Lanka Makgalhtawakgena lhuwa tuku kimasiyaninit

TUKU KIMASIYANIKGOLH KINATLATNI

Kkata 1957, kinatlatni taxtukgolh kʼItalia chu ankgolh kCanadá, kʼakgtum aktsu kachikin nema wanikan Kindersley, nema makgtapakgsi kSaskatchewan. Anta klakgapaswi xaxlikana chu wa tuku tlakg xlakaskinka ktsukuw akxilhaw. Klakapastaka pi akxni aktsujku xakwanit, lhuwa hora xakkan kkatalichuwinan Dios kifamilia. Wa xlakata xatakgalhkgaman kkawani amakgapitsin natalan pi lata xakkgalhi akgtsayan kata precursor auxiliar xaklitaxtuya.

Kinatlatni ni lhuwa tumin xkgalhikgo, pero akxni wi tuku xlitlawatkan xwanit xlakata tlakg kskujnanikgolh Jehová, ni makgtiy xlilakpuwankgo. Klakapastaka tuku tlawakgolh akxni tlawaka akgtum asamblea internacional kPasadena (California, Estados Unidos) kkata 1963. Xlakata kinatlatni xʼamputunkgo, lhuwa tuku stakgolh nema xkgalhikgo xlakata xmastokgkgolh xtuminkan. Kkata 1972, kkaw latamayaw kTrail xlakata xakkalitachuwinaw Dios tiku xchuwinankgo italiano. Uma kachikin tapakgsini Columbia Británica (Canadá) chu xwi 1,000 kilómetros xlimakgat lata niku xaklamaw. Kintlat xmakgskuja kʼakgtum lanka pustan niku xkaxaka. Chu maski makglhuwa malaknunika tlakg xlakaskinka taskujut chu tlakg lhuwa kxokgonika, ni makglhtinalh xlakata ni xlakaskin pi wi tuku xmalaktlawilh chuna la kskujnanima Jehová.

Lu kkapaxtikatsini kinatlatni xlakata lu tlan liʼakxilhtit kinkawilinikgon akit chu kinatalan. Na lu kimakgtayakgolh xlakata na xakskujnaniputulh Jehová. Chu kimasiyanikgolh pi komo wa pulana nakwili xTamapakgsin Jehová, xla ankgalhin nakinkuentajtlawa (Mat. 6:33).

KTSUKULH SKUJNI JEHOVÁ PUTUM KILHTAMAKU

Kkata 1980, ktatamakgaxtokgli Debbie. Kinchatiykan xakskujnaniputunaw Jehová putum kilhtamaku, wa xlakata akxni kajku akgtutu papaʼ xtitaxtunit lata xaktamakgaxtokgnitaw, Debbie precursora litaxtulh. Akgtum kata alistalh lata ktamakgaxtokgwi, kkaw makgtayananaw kʼakgtum congregación niku tlakg xtalakaskin tamakgtay, chu akit na precursor klitaxtulh.

Milh kilhtamaku ktaxlajwaniw chu xakmakgxtakgputunaw uma congregación. Pero pulana ktachuwinaw superintendente de circuito, tiku xatalakgalhaman kinkastakyawan chu liwana kinkawanin: «Max wixin na lipinatit kuenta. Kajwatiya akxilhpatit tuku nitlan kakitaxtuniman. Komo wa naputsayatit tuku tlan anan kmincongregacionkan, natekgsatit». Wa uma tuku xakmaklakaskimaw (Sal. 141:5). Tunkun ktlawaw tuku kinkawanin, chu ktsukuw akxilhaw pi kcongregación lhuwa tuku tlan xʼanan. Lhuwa natalan chuna la laktsu kamanan chu natalan lakpuskatin tiku xchixkukan ni xtatayananin Jehová xwankgonit, tlakg kskujnaniputunkgo Jehová. Uma tuku ktitaxtuw kinkamasiyanin pi wa ankgalhin kiliʼakxilhatkan tuku tlan kinkakitaxtuniman chu naklipawanaw pi Jehová nalakkaxtlawa kaxatukawa tuku tuwa xaktitaxtuw (Miq. 7:7). Ktsukuparaw paxuwayaw chu tlakg tlan kinkakitaxtunin.

