Jehová lhuwa tuku kinkalimakgapaxuwanitan chu lhuwa tuku kinkamasiyaninitan

Kinatlatni makgxtakgkgolh Estonia akxni xlama xliʼAkgtiy Guerra kxLikalanka Katiyatni chu ankgolh latamakgo kʼAlemania, niku klakachilh. Alistalh kkaw latamayaw kCanadá. Kinchikkan lakatsu xwi kʼOttawa. Xakwilaw kʼakgtum aktsu chiki anta niku na xwilakgolh lhuwa xtilan. Ni xakkgalhiyaw tumin, pero xʼanan lhuwa kgalhwat xlakata xakliwayaw.

Akgtum kilhtamaku, xtatayananin Jehová likgalhtawakganikgolh kintse tuku wan Apocalipsis 21:3, 4. Uma lakgchalh xnaku chu asta tsukulh tasa. Kintse chu kintlat tsukukgolh likgalhtawakgakgo Biblia, chu ni makgas titaxtulh, tamunukgolh.

Maski kinatlatni ni lu xkatsinikgo chuwinankgo inglés, lu xlakaskinka xliʼakxilhkgo naskujnanikgo Jehová. Maski kintlat tantaskaka kskuja niku xmalakgstalankikan níquel kSudbury (Ontario), akgatunu sábado xkinkalinan akit chu xaʼaktsu kintala, Sylvia, xlakata xakkaw lichuwinanaw Dios. Chu akgatunu semana, akxtum xaklikgalhtawakgayaw Makatsinina. Kinatlatni kimakgtayakgolh lu nakpaxki Dios, chu uma kimakgtayalh xlakata kkata 1956 xaktamakamastanilh Jehová chu xaktamunulh, akxni xakkgalhi 10 kata. Xlakata kakxilhnit la kinatlatni lu paxkikgo Jehová, kimakgpuwantininit na nakskujnani xliputum kilatamat.

Akxni ktaxtulh ksecundaria, nialh lu xlakaskinka xakakxilha nakskujnani Jehová. Xaklakpuwan pi komo precursor xaklitaxtulh, nikxnila xakkama mastokga tumin xlakata xakmakgantaxtilh tuku xaklakpuwanit akxni aktsujku xakwanit, pi xakkamputun kʼavión chu xaklakgapasnamputun lhuwa kkachikinin. Ktsukulh skuja kʼakgtum estación de radio niku xakwili tatlakgni, chu lu xaklakgati. Pero xlakata kakgotanun xaktanu chu asta katsisni xaktaxtu, nialhla xakkan ktamakxtumit. Nachuna, lhuwa kilhtamaku xakkatatawila tiku ni xpaxkikgo Dios. Pero alistalh, tuku xakkatsininit xlakata Biblia kimakgpuwantinilh naklakgpali tuku xaktlawama.

Kkalh latama kʼOshawa (Ontario). Anta kkalakgapasli Ray Norman chu xtala, Lesli, chu amakgapitsi precursores. Xputumkan lu tlan kimakgamakglhtinankgolh. Akxni kakxilhli pi xlakan lu xpaxuwakgo, kimalakpuwanilh tuku xaktlawaputun kkilatamat. Kimakgpuwantinikgolh precursor naklitaxtu. Chu kmatsukilh precursorado septiembre kkata 1966. Akit lu xaklipaxuwa kilatamat. Pero lhuwaku tuku xakkama lipaxuwa nema nikxni xaklakpuwanit.

KOMO JEHOVÁ NAWANIYAN PI WI TUKU KATLAWA, KALITSAKGSA

Akxni xakkanku ksecundaria, kmalakgatsamalh solicitud xlakata xakkalh kskuja kBetel xalak Toronto (Canadá). Chu alistalh, akxni precursor xaklitaxtu, kiwanika pi xakkalh skuja kBetel akgtati kata. Pero lu xaklakgati Lesli chu xaklakpuwan pi komo xakkalh kBetel, nialhla xakkama akxilha. Ktlawalh lhuwa oración chu kkalh kBetel. Pero lu klilipuwa akxni kwanilh Lesli pi xakkama.

