Tlakg liwana katlawa mioración

1, 2. 1) ¿Tuku max tlawa pi ni liwana nawaniyaw Jehová tuku makgkatsiyaw? 2) ¿La likatsiyaw pi Jehová kuenta tlawa putum tuku waniyaw?

¿MINIT kilhtamaku lakpuwanita pi watiya watiya tuku waniya Jehová kmioraciones o ni liwana lilakpuwana tuku wana? Putum akinin minit kilhtamaku chuna kinkaʼakgspulanitan. Max xlakata lhuwa tuku kilitlawatkan, kaj lakapala tlawayaw kioracioneskan. O max xlakata nitlan tuku makgkatsimaw, lakpuwanaw pi ni xlilat nalitachuwinanaw Jehová.

² Biblia wan pi tuku Jehová tlakg xlakaskinka liʼakxilha wa pi xliputum kinakujkan natachuwinanaw chu nataktujuyaw. Wa xlakata ni kalilakgaputsaw komo nila wanaw lakstlan tachuwin xlakata nalitachuwinanaw Jehová tuku makgkatsimaw. Xla kgaxmata “tuku tasaskinikgo tiku tlan likatsikgo” (Sal. 10:​17, TNM). Xla kuenta tlawa putum tuku waniyaw xlakata xlikana kinkalilakgaputsayan (Sal. 139:​1-3).

3. ¿Tuku takgalhskinin nalichuwinanaw kʼuma artículo?

³ Kʼuma artículo nalichuwinanaw umakgolh takgalhskinin: ¿Tuku xlakata ni napekuanaw nawaniyaw Jehová tuku lakpuwanaw chu tuku makgkatsiyaw? ¿La tlan nawaniyaw Jehová putum tuku makgkatsiyaw? ¿La nakinkamakgtayayan oraciones nema tatsokgtawilanit kBiblia xlakata tlakg tlan natlawayaw kioracioneskan? ¿Tuku tlan natlawayaw komo lu lakgaputsamaw chu nila wanaw putum tuku makgkatsiyaw?

NI KAPEKUANTI NATLAWANIYA ORACIÓN JEHOVÁ

4. ¿Tuku nakinkamakgtayayan nawaniyaw Jehová tuku wi kkinakujkan? (Salmo 119:145).

⁴ Tlakg ni tuwa katimakgkatsiw nawaniyaw Jehová tuku lakpuwanaw chu tuku makgkatsiyaw, komo naliʼakxilhaw la chatum amigo tiku kinkapaxkiyan chu lakaskin pi tlan kakinkakitaxtunin. Kalilakpuwaw tiku tsokgwililh Salmo 119. Xla lhuwa tuku lu nitlan titaxtulh. Makgapitsi latamanin wankgolh tuku ni xlikana xpalakata (Sal. 119:​23, 69, 78). Na nitlan xmakgkatsi xlakata xmin kilhtamaku xtlawa tuku nitlan (Sal. 119:5). Pero liskujli xlakata tlan xtalalilh Jehová, wa xlakata ni xpekuan xlitachuwinan Jehová putum tuku xwi kxnaku (kalikgalhtawakga Salmo 119:145).

5. ¿Tuku xlakata chuntiya kilitlawanitkan oración Jehová maski min kilhtamaku nitlan limakgkatsiyaw xlakata makglakgalhinanin akinin? Kalichuwinanti akgtum liʼakxilhtit.

⁵ Jehová lakaskin pi katlawanikgolh oración asta tiku tlawakgonit laklanka talakgalhin (Is. 55:​6, 7). Wa xlakata, maski min kilhtamaku nitlan limakgkatsiyaw xlakata makglakgalhinanin akinin, ni kamastaw talakaskin pi uma natlawa pi nialh natachuwinanaw Jehová. Kawiliw akgtum liʼakxilhtit, kalakpuwanti pi wix pinita niku ni lakgapasnana chu tsankgaya. Maski max maxanana, wix nakgalhskina chatum tiku xala anta xlakata nawaniyan niku tlan napina. Xtachuna la uma, komo tlawanitaw akgtum talakgalhin o komo akxilhaw pi amaw knixatlan tiji, ni kilipekuanatkan chu ni kilimaxanatkan natlawaniyaw oración Jehová (Sal. 119:​25, 176).