Akxni kkilaw kxapulana escuela xla precursores, kgalhtati natalan kinkamasiyanikgon. Kgalhtutu xkiskujnanikgonit Jehová kʼatanu país. Kinkamasiyanikgon fotos chu kinkalitachuwinankgon tuku tuwa xtitaxtukgonit chu la xkasikulunatlawanit Jehová xlakata kskujnimakgo. Uma tlawalh pi akit chu kimpuskat, misioneros xaklitaxtuputuw. Wa xlakata klakkaxwiliw nakliskujaw xlakata misioneros xaklitaxtuw.

Xlakata xaklakgchaw tuku xaklakkaxwilinitaw, kkata 1984 kkaw latamayaw kQuebec, nema 4,000 kilómetros xlilakgamakgat xwi lata kColumbia Británica. Anta xchuwinankan francés, wa xlakata xtalakaskin xakkatsiniw uma tachuwin chu xaklismaniw talismanin nema xʼanan anta. Atanu tuku tuwa ktitaxtuw, wa pi ni xkinkaʼakchaniyan tumin. Klakapastaka pi akgtum kilhtamaku, chatum chixku tiku xmakgala papas kinkamaxkin talakaskin xaksakiw tuku xla ni xmakikgonit. Kajwatiya uma kliwayaw makgapitsi kilhtamaku. Pero Debbie lakputsalh la xlakkaxtlawalh papas xlakata ni xaklikgalhchaw. Maski lhuwa tuku tuwa ktitaxtuw, xatapaxuwan ktayaniw. Na kakxilhwi la Jehová kinkakuentajtlawan (Sal. 64:10).

Akgtum kilhtamaku kinkatachuwinankan kteléfono chu lu kaks kinkamalakawanin tuku kinkawanikan. Xkinkaʼinvitarlimakan kBetel xalak Canadá. Xlakata xakmalakgatsamanitaw solicitud xlakata xakkamputunaw kʼEscuela de Galaad, ni xakkatsiyaw tuku xakkamaw tlawayaw. Maski chuna, kwaw pi xakkamaw anaw kBetel. Akxni kchaw, kkgalhskiw tala Kenneth Little, tiku xmakgtapakgsi kComité de Sucursal: «¿Tuku naktlawayaw komo nakinkaʼinvitarlikanan kʼEscuela de Galaad?». Xla kinkakgalhtin: «Akxniku nalilakpuwanaw tuku natlawayaw komo nakaʼinvitarlikanatit».

Kaj akgtum semana titaxtulh, lakgchalh kilhtamaku naklaksakaw tuku xakkamaw tlawayaw. Kinkaʼinvitarlikan kʼEscuela de Galaad. Tala Little kinkawanin: «Kaxatukawa tuku nalaksakatit, namin kilhtamaku nalakpuwanatit pi tlakg tlan xtiwa komo atanu tuku xtilaksaktit. Pulaktiy niku kaʼinvitarlipakantit, tlan. Jehová nakasikulunatlawayan kaxatukawa tuku nalaksakatit». Klaksakwi nakkanaw kʼEscuela de Galaad, chu chuna la titaxtunit kilhtamaku, kakxilhnitaw pi tuku kinkawanin tala Little lu xlikana. Chu asta makglhuwa, nachuna kkawaninitaw natalan tiku pulaktiy tuku kamalaknunikanit chu ni katsikgo tuku nalaksakkgo xlakata naskujnanikgo Jehová.

AKXNI MISIONEROS KLITAXTUW

Lu klipaxuwaw pi kkilaw kclase 83 xla Escuela de Galaad, niku na kilakgolh atanu 22 natalan. Uma escuela tsukulh abril kkata 1987 kBrooklyn (Nueva York). Natalan tiku kinkamasiyanikgon kʼuma escuela wa Ulysses Glass chu Jack Redford. Lakapala titaxtulh akgkitsis papaʼ, chu escuela sputli 6 xla septiembre kata 1987. Alistalh kinkamalakgachakan kʼHaití, chu na anta kamalakgachaka John chu Marie Goode.

