¿La tlan xaxlikana amigo nalitaxtuya?

¿MINIT kilhtamaku titaxtunita tuku tuwa chu makgkatsinita pi ni xʼanan tiku xmakgtayan? Maski lamaw kkakilhtamaku “niku lu katuwa chu kalipekua”, chu lhuwa anan tuku kinkamakgalipuwanan chu tuku max xtlawalh pi xmakgkatsiw pi kiʼakstukan wilaw, ni talakaskin kiʼakstukan natayaniyaw tuku tuwa titaxtuyaw (2 Tim. 3:1). Biblia masiya pi tlan nakgalhiyaw xtamakgtay xaxlikana amigos «akxni anan talakgaputsit» (Prov. 17:17).

¿LA MAKGTAYANANKGO XAXLIKANA AMIGOS?

Apóstol Pablo xkakgalhi amigos tiku xtalapulakgo chu tipalhuwa la makgtayakgolh (Col. 4:​7-11). Akxni xatachin xwi kRoma, tlawakgolh tuku apóstol Pablo nila xtlawa. Akgtum liʼakxilhtit, Epafrodito linilh tuku xmaklakaskin chu tuku natalan xalak Filipos xmalakgachanikgonit (Filip. 4:18). Tíquico kalinilh cartas congregaciones nema Pablo xkatsokgnaninit (Col. 4:7). Xlakata xʼamigos makgtayakgolh, Pablo tlan makgantaxtilh xtaskujut maski tachin xwi kʼakgtum chiki chu alistalh tamaknuka kpulachin. Chu akinin, ¿tuku tlan natlawayaw xlakata xatlan amigos nalitaxtuyaw?

La uku lhuwa natalan limasiyakgo pi xaxlikana amigos lu makgtayanankgo. Kalichuwinaw tuku titaxtulh Elísabet, chatum precursora regular xalak España. Akxni xtse wanika pi xkgalhi cáncer chu pi nialh makgas xʼama latama, chatum tala limasiyalh pi xaxlikana amiga xlitaxtu xlakata ankgalhin xmalakgachani Elísabet mensajes niku xlitachuwinan makgapitsi textos xalak Biblia. Elísabet wan: «Umakgolh mensajes kimalakapastakalh pi ni kiʼakstu xakwi chu kimaxkilh litliwakga xlakata tlan xaktayanilh tuku xaktitaxtuma chali chali» (Prov. 18:24).

Tlakg tlan nakatalalinaw kinatalankan komo nakamakgtayayaw natlawakgo tuku namatliwakglha xtakanajlakan. Akgtum liʼakxilhtit, tlan xtalaknuw xlakata xliw ktamakxtumit chatum tala tiku lina kata o xʼaw talichuwinanaw Dios. Uma natlawa pi nalamakgpuwantiniyaw kinchatunukan (Rom. 1:12). Pero na wilakgo natalan tiku nila taxtukgo kxchikkan. ¿Tuku tlan natlawayaw xlakata nakalimasiyaniyaw pi xaxlikana amigos litaxtuyaw?

KAKALIMASIYANIW TIKU NILA TAXTUKGO KXCHIKKAN PI XAXLIKANA AMIGOS LITAXTUYAW

Wilakgo natalan tiku nila taxtukgo xlakata tatatlakgo o xlakata wi atanu tuku tuwa titaxtumakgo. Wa uma tuku akgspulalh David, tiku wanika pi xkgalhi akgtum tajatat nema wanikan linfoma chu tlawanika quimioterapia liwaka akgchaxan papaʼ. Putuminika uma kilhtamaku xla chu xpuskat, tiku wanikan Lidia, kaj kvideoconferencia xʼakxilhkgo tamakxtumit.

¿La kamakgtayalh congregación? Akxni ksputa tamakxtumit, makgapitsi natalan tiku xwilakgo kPukgalhtawakga, xlimaxtukgo kilhtamaku xlakata xkatachuwinankgolh kvideoconferencia. Nachuna, natalan xkamalakgachanikgo mensajes xlakata xkamakgpuwantinikgolh akxni xmastakgo xtakgalhtinkan ktamakxtumit. ¿Tuku tlan kitaxtulh? David chu Lidia akxilhkgolh pi xʼamigoskan lu xkapaxkikgo.