¿LA TLAN NAWANIYA JEHOVÁ PUTUM TUKU MAKGKATSIYA?

6, 7. ¿Tuku nakinkamakgtayayan nawaniyaw Jehová putum tuku wi kkinakujkan? Kalichuwinanti akgtum liʼakxilhtit (na kaʼakxilhti nota).

⁶ Akxni litachuwinanaw Jehová putum tuku lakpuwanaw chu tuku makgkatsiyaw, tlakg tlan talalinaw. Kalichuwinaw tuku nakinkamakgtayayan nawaniyaw Jehová putum tuku wi kkinakujkan akxni tlawaniyaw oración.

⁷ Kalilakpuwaw la likatsi Jehová.a Akxni tlakg nalilakpuwanaw xtayat Jehová, tlakg ni tuwa katimakgkatsiw nawaniyaw tuku wi kkinakujkan (Sal. 145:​8, 9, 18). Wa uma tuku tlawalh Kristine, chatum tala tiku xtlat lu xaluku xwanit. Kristine wan: «Tuwa xakmakgkatsi naktachuwinan Jehová xlakata xaklakpuwan pi xla chatum tlat tiku ni lu paxkinan. Xakmakgkatsi pi komo xakwanilh tuku nitlan xaktlawa, xʼama kintamakgatlini». ¿Tuku makgtayalh Kristine? Xla wan: «Klilakpuwa xtapaxkit Jehová nema ni makgxtakgnan chu uma kimakgtayalh nialh nakpekuan. Kkatsi pi xla ankgalhin nakimpakgachipalin, chu komo naklhtuja kkatsi pi xatapaxuwan nakimaki. Akxni klilakpuwan xtapaxkit, kimakgtaya naklitachuwinan tuku kimakgapaxuwa chu putum tuku lu nitlan kimamakgkatsini».

8, 9. ¿Tuku tlan kitaxtu akxni alisokg lilakpuwanaw tuku nawaniyaw Jehová? Kalichuwinanti akgtum liʼakxilhtit.

⁸ Alisokg kalilakpuwaw tuku nawaniyaw. Akxni nina tlawayaw oración, tlan xlilakpuwaw makgapitsi takgalhskinin chuna la umakgolh: «¿Tuku tuwa ktitaxtuma? ¿Wi tiku ni ktapatinit? ¿Wi tuku lanit kkilatamat chu kmaklakaskin xtamakgtay Jehová?» (2 Rey. 19:​15-19). Na tlan natlawayaw chuna la Jesús. Tlan naskinaw kkioracioneskan xpalakata xtukuwani Jehová, xlakata xTamapakgsin chu pi kalalh xtalakaskin (Mat. 6:​9, 10).

⁹ Chatum tala puskat tiku wanikan Aliska, lu tuwa makgkatsilh natlawani oración Jehová akxni makatsinika pi xchixku xkgalhi cáncer kxʼakskitit chu pi nialh makgas xʼama latama. Xla wan: «Lu xaklakgaputsama chu nila liwana xaklakapastaknan, ni xakkatsi tuku nakwan». ¿Tuku makgtayalh Aliska? Xla wan: «Akxni nina ktlawa oración, klimaxtu kilhtamaku xlakata naklilakpuwan tuku nakwan. Uma kimakgtaya xlakata ni kajwatiya naklichuwinan tuku kiʼakgspulama. Chu akxni ktlawa oración tlan tipalhuwa tuku kwani Jehová chu liwana kkatsi tuku kwanima».

10. ¿Tuku xlakata tlan kitaxtu pi nalimaxtuyaw kilhtamaku natlawayaw oración? (Na kaʼakxilhti dibujos).