Lata kkata 1962 ni xʼanankgonit misioneros kʼHaití, xlakata uma kata katlakgaxtuka misioneros tiku anta xlamakgo, chu akinin kchaw anta. Kajku akgtutu semanas xtitaxtunit lata ksputnit kiʼescuelajkan, ktsukuw makgtayananaw kʼakgtum congregación kkasipijni niku kaj 35 publicadores xʼanankgo. Lhuwa tuku kilikatsinitkan xwanit, chu kaj akit chu kimpuskat xakwilaw kchiki niku xtawilakgo misioneros. Latamanin xalak Haití lu lakglimaxkgenin xwankgonit chu lhuwa tiku ni xlakgapaskgo letra. Lhuwa tuku tuwa ktitaxtuw xlakata latamanin xlitaʼakglhuwikgo política, xmapanuputunkgo mapakgsina, xmalakgpasiwilikgo lhkuyat kkatijin xlakata nitila xtitaxtulh, chu na kpatiw huracanes.

Natalan xalak Haití lhuwa tuku kinkamasiyanikgon xlakata lu xtayanikgo chu chuntiya xpaxuwakgo maski xtitaxtumakgo tuku tuwa. Xpaxkikgo Jehová chu lu xlakgatikgo xlichuwinankgo xtachuwin. Klakapastaka chatum tala tiku xlina kata chu ni xlakgapasa letra, pero xkatsininit de memoria max 150 textos xalak Biblia. Putum tuku xakakxilhaw, kinkamakgpuwantinin nakkalitachuwinanaw latamanin pi kajwatiya xTamapakgsin Dios tlan nalakkaxtlawa putum tuku nitlan lama kkakilhtamaku. Lu kinkamakgapaxuwayan pi makgapitsi tiku kkalimakgalhtawakgew Biblia, precursores regulares litaxtukgonit, precursores especiales chu lakgkgolotsin xalak congregación.

Anta kʼHaití klakgapasli chatum kgawasa tiku misionero mormón xlitaxtu, xwanikan Trevor, chu makglhuwa klitakgalhchuwinaw tuku masiya Biblia. Titaxtulh kilhtamaku, lu kpaxuwalh akxni kimalakgachanilh maktum carta niku xwan: «¡Naktamunu kʼasamblea! Ktaspitputun kʼHaití chu precursor especial klitaxtuputun antiya niku misionero mormón xakwanit». Chu chuna tlawalh. Xla chu xpuskat akglhuwa kata skujnanikgolh Jehová anta.

KʼEUROPA DEL ESTE CHU ALISTALH KʼÁFRICA

Titaxtulh kilhtamaku, kinkamalakgachakan kʼakgtum kachikin xalak Europa del Este, niku xtsukumaka mastakan talakaskin pi xtatayananin Jehová xlichuwinankgolh Dios. Kkata 1992 kchaw kLiubliana (Eslovenia), lakatsu niku kstakkgonit kinatlatni akxni nina xʼankgo kʼItalia. Ama kilhtamaku xlakatsukuma akgtum guerra kkachikin nema xapulana xlilakgapaskan Yugoslavia. Kputum umakgolh kachikinin, natalan xalak Viena (Austria), xalak Zagreb (Croacia) chu Belgrado (Serbia) xpulalimakgo taskujut nema xtlawakgo xtatayananin Jehová. Pero ama kilhtamaku, kʼakgtati kachikinin nema xapulana xtapakgsinikgo Yugoslavia xʼamakgo tawilakgo sucursales.

Wa xlakata talakaskilh xakkatsiniw atanu tachuwin chu atanu talismanin. Latamanin xalak Eslovenia xkinkawanikgoyan «Jezik je težek», nema wamputun «Kintachuwinkan lu tuwa». ¡Chu xlikana tuku xkinkawanikgoyan! Atanu tuku lu kaks klilakawaw wa pi natalan xatapaxuwan xmakgamakglhtinankgo akxni xkachikin Jehová xwan pi wi tuku xtalakgpalinit. Chu Jehová kasikulunatlawalh xlakata chuna xtlawakgo. Amakgtum kakxilhparaw pi Jehová ankgalhin lakkaxtlawa tuku nitlan lama kkilhtamaku akxni xla lakpuwan pi chuna xlilat. Lhuwa tuku kkatsiniw kʼEslovenia, chu tuku xakkatsininitawa kinkamakgtayan naktayaniyaw tuku tuwa ktitaxtuw anta.

Pero kilatamatkan talakgpalipa. Kkata 2000, kinkamalakgachakan kCosta de Marfil, kʼÁfrica occidental. Pero tsukulh akgtum guerra, chu noviembre kata 2002 lakapala kinkatamakxtukan chu kinkamalakgachakan kSierra Leona, niku aku ksputnit guerra nema xmakgapalanit 11 kata. Lu tuwa kmakgkatsiw xlakata kaj xalan kinkatamakxtukan. Pero putum tuku xakkatsininitaw kinkamakgtayan chuntiya xakpaxuwaw.