Tlan xlakkaxwiliw akxtum xkatalichuwinaw Dios natalan tiku nila taxtukgo kxchikkan. Ni talakaskin lhuwa tuku nalakgpaliyaw kkilatamatkan xlakata nakalimasiyaniyaw pi ni kapatsankgamaw (Prov. 3:27). ¿Tlan akxtum xkatatlawaw cartas o xkatalichuwinaw Dios kteléfono? Lakgkgolotsin na tlan xlakkaxwilikgolh pi tamakxtumit nema tlawakan akxni ankan lichuwinankan Dios, kvideoconferencia xtlawaka. David chu Lidia lu paxuwakgolh pi lakgkgolotsin chuna tlawakgolh. David wan: «Lu xakpaxuwayaw xakkatataconectarliyaw kigrupojkan kvideoconferencia. Textos nema xkinkamalakapastakakanan chu oración lu xkinkamatliwakglhan». Chu komo kgalhiyaw chatum tiku limakgalhtawakgeyaw Biblia, tlan xwaniw pi xʼalh kxchik tala tiku nila taxtu xlakata anta xtakgalhtawakgaw. Pero pulana kilikgalhskinitkan tala komo matlani.

Akxni limaxtuyaw kilhtamaku xlakata nakamakgtayayaw natalan tiku nila taxtukgo kxchikkan, kinkamakgtayayan tlakg liwana nalakgapasaw xatlan xtayatkan chu tlakg tlan katalalinaw. Akgtum liʼakxilhtit, akxni akxilhaw la liwana maklakaskinkgo xTachuwin Dios xlakata namakgtayakgo chatum lataman, tlawa pi tlakg nakamaxkiyaw kakni. Komo nakamakgtayayaw umakgolh natalan, max tlakg lhuwa amigos nakgalhiyaw (2 Cor. 6:13).

Pablo lu tlan limakgkatsilh pi xʼamigo, Tito, akxtum xtawi (2 Cor. 7:​5-7). Uma kinkamalakapastakayan pi ni kajwatiya kintachuwinkan tlan kalimamakgkatsiniyaw kiʼamigoskan, na tlan kamamakgkatsiniyaw akxni akxtum katatawilayaw o wi tuku tlawayaw xpalakatakan (1 Juan 3:18).

KALIMASIYAW PI XAXLIKANA AMIGOS LITAXTUYAW AKXNI ANAN TAPUTSASTALANIT

Kinatalankan xalak Rusia limasiyakgo pi xaxlikana amigos litaxtukgo xlakata lamakgtayakgo. Kalichuwinaw tuku titaxtukgolh Serguéi chu xpuskat, Tatiana. Policías tanukgolh kxchikkan xlakata xlakputsanankgolh, chu alistalh kalinka xlakata xkakgalhputsaka. Pulana makgxtakgka Tatiana, chu xla taspitli kxchik. Serguéi lichuwinan tuku lalh akxni Tatiana aku xtaspitnit kxchik: «Maski kalipekua xwanit, milh chatum tala puskat. Alistalh minkgolh amakgapitsi natalan chu kinkamakgtayakgon xlakata xaklakkaxwiliw tuku policías xlakwilhawilikgonit».

Serguéi wampara: «Ankgalhin klakgatinit tuku wan Proverbios 17:17: “Xaxlikana amigo putum kilhtamaku paxkinan, chu litaxtu la chatum tala akxni anan talakgaputsit”. Xlakata la uku kinkaputsastalanimakan, kakxilhnit pi umakgolh tachuwin xaxlikana, kiʼakstu nila xaktayanilh tuku ktitaxtuma. Jehová kimaxkinit xaxlikana amigos tiku ni pekuankgo chu nikxni kimakgxtakgkgonit».a

Kʼuma xatuwa kakilhtamaku, talakaskin nakgalhiyaw amigos tiku tlan nakinkamakgtayakgoyan. Chu akxni lama nawan lhuwa tapatin tlakg namaklakaskinaw xtamakgtaykan. Wa xlakata, lu kaliskujwi la uku xlakata tlan amigos nalitaxtuyaw (1 Ped. 4:​7, 8).