Anta kBetel, kskujli klavandería chu alistalh chuna la secretario. Watiya uma kilhtamaku, Lesli precursora especial litaxtulh chu malakgachaka kʼGatineau (Quebec). Makglhuwa xaklilakpuwan tuku xtlawama chu xaklilakpuwan komo tlan tuku xaklaksaknit. Pero uma kilhtamaku lalh tuku lu kimakgapaxuwalh: Ray, xtala Lesli, invitarlika kBetel, chu kinkawilikan kwatiya cuarto. Chuna ktsukupa tachuwinan Lesli. Ktamakgaxtokgwi 27 xla febrero kata 1971, akxni sputli akgtati kata nema xkiʼinvitarlikanit kBetel.

Kinkamalakgachakan kʼakgtum congregación xalak Quebec ktachuwin francés. Titaxtulh makgapitsi kata, kiʼinvitarlika xlakata xakskujli chuna la superintendente de circuito. Xakmakgkatsi pi lu kgawasaku xakwanit chu nitu xakkatsi, xlakata kajku 28 kata xakkgalhi. Pero lu kimakgpuwantinilh tuku wan Jeremías 1:7, 8. Maski chuna, xaklilakgaputsa komo tlan xakkamaw makgantaxtiyaw uma taskujut xlakata Lesli makglhuwa xchocarlanit akxni xʼan kputlaw chu wa xlakata xmin kilhtamaku nila klhtata. Pero xla kiwanilh: «Komo Jehová kinkawaniman pi wi tuku katlawaw, ¿ni xlilat nalitsakgsayaw maski ni katsiyaw la nakinkakitaxtuniyan?». Wa xlakata kmakgamakglhtinaw uma taskujut chu akgkutujun kata kliskujli chuna la superintendente de circuito.

Xlakata superintendente de circuito xaklitaxtu, lu lhuwa tuku kilitlawat xwanit chu ni xkiʼakchani kilhtamaku xlakata akxtum naktatawila Lesli. Xtalakaskin wi tuku xaklakgpalilh. Akgtum kilhtamaku, lunes xwanit, lu tsisa tlakgka kimalakcha. Akxni kmalakkilh, niti xya, pero xwilikanit akgtum canasta niku xtajuma maktum mantel, fruta, queso, kaxtalanchu, vino, copas chu maktum kapsnat niku xwan: «Kapit tapaxialhnana mimpuskat». Uma kilhtamaku lu kawan xwanit. Pero kililakkaxwilit xwanit makgapitsi taʼakgchuwin, wa xlakata kwanilh Lesli pi nila xakkamaw anaw. Xla kiʼakgatekgsnilh, pero tsinu lilipuwa. Akxni ktsukulh lakkaxwili kintaʼakgchuwin, nitlan ktsukulh limakgkatsi. Chu klakapastakli tuku wan Efesios 5:25, 28. Max wa Jehová tiku xkimalakapastaknima pi kilikuentajtlawat xwanit tuku xmaklakaskin kimpuskat. Ktlawalh akgtum oración, chu alistalh kwanilh Lesli: «Kaʼaw». Xla lu paxuwalh. Kkaw kxkilhtun kgalhtuchokgo, kmamiw mantel… chu lu klipaxuwaw uma kilhtamaku. ¡Chu asta kkgalhilh kilhtamaku naklakkaxwili kintaʼakgchuwin!

Lhuwa congregaciones xakkalakgapaxialhnanaw, lata kColumbia Británica asta kTerranova, chu lu xakpaxuwayaw akxni xakkanaw. ¡Tuku xaklakpuwanit akxni aktsujku xakwanit xkgantaxtuma! Milh kilhtamaku na klakpuwa nakkan kʼEscuela de Galaad, pero ni xakkamputun chuna la misionero kʼatanu país. Xaklakpuwan pi akit nila misionero xaklitaxtulh. Nachuna, lu xakpekuan chu ni xaklakaskin pi xkimalakgachaka kʼakgtum país xalak África, niku anan tajatat chu guerra. Akit lu xakpaxuwa kCanadá.