Wa ktsukuw kalilakgputsayaw latamanin tiku xkatsiputunkgo xlakata Dios chu lu kinkamatliwakglhni akxni kakxilhwi xtapaxkitkan chu xtakanajlakan kinatalankan tiku akglhuwata kata xpatinankgonit xpalakata guerra. Nachuna, maski lakglimaxkgenin xwankgonit, xatapaxuwan xkinkamaskiwiputunkgoyan tuku xkgalhikgo. Klakapastaka pi chatum tala xmaskiwiputun Debbie lhakgat. Xapulana, Debbie wanilh pi ni, pero tala makglhuwa wanilh pi xmaskiwiputun chu wa: «Akxni xlama guerra, natalan xalak atanu países kinkamakgtayakgon. La uku akinin kinkalakgchanan nakmakgtayananaw». Klakkaxwiliw pi xakkamaw stalaniyaw xliʼakxilhtitkan umakgolh natalan.

Titaxtulh kilhtamaku, ktaspitwi kCosta de Marfil, pero xlakata xʼananku taʼakglhuwit xlakata política, latamanin tsukuparakgolh latalatlawakgo. Wa xlakata, noviembre kata 2004 lakapala kinkatamakxtukan kʼhelicóptero, chu nila lhuwa tuku kliw, kajwatiya 10 kilo xlitsinkat xwanit tuku xakliw kinchatunukan. Klakgtunkuwiw niku xtamakgxtakgkgo soldados franceses, chu lichali kinkalinkan kʼavión kSuiza. Max itat tsisni kchaw ksucursal. Lu skaya kmakgkatsiw pi Comité de Sucursal, natalan tiku xmasiyakgo kʼescuela Niku Kamasiyanikan Lakgkgolotsin chu Ministeriales chu xlakpuskatinkan xatapaxuwan kinkamakgamakglhtinankgon. Xkinkalikgalhkgalhimakgon xachichi liwat chu chocolate.

Kinkamalakgachakan kʼGhana, chu akxni takaksli taʼakglhuwit kCosta de Marfil, kinkamalakgachaparakan anta. Putum uma kilhtamaku akxni makglhuwa kinkatamakxtukan kʼakgtum país chu alakatanu kinkamalakgachakan, lu tuwa kmakgkatsiw. Pero talakgalhaman nema kinkalimasiyanikgon natalan lu kinkamakgtayan. Maski Debbie chu akit kkatsiyaw pi kxkachikin Jehová kilalimasiyanitkan tapaxkit, klakkaxwiliw pi akinin ankgalhin lu xlakaskinka xakkamaw liʼakxilhaw uma. Tuku tuwa ktitaxtunitaw lhuwa tuku kinkamasiyaninitan nema kinkamakgtayanitan chuna la kskujnanimaw Jehová.

KINKAMALAKGACHAPARAKANAN KʼATANU KACHIKIN

Kkata 2006, natalan tiku skujkgo niku pulalinkan kintaskujutkan, kinkamalakgachanikgon maktum carta niku xkinkamakatsinimakgon pi xtalakaskin xakkaw makgtayananaw kʼAsia occidental (Oriente Medio). Amakgtum xtalakaskin xakkatsiniparaw xasasti tachuwin chu xasasti talismanin. Xakkatsiyaw pi lhuwa tuku xakkamaw lipaxuwayaw pero na xakkamaw titaxtuyaw tuku tuwa. Lhuwa tuku kilikatsinitkan xwanit xlakata kʼumakgolh kachikinin xʼanankgo taʼakglhuwit xlakata política chu religión. Pero na lu klakgatiw akxni kakxilhwi pi kcongregaciones, natalan tanu tanu tachuwin xchuwinankgo chu pi makxtum xwilakgo xlakata xkgalhakgaxmatkgo tuku xkachikin Jehová xkawani. Lu kaks kinkamalakawanin pi lhuwa natalan ni xpekuankgo chu xtayanikgo maski tiku xalak xfamiliajkan, xcompañeroskan xalak escuela, tiku xkataskujkgo chu xtalakatsuninkan xkalisitsinikgo xlakata xtakanajlakan.

