¿La tlan namastayaw laktlan tastakyaw?

1. ¿Tiku kalakgchan nastakyawanankgo, chu tuku xlakata?

WI TIKU ni tuwa makgkatsi nastakyawanan, pero wi tiku lu tuwa makgkatsi. Maski chuna, namin kilhtamaku kimputumkan natalakaskin nastakyawananaw. ¿Tuku xlakata? Xlakata akxni wi tiku stakyawayaw limasiyaniyan pi paxkiyaw. Chu Jesús lichuwinalh pi tapaxkit wa tuku xʼamaka kalilakgapaskan kstalaninanin (Juan 13:35). Nachuna, Biblia wan pi akxni lastakyawayaw, tlakg tlan latalalinaw (Prov. 27:9).

2. ¿Tuku liwana xlikatsinitkan natlawakgo lakgkgolotsin, chu tuku xlakata? (Na kaʼakxilhti recuadro «La tlan namastakan tastakyaw ktamakxtumit kxʼitat semana»).

² Lakgkgolotsin xalak congregación wa tiku tlakg liwana xlikatsinitkan la namastakgo laktlan tastakyaw, xlakata Jehová chu Jesús kalakgayawakgonit nakuentajtlawakgo congregación (1 Ped. 5:​2, 3). ¿La makgantaxtikgo uma talakgatay? Pulaktum wa akxni mastakgo taʼakgchuwin chu lichuwinankgo xtastakyaw Biblia. Atanu wa akxni stakyawakgo chatum tala tiku maklakaskima tastakyaw. Na kamakgtayakgo tiku tamakgatlinikgonit Jehová xlakata nalakgtaspitkgo. ¿Tuku kilitlawatkan xlakata namastayaw laktlan tastakyaw?

3. 1) ¿Tuku nakinkamakgtayayan namastayaw laktlan tastakyaw? (Isaías 9:6; na kaʼakxilhti recuadro «Katlawaw chuna la Jesús akxni nastakyawananaw»). 2) ¿Tuku naʼakxilhaw kʼuma artículo?

³ Xliʼakxilhtitkan tiku kalichuwinankan kBiblia nema mastakgolh laktlan tastakyaw, lu nakinkamakgtayayan xlakata nachuna natlawayaw. Jesús wa tlakg xatlan liʼakxilhtit. Biblia wan pi wa tlakg «xaTlan Stakyawana» (kalikgalhtawakga Isaías 9:​6, TNM). Kʼuma artículo nalichuwinanaw tuku tlan natlawayaw akxni wi tiku kinkaskiniyan akgtum tastakyaw chu tuku kilitlawatkan akxni kilimastatkan akgtum tastakyaw maski ni kinkaskinimakan. Na nalichuwinanaw tuku xlakata lu kuenta kilitlawatkan la namastayaw tastakyaw chu tuku kilhtamaku tlakg tlan nastakyawananaw.

AKXNI KINKASKINIKANAN TASTAKYAW

4, 5. ¿Tuku tlan nalilakpuwanaw komo wi tiku nakinkaskiniyan akgtum tastakyaw? Kalichuwinanti akgtum liʼakxilhtit.

⁴ ¿Tuku pulana kilitlawatkan akxni wi tiku kinkaskiniyan tastakyaw? Max lu tlan nalimakgkatsiyaw pi wa akinin tiku kinkaskiniman tastakyaw chu tunkun nawaniputunaw tuku tlan xmakgtayalh. Pero lu xlakaskinka pi pulana nalilakpuwanaw: «¿Liwana kkatsi xpalakata tuku kinkgalhskima? ¿Namakgtaya tuku nakwani?». Namin kilhtamaku, tlakg tlan nawan nawaniyaw pi kaputsalh atanu tiku tlakg tlan nastakyawa.

⁵ Kalilakpuwaw pi chatum kiʼamigojkan kgalhi xasnun tajatat. Xla kinkawaniyan pi liwana lakputsananinit tuku tratamiento tlan xlimakuchika chu kinkakgalhskinan tuku tratamiento tlan xmakgamakglhtinalh. Max akinin liwana katsiyaw tuku xtlawaw komo chuna xtitaxtuw. Pero komo akinin ni makuchinanin chu ni liwana lakgapasaw tajatat nema kgalhi kiʼamigojkan, tlakg tlan nawan nataputsayaw tiku tlakg tlan namakgtaya chu liwana lakgapasa tajatat nema kgalhi.

6. ¿Tuku xlakata ni tunkun namastayaw akgtum tastakyaw?

⁶ Max namin kilhtamaku nalakpuwanaw pi katsiyaw xlakata tuku kinkakgalhskimakan chu lakpuwanaw pi tlan namastayaw akgtum tastakyaw. Pero max natalakaskin pi ni tunkun nakgalhtinanaw. ¿Tuku xlakata? Xlakata chuna la wan Biblia, «xnaku tiku xaʼakgstitum liwana lilakpuwan tuku nakgalhtinan» (Prov. 15:​28, TNM). Wa xlakata, maski lakpuwanaw pi liwana katsiyaw tuku nakgalhtinanaw, talakaskin nalimaxtuyaw kilhtamaku xlakata nalakputsananaw, natlawayaw oración chu liwana nalilakpuwanaw tuku nakgalhtinanaw. Komo chuna natlawayaw, kintastakyawkan nalimasiya pi lakpuwamaw chuna la Jehová. Kaʼakxilhwi tuku tlawalh palakachuwina Natán.

