Lu nitlan kitaxtu akxni anan guerra
Pulaktum tuku lu kalimini lhuwa talakgaputsit latamanin wa akxni anan guerras chu tatalachipat. Soldados chu tiku lamakgo niku ananit akgtum guerra lu lipatinankgonit tuku nitlan kitaxtu.
TUKU WANKGO SOLDADOS
Gary, xalak Gran Bretaña, wan: «Akxni anan guerra, lhuwa la tuku nitlan. Xakakxilha la xkamakgnikan chu xkamakgawikan o xkamasipanikan latamanin. Putum kilhtamaku xakmakgkatsi pi xʼama kiʼakgspula tuku nitlan».
Wilmar, xalak Colombia, wan: «Kkistipun o kkistimun chu kkilakan tasiya niku kintalakanit. Kakxilhli la kamakgnika lhuwa latamanin, asta laktsu kamanan chu tiku xlinkgoya kata. Guerra tlawa pi nialhtu namakgkatsiya akxni naʼakxilha pi wi tiku makgnimaka o patinama».
Zafirah, xalak Estados Unidos, wan: «Akxni wi tiku makgnikan kmilakatin, nikxnila patsankgakan. Ankgalhin nalakapastaka la xpatinama chu la xkatsanajwama».
TUKU WANKGO AMAKGAPITSIN
Olexandra, xalak Ucrania, wan: «Klakpuwa pi nikxni xakkamapa paxuwa. Putum kilhtamaku xakpekuan xlakata xaklakpuwan pi xʼamaka kimakgnikan. Pero tuku tlakg xaklilakgputsa wa pi xkamakgnika kifamilia chu kiʼamigos».
Daler, xalak Tayikistán, wan: «Xtalakaskin xakformarlalh lata kamakgtiy tsisa asta kamakgkawitu katsisni xlakata xkimaxkika tsinu liwat. Lu xakpekuan akxni anta xakya xlakata xakkatsi pi kaj lakapala tlan xtsukuka latalatlawakan chu na tlan xkintalaka».
Marie, xalak Ruanda, wan: «Akxni xlama guerra, kamakgnika kinatlatni. Kiʼakstu ktamakgxtakgli, ni xʼanan tiku xkinkuentajtlawalh chu xkimakgoxamixilh».
Maski umakgolh latamanin lu patinankgonit xlakata guerra, la uku kgalhikgo takaksni. Na katsikgo pi nialh makgas namapustukan guerra chu tatalachipat. Uma revista Makatsinina lichuwinan tuku wan Biblia xlakata la namasputukan guerra.