Kkata 2012 kkilaw kʼakgtum asamblea nema tlawaka kTel Aviv (Israel). Uma asamblea lu xlakaskinka litaxtulh, xlakata lata kPentecostés kata 33 nila xtamakxtumikgonit lu lhuwa kskujnin Jehová kʼuma kachikin.

Putum uma kilhtamaku kmakgtayanaw kʼakgtum país niku ni mastakan talakaskin natlawayaw kintaskujutkan. Xaklinaw likgalhtawakga, xaklichuwinanaw Dios chu xaktlawayaw laktsu asambleas. Lakatum lakatum niku xwilakgo soldados chu xlinkgo xlitalatnikan, pero ni xakpekuanaw xlakata amakgapitsi publicadores xalak uma país xkinkatalapulakgoyan chu kinkamakgtayakgon xlakata xakkatsiw la xaklatapuliw xlakata ni xkatsika tuku xaktlawamaw.

KTASPITPARAW KʼÁFRICA

Kkata 2013 kinkawanikan pi xakkaw makgtayananaw ksucursal xalak Kinsasa (República Democrática del Congo). Uma país lu lanka chu lu kalilakgatit, pero na lu anan talimaxkget chu latamanin puntsu puntsu latalatlawa. Xapulana klakpuwaw: «Lakgapasnanaw kʼÁfrica, kilatamanitawa anta, katsiyaw tuku nakinkakitaxtuniyan». Pero lhuwaku tuku kilikatsinitkan xwanit, nikxni xaklatapulinitaw niku ni anan carreteras nipara puentes. Maski chuna, na lhuwa tuku tlan xʼanan, chu wa uma tuku tlakg xlakaskinka kliʼakxilhwi. Natalan xtayanikgo chu chuntiya xpaxuwakgo maski xtitaxtumakgo tuku tuwa xpalakata talimaxkget. Lu xlakgatikgo xlichuwinankgo Dios chu lu xliskujkgo naʼankgo ktamakxtumit chu kʼasambleas. Kakxilhwi la talhuwilh xlakskujnin Jehová kʼuma país xlakata Jehová ksikulunatlawama xtaskujutkan natalan. Kilhtamaku nema klatamaw kCongo-Kinsasa lhuwa tuku kkatsiniw chu na ktekgswi amigos tiku la kifamiliajkan litaxtukgolh.

Akxni ksputmaja kata 2017 kinkamalakgachakan kBetel xalak Sudáfrica, tlakg xalanka sucursal niku kmakgtayananitaw. Anta kinkalakgayawakan taskujut nema nikxni xaktlawanitaw. Amakgtum talakaskilh pi lhuwa tuku xakkatsiniw, pero tuku Jehová kinkamasiyanin makgasata lu kinkamakgtayanitan. Anankgo lhuwa natalan tiku lhuwata kata skujnanimakgo Jehová chu ni makgxtakgkgo, chu lu kkapaxkiyaw. Lu kaks kinkamalakawaniyan pi putum tiku tapakgsikgo kBetel lu tlan latalalin maski tanu tanu xkilhtsukutkan chu xtalismaninkan. Xlakata umakgolh natalan lilhakganankgo xasasti tayat chu lilatamakgo xtastakyaw Biblia, Jehová kasikulunatlawa chu kamakgtaya makxtum natawilakgo.

Chuna la titaxtunit kilhtamaku, Debbie chu akit kinkalakgayawakanitan tipalhuwa taskujut. Talakaskinit nakkatsiniyaw tanu tanu talismanin chu tachuwin. Maski minit kilhtamaku ktitaxtunitaw tuku tuwa, ankgalhin kakxilhnitaw pi Jehová maklakaskinit xkachikin chu natalan xlakata nakinkalimasiyaniyan xtapaxkit (Sal. 144:2). Putum tuku kkatsininitaw lata ktsukuw skujnaniyaw Jehová putum kilhtamaku, kinkamakgtayanitan tlakg tlan kskujnin naklitaxtuyaw.

Lu kkapaxtikatsini kinatlatni chuna la kimakgastakkgolh, chu xtapalh kliʼakxilha pi kimpuskat, Debbie, kimakgtaya. Na lu xtapalh kliʼakxilha putum tuku kimasiyanikgonit natalan kxlikalanka katiyatni. Akxni klilakpuwanaw kilhtamaku nema aku mima, chuntiya kkatsiniputunaw tuku nakinkamasiyaniyan xaLanka kiMakgalhtawakgenakan.