¿Tuku nakinkamakgtayayan nialh lu nalilakgaputsayaw guerras chu tatalachipat?
Gary, tiku makgasata soldado xlitaxtu, wan: «Akxni nina xaklikgalhtawakga tuku wan Biblia, nila xakʼakgtekgsa tuku xlakata anan lhuwa taʼakglhuwit, tlawakan tuku ni xaʼakgstitum chu anan tuku nitlan kkakilhtamaku. Pero la uku nialh lu klilakgaputsa uma chu kkatsi pi Jehová nialh makgas natlawa pi kKatiyatni nialhtu nalipekuankan».
Ni kajwatiya Gary tiku chuna makgkatsi. Kaʼakxilhwi la kamakgtayanit tuku masiya Biblia amakgapitsi latamanin.
TUKU WAN BIBLIA: «Wix, oh, Jehová, tlan likatsiya chu lu tapatinamputuna» (Salmo 86:5, La Biblia. Traducción del Nuevo Mundo, TNM).
LA KINKAMAKGTAYAYAN: Wilmar, xalak Colombia, wan: «Umakgolh tachuwin lu tlan kimamakgkatsini xlakata kimasiyani pi Jehová lu xalakgalhamanina. Kkatsi pi xla kintapatiputun putum tuku nitlan ktlawalh akxni soldado xaklitaxtu».
TUKU WAN BIBLIA: «Naktlawa xasasti akgapun chu xasasti katiyatni; chu tuku titaxtunita nialh katitalakapastakli, na nialh katitawilalh kkinakujkan» (Isaías 65:17, TNM).
LA KINKAMAKGTAYAYAN: Zafirah, xalak Estados Unidos, wan: «Nila kpatsankga tuku kakxilhli akxni soldado xaklitaxtu, chuntiya kimalakgaputsi chu lu kimakgalipuwan. Pero uma texto kimalakapastaka pi nialh makgas, Jehová namapanu putum tuku nila kpatsankga. Nialh ktilakapastakli chu nialh kintimakgalipuwa. ¡Uma akgtum lu stlan tamalaknun!».
TUKU WAN BIBLIA: «Xaʼakgstitum naxana chuna la tuwan, chu naʼanan lhuwa takaksni asta akxni nialh naʼanan papaʼ» (Salmo 72:7, TNM).
LA KINKAMAKGTAYAYAN: Olexandra, xalak Ucrania, wan: «Lu klakgati klilakpuwan uma tachuwin. Kkatsi pi nialh makgas, putum tuku nitlan kitaxtunit xpalakata guerra nialh katiʼanalh. Chu nialh katililakgaputsaw pi tiku xalak kifamiliajkan nakaʼakgspula tuku nitlan».
TUKU WAN BIBLIA: «Tiku nikgonita nalatamaparakgo […]. ¡Kalakastakwanantit chu pixlanka katakgaxmatli mintapaxuwankan, wixin tiku wilatit kpokgxni!» (Isaías 26:19, TNM).
LA KINKAMAKGTAYAYAN: Marie, xalak Ruanda, wan: «Lhuwa tiku xalak kifamilia kamakgnika akxni atanu tribu xkamakgniputunkgo putum tiku tutsis xlitaxtukgo. Pero umakgolh tachuwin kimalakapastaka pi nialh makgas nakkaʼakxilhpara. Lu kkatachuwinamputun akxni nalakastakwanankgo».
TUKU WAN BIBLIA: «Nialh lhuwa kilhtamaku, chu tiku lixkajni likatsikgo nialh katitawilakgolh […]. Pero tiku tlan likatsikgo wa nakamaxkikan katiyatni, chu xlikana lu lipaxuw natawilakgo» (Salmo 37:10, 11, TNM).
LA KINKAMAKGTAYAYAN: Daler, xalak Tayikistán, wan: «Maski unu nialh lama guerra, chuntiyaku anankgo tiku nitlan likatsikgo. Uma texto lu kimatliwakglha, kkatsi pi Jehová akxilhma putum tuku lama chu akgatekgsa tuku ktitaxtuma. Na malaknu pi nialh makgas namasputu putum tapatin chu nialh katilakapastakwi tuku nitlan titaxtuw».
Tiku aku kalichuwinaw, xtatayananin Jehová litaxtukgo chu tekgskgonit takaksni chu nialh lu lakgaputsakgo xlakata katsinikgonit tuku wan Biblia. Xapulana ni xkaʼakxilhputunkgo amakgapitsi latamanin max xlakata wi tuku nitlan xkatlawanikanit, xlakata ni watiya tribu xtapakgsikgo o ni watiya xkachikinkan xwanit, pero la uku nialh chuna lakpuwankgo (Efesios 4:31, 32). Akinin xtatayananin Jehová ni kmakgtanuyaw kpolítica, kʼguerra o kaxatukawa tatalachipat nema anan (Juan 18:36).
Akinin xtatayananin Jehová klamakgtayayaw chuna la akgtum familia (Juan 13:35). Kalilakpuwaw Olexandra, tiku lichuwinaw kʼatanu párrafo. Xla chu xtala tsumat tsalataxtukgolh kxpaiskan xpalakata guerra. Xla wan: «Akxni ktaxtuw kkimpaiskan chu kchaw alakatanu, xtatayananin Jehová xalak kʼuma país xatapaxuwan xkinkakgalhkgalhimakgon. Uma kinkamakgtayan xlakata ni lu tuwa xakmakgkatsiw pi xaktsalataxtumaw kkinkachikinkan».
Kkaʼinvitarliyan kkintamakxtumitkan. Anta tlakg nakatsiniya tuku namakgtayayan nialh lu nalakgaputsaya chu tuku masiya Biblia xlakata la nawan kakilhtamaku akxni naʼanan takaksni. Katanu ksitio jw.org chu kaputsa niku tamakxtumikgo xtatayananin Jehová o kaskinti pi kalimakgalhtawakgekgon libro Kalipaxuwa latamat nema takilhtinit kBiblia.