KKAW MAKGTAYANANAW KʼESTONIA CHU KMAKGAPITSI PAÍSES BÁLTICOS

Kkata 1992 mastaparaka talakaskin pi xlichuwinanka Dios kmakgapitsi países nema xmakgtapakgsikgo kʼUnión Soviética. Wa xlakata kinkakgalhskinkan komo xakkamputunaw makgtayananaw kʼEstonia chuna la misioneros. Xlakata nikxni xaklakpuwanitaw nakkanaw anta, ktlawaniw oración Jehová. Chu amakgtum klakpuwaw: «Komo Jehová kinkawaniman pi wi tuku katlawaw, ¿ni xlilat nalitsakgsayaw?». Kmakgamakglhtinaw uma invitación, chu klakapastaka pi klakpuwa: «Lu tlan pi ni kʼÁfrica kinkamalakgachamakan».

Tunkun ktsukuw katsiniyaw estonio. Akxni nina akglhuwa papaʼ xakwilaw kʼuma país, kiwanika pi xakliskujli la superintendente de circuito. Xkinkalakgchanan nakkalakgapaxialhnanaw 46 congregaciones chu lhuwa grupos klakatutu países bálticos (Estonia, Letonia chu Lituania) chu nachuna kKaliningrado (Rusia). Wa xlakata xtalakaskin xakkatsiniw letón, lituano chu ruso. Akinin tuwa kmakgkatsiw. Pero natalan xkinkawanikgoyan pi tlan taskujut xaktlawayaw chu lu kinkamakgtayakgon. Kkata 1999 tlawaka akgtum sucursal kʼEstonia chu kiwanika pi xakkama makgtapakgsi kComité de sucursal chu xakkama kataskuja Toomas Edur, Lembit Reile chu Tommi Kauko.

Kkalakgapaswi lhuwa natalan tiku xkachilinkanit kSiberia. Maski lu nitlan tuku xtitaxtukgonit kpulachin chu pi makgat xwilanikgolh xfamiliajkan, chuntiya lu xpaxuwakgo. Ankgalhin xatapaxuwan kskujnanimakgo Jehová. Uma kinkamasiyanin pi tlan xakpaxuwaw maski xaktitaxtuw tuku tuwa.

Chuna la xtitaxtu kata, lhuwa taskujut xakkgalhiyaw chu ni lu xakjaxaw, wa xlakata Lesli tsukulh makgkatsi pi lu xtlakgwan. Uma kilhtamaku ni xakkatsiyaw pi chuna xmakgkatsi xlakata xkgalhi akgtum tajatat nema wanikan fibromialgia. Wa xlakata xaklakpuwamaw naktaspitaw kCanadá. Chu akxni kinkawanikan pi xakkaw kPatterson (Nueva York) kʼEscuela niku ankgo Tiku Pulalinkgo Betel, klakpuwa pi nila xakkamaw anaw. Pero lhuwa ktlawaw oración, chu kmakgamakglhtinaw invitación. Jehová sikulunatlawalh tuku klaksakwi. Akxni kkilaw kʼuma escuela, Lesli kilalh kmakuchina chu maxkika likuchun nema xmaklakaskin. Putum uma kinkamaxkin talakaskin xaktaspitwi niku xakmakgtayanamaw.

KINKAMALAKGACHAKANAN KʼATANU CONTINENTE

Klakapastaka pi kkata 2008, akxni katsisni xwanit chu xaktaspitnitawa kʼEstonia, kintachuwinanka lata niku pulalinkan kintaskujutkan chu kinkgalhskinka komo tlan xakkaw makgtayananaw kRepública Democrática del Congo. Lu kaks klilakawa, liwaka xlakata lichali xlakaskinkan pi xakkawaniw tuku xaklaksaknitaw. Nitu kwanilh Lesli xlakata tlan klhtatalh. Pero akit tantaskaka nila klhtatalh chu kwanilh Jehová tuku xlakata ni xakkamputun kʼÁfrica.