7. ¿Tuku kinkamasiyaniyan tuku tlawalh Natán?

⁷ Akxni mapakgsina David wanilh Natán pi xtlawaniputun akgtum templo Jehová, Natán tunkun wanilh pi chuna xtlawalh. Pero Jehová ni wa xlaksaknit David xlakata xtlawalh templo. Xtalakaskin pi Natán pulana xtikgalhskilh Jehová tuku xlakpuwan (1 Crón. 17:​1-4). Tuku tlawalh Natán kinkamasiyaniyan pi akxni wi tiku kinkaskiniyan tastakyaw, talakaskin “ni lakapala nachuwinanaw” (Sant. 1:19).

8. ¿Tuku na kililakapastakatkan akxni namastayaw akgtum tastakyaw?

⁸ Na kililakapastakatkan pi komo tiku stakyawamaw wi tuku nalaksaka kaj xlakata tuku waniw chu nitlan nakitaxtuni, akinin na nalinaw kuenta. Wa xlakata, pulana liwana kililakpuwanatkan komo namastayaw o ni namastayaw akgtum tastakyaw.

AKXNI KILIMASTATKAN TASTAKYAW MASKI NI KINKASKINIMAKAN

9. ¿Tuku pulana xlikatsitkan lakgkgolotsin akxni nina stakyawakgo chatum tala? (Gálatas 6:1).

⁹ Max namin kilhtamaku natalakaskin pi lakgkgolotsin nastakyawakgo chatum tala tiku «ama ktiji nema ni xatlan», chuna la wan Gálatas 6:1 (kalikgalhtawakga). Akxni chatum tala tlawama tuku alistalh nakimatlawi akgtum talakgalhin, lakgkgolotsin xlistakyawatkan xlakata namakgtayakgo chuntiya naskujnani Jehová chu tlan nalatama putum kilhtamaku (Sant. 5:​19, 20). Pero lakgkgolotsin pulana liwana xlikatsitkan komo uma tala xlikana ama knixatlan tiji. Xlilakapastakatkan pi Jehová kinkamaxkinitan talakaskin pi wi tuku kiʼakstukan nalaksakaw natlawayaw, chuna la nakinkawaniyan kintalakapastaknikan (Rom. 14:​1-4). Pero komo lakgkgolotsin akxilhkgo pi chatum tala tlawama tuku nalaktlawa chuna la talalin Jehová, ¿tuku xlitlawatkan xlakata tlan nastakyawakgo?

10-12. ¿Tuku xlitlawatkan lakgkgolotsin akxni xlistakyawatkan tiku ni kaskininit tastakyaw? Kalichuwinanti akgtum liʼakxilhtit (na kaʼakxilhti dibujos).

¹⁰ Lakgkgolotsin max tuwa namakgkatsikgo nastakyawakgo tiku ni kaskininit tastakyaw. ¿Tuku xlakata? Apóstol Pablo wa pi chatum lataman max ama ktiji nema ni xatlan chu max ni katsi. Wa xlakata, akxni lakgkgolotsin nina stakyawakgo, pulaklhuwa tuku xlitlawatkan xlakata uma tala ni tuwa namakgkatsi namakgamakglhtinan tastakyaw.

¹¹ Kalilakpuwaw uma liʼakxilhtit. Akxni chatum chixku wi tuku champutun niku kaskawawa, talakaskin palha naliskuja xlakata namakgala tuku nachan. Pulana max natalakaskin nalakgwaxwili tiyat, nachananan chu namunuwili tuku chalh. Xtachuna la uma, akxni chatum kgolotsin nastakyawa tiku ni skininit tastakyaw, talakaskin pi palha naliskuja. Max uma tala tlakg ni tuwa katimakgkatsilh namakgamakglhtinan tastakyaw komo uma kgolotsin limasiyanita pi xapaxkina chu tlan likatsi. Alistalh, uma kgolotsin naputsa kilhtamaku xlakata nawani pi xlakata paxki chu lilakgaputsa, wi tuku litachuwinamputun.

¹² Xlakata tala tlakg ni tuwa namakgkatsi namakgamakglhtinan tastakyaw, kgolotsin xliwanit pi kimputumkan tlawayaw tuku nitlan chu max talakaskin nakinkastakyawakanan. Akxni chuna tlawa, xtachuna la akxni chatum chanana lakgwaxwili tiyat xlakata nachananan (Rom. 3:23). Liwana nalimaklakaskin Biblia xlakata nawani tuku nitlan tlawama, pero ni xatasitsi natachuwinan. Akxni tala naʼakxilha pi xlikana nitlan tuku tlawama, kgolotsin nawani tuku xlitlawat xlakata nialh chuna natlawa. Uma xtachuna la akxni chatum chanana wi tuku chan. Alistalh, talakaskin pi kgolotsin nawani tala tuku tlan tlawama chu akxtum natatlawa oración. Akxni chuna natlawa, xtachuna la munuwilima tuku chalh (Sant. 5:15).