¹⁰ Kalimaxtuw kilhtamaku xlakata natlawayaw oración. Xlikana pi akxni tlawaniyaw oración Jehová maski kaj puntsu, kinkamakgtayayan tlakg tlan natalalinaw. Pero komo tlakg lhuwa kilhtamaku natachuwinanaw, tlakg ni tuwa katikitaxtulh nawaniyaw putum tuku makgkatsiyaw.b Elijah, xchixku Aliska, wan: «Kliskuja xlakata makglhuwa naktlawani oración Jehová akgatunu kilhtamaku, chu kakxilhnit pi akxni tlakg lhuwa kilhtamaku ktachuwinan, tlakg tlan ktalalin. Xla ni puntsu puntsu akxilhma xreloj xlakata makgapalama. Wa xlakata kkatsi pi tlan naktachuwinan tlakg lhuwa kilhtamaku». Wix na tlan chuna natlawaya. Kalimaxtu kilhtamaku xlakata natlawaya oración chu kaputsa lakatum niku tlakg lhuwa kilhtamaku natachuwinana Jehová. Max tlan xputsa niku nitu naʼakgaxkuliyan chu tlan pixlanka natachuwinana Jehová. Kalakkaxwili ankgalhin chuna natlawaya, asta akxni nalismaniya.

KALILAKPUWANTI ORACIONES NEMA LICHUWINAN BIBLIA

11. ¿La nalitamakgtayaya komo nalilakpuwana oraciones nema tlawakgolh kskujnin Jehová xala makgasa? (Na kaʼakxilhti recuadro «¿Nachuna makgkatsiya la xlakan xmakgkatsikgo?»).

¹¹ Max namakgtayayan komo nalilakpuwana tuku wankgolh makgapitsi kskujnin Jehová akxni tlawanikgolh oración chu akxni kilhtlinikgolh. Komo nalilakpuwana tachuwin nema maklakaskinkgolh, max namakgtayayan nachuna nawana akxni natlawaya mioración. Max natekgsa makgapitsi tachuwin nema tlan namaklakaskina xlakata namalankiya Jehová. Chu max naʼakxilha pi makgapitsi oraciones limasiya pi kskujnin Jehová xala makgasa nachuna xmakgkatsikgo chuna la wix.

12. ¿Tuku takgalhskinin tlan nalilakpuwana?

¹² Akxni nalikgalhtawakgaya akgtum oración kBiblia, kalilakpuwanti: «¿Tiku wa umakgolh tachuwin? ¿Tuku xtitaxtuma? ¿Nachuna ktitaxtuma chuna la uma lataman? ¿Tuku kimasiyani uma?». Max natalakaskin tlakg nalakputsanana xlakata natekgsa xatakgalhtin, pero lu nalitamakgtayaya komo chuna natlawaya. Kalichuwinaw makgapitsi liʼakxilhtit.

13. ¿Tuku kinkamasiyaniyan xʼoración Ana? (1 Samuel 1:​10, 11; na kaʼakxilhti dibujo).

¹³ (Kalikgalhtawakga 1 Samuel 1:​10, 11). Akxni Ana tlawalh uma oración, xkgalhi akgtiy laklanka taʼakglhuwit: nila xkgalhi kamanan chu atanu xpuskat xchixku lu nitlan xlikatsini (1 Sam. 1:​4-7). Komo wix titaxtupat tuku tuwa chu nila tuku tlawaya xlakata namapanuya mintaʼakglhuwit, ¿tuku tlan namasiyaniyan xʼoración Ana? Xla limaxtulh kilhtamaku xlakata xlitachuwinalh Jehová putum tuku xlilakgaputsama, chu alistalh tlakg tlan makgkatsilh (1 Sam. 1:​12, 18). Nachuna katlawa chu «kamakamaxki Jehová mintakuka», kalitachuwinanti putum tuku lilakgaputsaya chu la makgkatsiya (Sal. 55:​22, TNM).

14. 1) ¿Tuku atanu kinkamasiyaniyan xliʼakxilhtit Ana? 2) Komo nalilakpuwanaw tuku wan Biblia, ¿la nakinkamakgtayayan uma tlakg tlan natlawayaw kioracioneskan? (Kaʼakxilhti nota).