Lichali, akxni kwanilh Lesli, klawaniw: «Jehová kinkawaniman pi kaʼaw kʼÁfrica. ¿La nalikatsiyaw pi nila katimakgantaxtiw uma taskujut chu nila nalipaxuwayaw komo ni nalitsakgsayaw?». Wa xlakata, maski 16 kata la xaklamaw kʼEstonia, kkaw kKinsasa, xcapital Congo. Ksucursal xʼanan akgtum lu stlan jardín chu lu tlan xtamakgkatsi tawilakan anta. Xapulana tuku Lesli wililh kkincuartojkan wa maktum tarjeta nema xmakinit lata ktaxtuw kCanadá. Anta xwan: «Kaxanajti niku nachankana». Chuna la kkalakgapastilhaw natalan, klimakgalhtawakgenaw Biblia chu tuku tlan xkinkakitaxtuniyan xlakata misioneros xakwanitaw, kakxilhwi pi kʼuma kachikin lhuwa tuku xakkamaw lipaxuwayaw. Chu alh kilhtamaku, kinkamaxkikan akgtum lanka talakgalhaman: nakkalakgapaxialhnanaw sucursales xalak 13 países xalak África. Uma kinkamaxkin talakaskin nakakxilhaw tuku lu xalilakgatit xʼanan kʼumakgolh kachikinin. Tapekua nema xakkgalhi xapulana lakgsputli, chu lu kpaxtikatsiniw Jehová xlakata kinkamalakgachan kʼÁfrica.

Anta kCongo-Kinsasa kinkamaxkikan liwat nema nikxni klakpuwaw pi xakkamaw wayaw. Pero akxni kakxilhwi pi natalan lu xlakgatikgo, na kkgalhwanaw chu na lu klakgatiw.

Kkgalhiw talakgalhaman nakkaliniyaw tuku xmaklakaskinkgo chu nakkamatliwakglhniyaw xtakanajlakan natalan tiku xlamakgo niku xʼanankgo tiku nitlan xlikatsikgo chu xkatlawanikgo tuku nitlan lakpuskatin chu laktsu kamanan. Natalan xala anta ni xkgalhikgo tumin. Pero lu kaks xkinkamalakawaniyan pi lu xkanajlakgo pi naʼanan talakastakwanat, lu xpaxkikgo Jehová chu ni xmakgxtakgkgo xkachikin. Xliʼakxilhtitkan kinkamakgpuwantinin xaklilakpuwaw tuku xlakata xakskujnanimaw Jehová chu kinkamakgpuwantinin xakmatliwakglhwi kintakanajlakan. Makgapitsi kinatalankan xmakgatsankgakgonit xchikkan chu xtachanankan. Uma kimasiyanilh pi tuku lhuwa xtapalh kgalhikan tlan lakapala nalakgsputa chu pi tuku tlakg xlakaskinka wa la talalinaw Jehová. Maski natalan lhuwa tuku tuwa xtitaxtukgo, ni xlilipuwankgo. Xtayatkan kinkamakgpuwantinin ni xakpekuaw chu xaktayaniw maski tuwa tuku xaktitaxtuw chu maski xaktatatlaw.

KINKAMALAKGACHAKANAN KʼASIA

Kaj xalan kinkawanikan pi xakkaw ksucursal xalak Hong Kong. Nikxni klakpuwaw pi xakkamaw latamayaw kʼAsia. Pero xlakata Jehová xkinkalimasiyaninitan xtapaxkit kkachikinin nema xkinkamalakgachakanitana, la uku tunkun kmakglhtinaw uma xasasti taskujut. Maski lu klilipuwaw, kkata 2013 kkamakgxtakgwi kiʼamigoskan chu putum tuku lu xaklakgatiyaw kʼÁfrica, maski ni xakkatsiyaw la xʼama kinkakitaxtuniyan.

