akinin titaxtumaw o tuku makgkatsimaw.

¿La kinkamakgtayayan?

Kimputumkan lakaskinaw pi wi tiku kakinkaʼakgatekgsnin, liwaka akxni kgalhiyaw akgtum tajatat xla talipuwan chu xla talakgaputsit. Max akxni nalikgalhtawakgayaw tuku xmakgkatsikgo chu tuku xlakpuwankgo tiku kalichuwinankan kBiblia, naʼakxilhaw pi na titaxtukgolh tuku akinin titaxtumaw. Uma tlan nakinkamakgtayayan naʼakxilhaw pi ni kajwatiya akinin lakgaputsayaw, lu lipuwanaw chu nitlan makgkatsiyaw.

Biblia lichuwinan tuku wankgolh makgapitsin lakchixkuwin tiku nialh xkatsikgo tuku natlawakgo chu xmakgkatsikgo pi nialh xkgalhikgo litliwakga. ¿Minit kilhtamaku lakpuwanita: «Nialh ktayani, nialh klatamaputun»? Wa uma tuku lakpuwankgolh Moisés, Elías chu David (Números 11:14; 1 Reyes 19:4; Salmo 55:4).
Biblia kinkalitachuwinanan Ana, chatum puskat tiku lu xlilakgaputsa xlakata nila xkgalhi kamanan, chu atanu xpuskat xchixku, lu xlikgalhkgamanan (1 Samuel 1:6, 10).
Max makgkatsiya chuna la Job, chatum chixku tiku lichuwinankan kBiblia. Maski xkgalhi takanajla, milh kilhtamaku lu nitlan xmakgkatsima chu asta wa: «Kxkajni kilatamat, nialh klatamaputun» (Job 7:16).

Putum umakgolh latamanin lakgpalikgolh tuku nitlan xlakpuwankgo. Akinin na tlan chuna natlawayaw komo nastalaniyaw xliʼakxilhtitkan.

Biblia makgtaya Kevin

Tuku nitlan kintlawani tajatat nema wanikan trastorno bipolar

«Akxni xakkgalhi liwakaya 40 kata, makuchinanin kiwanikgolh pi xakkgalhi akgtum tajatat nema xtlawa pi kaj lakapala xtalakgpalilh tuku xakmakgkatsi. Puntsu tlan xakwi chu kaj xalan lu xaktsuku lipuwan. Min kilhtamaku lu tlan kmakgkatsi chu klakpuwan pi tlan naktlawa putum tuku klakaskin, pero min kilhtamaku lu nitlan kmakgkatsi chu nialh klatamaputun».

Biblia lu kimakgtaya

«Kmakgkatsi chuna la apóstol Pedro. Milh kilhtamaku xla nitlan xlimakgkatsi tuku nitlan xtlawanit. Pero ni kajwatiya lilakpuwantawi uma, wata putsalh xtamakgtaykan xʼamigos tiku xlilakgaputsakgo. Xlakata kintajatat, min kilhtamaku lu nitlan kmakgkatsi. Akxni chuna kiʼakgspula, kajwatiya ktsuku akxilha tuku nitlan ktlawa, chu wa xlakata klakpuwan pi nitu klitaxtu. Pero chuna la Pedro, kputsa xtamakgtaykan kiʼamigos. Xlakan kimatliwakglhkgo chu kimakgtayakgo chuntiya naktayani.

»Na klilakpuwan la xmakgkatsi mapakgsina David. Xla lu xlilipuwan tuku xtitaxtuma chu nitlan xlimakgkatsi tuku nitlan xtlawanit. Min kilhtamaku akit nachuna kmakgkatsi: nitlan klimakgkatsi tuku kwan o tuku ktlawa. Pero lu tlan kimamakgkatsini akxni klikgalhtawakga tuku tsokgwililh David anta kSalmo 51. Anta kversículo 3, xla wa: “Liwana kkatsi tuku nitlan ktlawanit chu kintalakgalhin putum kilhtamaku wi kkilakatin”. Wa uma tuku kmakgkatsi akxni lu klipuwan, kajwatiya klilakpuwan tuku nitlan ktlawanit. Pero uma kilhtamaku klilakpuwan xtachuwin David nema min kversículo 10: “Kimaxki akgtum xasasti naku, oh, Dios, chu kamasasti kintapuwan, tliwakglh kawili kintapuwan”. Na wa uma tuku kskini Dios: pi kakimakgtayalh nialh lu wa naklilakpuwan tuku nitlan ktlawa. Chu versículo 17 na lu tlan kimamakgkatsini. Anta wan: “Oh, Dios, wix ni katilakgmakganti akgtum naku nema lu lipuwama chu nitlan makgkatsima”. Akxni klikgalhtawakga, klakapastaka pi Jehová lu kimpaxki.

»Akxni klilakpuwan tiku kalichuwinankan kBiblia chu putum tuku Dios tlawanit kimpalakata, lu kimatliwakglha. Kimakgtaya chuntiya naktayani xlakata liwana kkatsi pi xtamalaknun Dios xlikana nakgantaxtu».