¹⁴ Titaxtulh makgapitsi kata, Ana lilh xkgawasa kxlakatin Elí, sacerdote tiku tlakg xkgalhi limapakgsin (1 Sam. 1:​24-28). Ana tlawanilh akgtum oración Jehová niku paxtikatsinilh, xlakata xʼakxilhnit la Jehová kakuentajtlawa chu kamakgtaya kskujnin tiku ni makgxtakgkgo (1 Sam. 2:​1, 8, 9).c Max xtaʼakglhuwit Ana ni makgtuminika lakgsputli, pero xla kajwatiya lilakpuwa la ksikulunatlawanit Jehová. ¿Tuku kinkamasiyaniyan uma? Tlakg ni tuwa katimakgkatsiw natayaniyaw tuku tuwa titaxtumaw komo wa nalilakpuwanaw la Jehová kinkamakgtayaman.

15. ¿Tuku kinkamasiyaniyan xʼoración Jeremías? (Jeremías 12:1).

¹⁵ (Kalikgalhtawakga Jeremías 12:1). Milh kilhtamaku, palakachuwina Jeremías lu taxlajwanilh xlakata xʼakxilha pi tiku nitlan likatsikgo tlan xkakitaxtunima chu xʼakxilha pi israelitas xlikgalhkgamanankgo (Jer. 20:​7, 8). Max ni tuwa akgatekgsaw la xmakgkatsi Jeremías xlakata la uku latamanin na kinkalikgalhkgamanankgoyan chu tasiya pi tiku tlawakgo tuku nitlan, tlan kakitaxtuni. Pero maski Jeremías lichuwinalh tuku lu nitlan xlimakgkatsi, nikxni wa pi Dios ni xaʼakgstitum xlikatsi. Xla akxilhli pi Jehová tlawa tuku xaʼakgstitum akxni akxilhli la xkastakyawama xkachikin (Jer. 32:19). Akinin na tlan natlawayaw chuna la Jeremías chu nalitachuwinanaw Jehová putum tuku nitlan kinkamamakgkatsiniyan chu nalipawanaw pi xla nalakkaxtlawa tuku nitlan lama akxni xlilat.

16. ¿Tuku kinkamasiyaniyan xʼoración levita nema xchilinkanit? (Salmo 42:​1-4; na kaʼakxilhti dibujos).

¹⁶ (Kalikgalhtawakga Salmo 42:​1-4). Kʼuma takilhtlin, chatum levita lichuwinalh la xmakgkatsi xlakata xatachin xwi chu nila xkatatamakxtumi xnatalan. Max akinin nachuna makgkatsiyaw la uma levita komo nila taxtuyaw kkinchikkan o komo kinkatamaknukanitan kpulachin xpalakata kintakanajlakan. Komo chuna titaxtumaw, max puntsu tlan makgkatsiyaw chu kaj xlipuntsu lu taxlajwaniyaw, pero maski tanu tanu tuku makgkatsiyaw talakaskin nalitachuwinanaw Jehová. Kalilakpuwamparaw levita, xla akxilhli pi xwi atanu tuku tlan xtlawalh xlakata xmalankilh Jehová (Sal. 42:5). Na lilakpuwa la Jehová xkuentajtlawama (Sal. 42: 8). Komo akinin nawaniyaw Jehová putum tuku wi kkinakujkan, nakinkamakgtayayan naʼakgatekgsaw chu nalilakpuwanaw tuku makgkatsimaw, ni namalakatsaliyaw la akxilhaw tuku titaxtumaw chu nakgalhiyaw litliwakga xlakata natayaniyaw.

17. 1) ¿Tuku kinkamasiyaniyan xʼoración Jonás? (Jonás 2:​1, 2). 2) ¿La nalitamakgtayayaw makgapitsi tachuwin nema min kSalmos akxni titaxtuyaw tuku tuwa? (Kaʼakxilhti nota).