Lu tuwa kmakgkatsiw naksmaniyaw kʼHong Kong, xlakata akgtum lanka kachikin xwanit chu xlamakgo latamanin tiku xalak tanu tanu kachikinin xwankgonit, na lu tuwa kmakgkatsiw nakkatsiniyaw chino cantonés. Natalan lu tlan kinkamakgamakglhtinankgon chu lu klakgatiw liwat nema anan anta. Lu lhuwa taskujut xʼanan ksucursal, pero xlakata lu xtapalaxlanama, Lakgkgolotsin tiku Pulalinankgo lakkaxwilikgolh nastakgo edificios niku xwi sucursal chu naʼankgo alakatanu. Ni makgas, kkata 2015, Lesli chu akit kinkamalakgachakan kCorea del Sur, chu asta la uku chuntiya anta kmakgtayanamaw. Lu tuwa kmakgkatsiyaw nakkatsiniyaw coreano. Pero lu kinkamakgpuwantiniyan akxni natalan kinkawanikgoyan pi tlakg kinkaʼakgatekgsnikgoyan, maski kkatsiyaw pi lhuwaku kinkatsankganiyan.

TUKU KKATSININITAW

Minit kilhtamaku tuwa kmakgkatsinitaw nakkgalhiyaw xasasti amigos. Pero kakxilhnitaw pi komo akinin pulana nakkatalakatsuwiniyaw amakgapitsin chu tlan nakkamakgamakglhtinanaw, tlakg ni tuwa kmakgkatsiyaw nakkalakgapasaw. Natalan tanu tanu la tasiyakgo, pero xputumkan tlan likatsikgo. Na kakxilhnitaw pi Jehová kinkatlawanitan xlakata tlan napaxkinanaw chu nakgalhiyaw xasasti amigos (2 Cor. 6:11).

Kkatsininitaw pi talakaskin nakkamakgamakglhtinanaw latamanin chuna la Jehová kamakgamakglhtinan chu nakliskujaw xlakata nakakxilhaw tuku limasiya pi kinkapaxkiyan chu kinkapulalinan. Akxni xaktaxlajwaniyaw chu xaklilakpuwanaw komo amakgapitsin tlan xʼamakgo kinkatalalinkgoyan o ni, xaklikgalhtawakgayaw tarjetas chu cartas nema xkinkamaxkikgonitan kiʼamigoskan. Liwana kakxilhnitaw pi Jehová xkgalhti kiʼoracioneskan chu xkinkamaxkiyan litliwakga chu tamakgtay nema xakmaklakaskinaw.

Chuna la titaxtunit kata, Lesli chu akit kakxilhnitaw pi maski lhuwa taskujut kkgalhiyaw, lu xlakaskinka naklalimaxtuniyaw kilhtamaku xlakata akxtum naktawilayaw. Na kakxilhnitaw pi lu xlakaskinka ni naksitsiyaw akxni nitlan kinkakitaxtuniyan akxni kkatsinimaw xasasti tachuwin. Putum katsisni klilakpuwanaw pulaktum tuku lu klakgatiw chu kpaxtikatsiniyaw Jehová xlakata uma.

Nikxni klakpuwa pi misionero xakkama litaxtu o xakama latama k’alakatanu países. Pero kakxilhnit pi xlakata xtamakgtay Jehová putum matlanikan, chu uma lu kimakgapaxuwa. Klakpuwan chuna la palakachuwina Jeremías, tiku wa: «Kiʼakgskgawinita, oh, Jehová» (Jer. 20:7). Chuna, Jehová kinkalisikulanatlawanitan tuku lu tlan chu tuku nikxni xaklakpuwanitaw. ¡Asta kmakgantaxtinit tuku xaklakpuwanit akxni aktsujku xakwanit! Ktawakanit k’avión chu asta klakalhuwa países klakgapasnanit nixawa la xaklakpuwanit akxni aktsujku xakwanit. Kkalakgapaxialhnanitaw sucursales k’akgkitsis continentes. Lu kpaxtikatsini Lesli xlakata ankgalhin xatapaxuwan kimakgtayanit nakmakgantaxti uma taskujut.

Ankgalhin klakapastakaw pi ktlawamaw putum uma xlakata kpaxkiyaw Jehová. Tasikulunalin nema kkgalhiyaw la uku, ni tatalakxtumi tasikulunalin nema nakmakglhtinanaw akxni nakinkamaxkikanan latamat nema ni kgalhi xlisputni, akxni Jehová namalaki xmakan chu nakamaxki tuku maklakaskinkgo putum latamanin (Sal. 145:16).