13. ¿Tuku xlitlawatkan lakgkgolotsin xlakata nakatsikgo komo tala akgatekgsnit tastakyaw?

¹³ Max namin kilhtamaku tiku stakyawamaka ni liwana naʼakgatekgsa tuku kgolotsin wanima. ¿Tuku xlitlawatkan lakgkgolotsin xlakata naʼakxilhkgo komo tala liwana akgatekgsli tastakyaw chu katsi tuku xlitlawat? Tlan natlawanikgo takgalhskinin (Ecl. 12:11).

KALAKPUTSA TUKU KILHTAMAKU NAMASTAYA TASTAKYAW CHU LA NAMASTAYA

14. ¿Tuku xlakata ni kilimastatkan tastakyaw akxni sitsinitaw?

¹⁴ Xlakata putum akinin makglakgalhinanin, namin kilhtamaku natlawayaw o nawanaw tuku nakamakgasitsi amakgapitsin (Col. 3:13). Biblia wan pi namin kilhtamaku nalasitsiniyaw (Efes. 4:26). Pero kuenta kilitlawatkan xlakata ni namastayaw tastakyaw akxni sitsinitaw. ¿Tuku xlakata? «Xlakata xtasitsi chixku ni makgantaxti tuku xaʼakgstitum nema Dios skin» (Sant. 1:20). Komo namastayaw akgtum tastakyaw akxni sitsinitaw, max tlakg namalhuwiyaw taʼakglhuwit. Tlan nawaniyaw tiku kinkamakgasitsin pi nitlan kinkamamakgkatsinin, pero akxni nialh sitsimaw. Kaʼakxilhwi tuku kinkamasiyaniyan tuku tlawalh Elihú akxni stakyawalh Job.

15. ¿Tuku kinkamasiyaniyan xliʼakxilhtit Elihú? (Na kaʼakxilhti dibujo).

¹⁵ Akglhuwa kilhtamaku, Elihú kgaxmatli la Job xkawanima tiku xwankgo pi xʼamigos xlitaxtukgo pi ni xlikana tuku xlimawakamakgo. Maski Elihú xlakgalhaman Job, na sitsinilh xlakata lichuwinalh tuku ni xaxlikana xpalakata Jehová kaj xlakata xlimasiyaputun pi xla ni xlin kuenta. Maski chuna, Elihú kgalhkgalhilh asta akxni lakgchalh nachuwinan, chu stakyawalh Job, pero ni xatasitsi tachuwinalh (Job 32:2; 33:​1-7). Xliʼakxilhtit Elihú kinkamasiyaniyan pi akxni wi tiku nastakyawayaw, talakaskin naputsayaw tuku kilhtamaku chu la nawaniyaw. Talakaskin nalimasiyaniyaw pi paxkiyaw chu ni xatasitsi natachuwinanaw (Ecl. 3:​1, 7).

CHUNTIYA KAMASTAW CHU KAMAKGAMAKGLHTINAW TASTAKYAW

16. ¿Tuku masiyaniyan tuku wan Salmo 32:8?

¹⁶ Texto niku takilhtinit uma artículo wan pi akxni Jehová kinkastakyawayan chuntiya akxilha tuku tlawayaw (kalikgalhtawakga Salmo 32:8). Uma wamputun pi akxni Jehová kinkastakyawayan, kuenta tlawa xlakata naʼakxilha la nakinkamakgtayatilhayan nalilatamayaw tastakyaw nema kinkamaxkin. Xliʼakxilhtit Jehová kinkamasiyaniyan pi akxni wi tiku nastakyawayaw, talakaskin kuenta natlawayaw xlakata naʼakxilhaw la namakgtayatilhayaw nalilatama tastakyaw nema maxkiw.

17. ¿Tuku wan Isaías 32:​1, 2 xlakata lakgkgolotsin tiku mastakgo tastakyaw chu anta kilhtiyakgo xtastakyawkan kBiblia?

¹⁷ La uku tlakg xlakaskinka namastayaw chu namakgamakglhtinanaw tastakyaw (2 Tim. 3:1). Lakgkgolotsin tiku mastakgo tastakyaw chu anta kikilhtiyakgo kBiblia, litaxtukgo «xtachuna la chuchut kʼakgtum país niku xakaskakni» (kalikgalhtawakga Isaías 32:​1, 2, TNM). Lu tlan limakgkatsiyaw pi kgalhiyaw amigos tiku maski katsikgo tuku kgaxmatputunaw, kinkawanikgoyan tuku maklakaskinaw. Xtastakyawkan lu xtapalh litaxtu chuna «la manzanas nema litatlawanit oro chu kawilikanit niku litatlawanit plata» (Prov. 25:​11, TNM). Chuntiya kaliskujwi lakgskgalalan nawanaw xlakata chuna namastayaw laktlan tastakyaw chu namakgamakglhtinanaw akxni nakinkastakyawakanan.