¹⁷ (Kalikgalhtawakga Jonás 2:​1, 2). Palakachuwina Jonás tlawalh uma oración akxni xwi kxpan lanka skiti. Maski ni xkgalhakgaxmatnit Jehová, Jonás liwana xkatsi pi xla xʼama kgaxmatni. Akxni tlawalh xʼoración makglhuwa limaklakaskilh tachuwin nema min kSalmos. Uma limasiya pi Jonás liwana xlakgapasa tuku wan Salmos.d Akxni lakapastakli chu lilakpuwa umakgolh Salmos, kanajlalh pi Jehová xʼama makgtaya. Xtachuna la uma, komo naliskujaw nakatsiniyaw de memoria makgapitsi textos xalak Biblia, akxni natitaxtuyaw tuku tuwa max nakilakapastakaw chu tlan nakinkamamakgkatsiniyan akxni natlawayaw oración.

CHUNTIYA KATLAWANIW ORACIÓN JEHOVÁ XLAKATA TLAKG NATALAKATSUWINIYAW

18, 19. ¿La kinkamakgtayayan Romanos 8:​26, 27 komo ni katsiyaw tuku nawanaw kkioracioneskan? Kalichuwinanti akgtum liʼakxilhtit.

¹⁸ (Kalikgalhtawakga Romanos 8:​26, 27). Max min kilhtamaku lu lakgaputsayaw chu ni katsiyaw la nawanaw tuku makgkatsiyaw kkioracioneskan. Pero ama kilhtamaku espíritu santo kinkamakgtayayan chu «kinkapalakaskinan». ¿Tuku wamputun uma? Jehová limaklakaskilh xʼespíritu santo xlakata xmatsokgninalh lhuwa oraciones anta kBiblia. Wa xlakata, akxni ni katsiyaw la nawanaw tuku lakpuwamaw, Jehová akxilha makgapitsi tachuwin nema wankgolh kskujnin xala makgasa kxʼoracioneskan chu liʼakxilha la komo akinin xwaw chu kinkakgalhtiyan.

¹⁹ Wa uma tuku makgtayalh Elena, chatum tala xalak Rusia, tiku tamaknuka kpulachin xlakata likgalhtawakga Biblia chu tlawa oración. Xla lu xlakgaputsama chu tuwa xmakgkatsi natlawa oración. Xla wan: «Klakapastakli pi komo lu nitlan kmakgkatsi chu ni kkatsi tuku nakskin kkioración, Jehová tlan namakgamakglhtinan oraciones nema tatsokgtawilanit kBiblia chu naliʼakxilha la komo akit ktlawanima». Chu wampa: «Uma lu tlan kimamakgkatsinilh akxni xaktitaxtuma tuku lu tuwa».

20. ¿Tuku nakinkamakgtayayan tlakg ni tuwa namakgkatsiyaw natlawayaw oración akxni lhuwa tuku lilakgaputsamaw?

²⁰ Akxni lhuwa tuku lilakgaputsamaw, max tuwa namakgkatsiyaw ni atanu tuku nalilakpuwanaw akxni tlawamaw oración. ¿Tuku tlan nakinkamakgtayayan? Tlan xkgaxmatwi grabación xla Salmos o xtlawaw chuna la mapakgsina David chu xtsokgwiliw tuku makgkatsiyaw (Sal. 18, 34, 142 chu tuku litsuku akgatunu capítulo). Pero xlakata ni lakxtum akinin, chatunu kstalanina Cristo xliputsat tuku tlakg tlan namakgtaya xlakata nalakkaxwili tuku nawan kxʼoración (Sal. 141:2). ¿Tuku tlakg makgtayayan wix?

21. ¿Tuku xlakata tlan nalitachuwinanaw Jehová tuku wi kkinakujkan?

²¹ Lu tlan limakgkatsiyaw xlakata katsiyaw pi Jehová akgatekgsa tuku makgkatsiyaw asta maski nina litachuwinanaw (Sal. 139:4). Pero xla lakgati kinkakgaxmatniyan chu tlan limakgkatsi akxni akxilha pi lipawanaw. Wa xlakata, katlawaniw oración kinTlatkan xalak akgapun. Kamaklakaskiw tachuwin nema min kʼoraciones nema tatsokgtawilanit kBiblia. Kawaniw putum tuku wi kkinakujkan chu kalitachuwinaw tuku lilakgaputsayaw chu tuku kinkamakgapaxuwayan. Jehová chatum xatlan amigo chu ankgalhin nakinkamakgtayayan.