Kakapalakaskiw amakgapitsin kkioracioneskan

1. ¿La likatsiyaw pi Jehová xlakaskinka liʼakxilha kioracioneskan?

ORACIÓN akgtum lu tlan tamaskiwin. Kalilakpuwaw uma: Jehová kalakgayawanit ángeles makgapitsi taskujut, chu na lakgayawanit Jesús xlakaskinka taskujut (Sal. 91:11; Mat. 28:18). Pero kajwatiya Jehová «tiku kgaxmata oración»; ni atanu tiku lakgayawanit uma (Sal. 65:​2, La Biblia. Traducción del Nuevo Mundo). Xla kgaxmatputun kioracioneskan.

2. ¿Tuku tlan liʼakxilhtit kinkawilinin apóstol Pablo?

² Tlan nawaniyaw Jehová putum tuku lilakgaputsayaw, pero na talakaskin nakapalakaskinaw amakgapitsin. Wa uma tuku tlawalh apóstol Pablo. Kawanilh putum kstalaninanin Cristo xalak congregación xla Éfeso: «Chuntiya ktlawa oración mimpalakatakan» (Efes. 1:16). Pero xla na xkapalakaskin chatunu natalan. Akgtum liʼakxilhtit, Pablo wanilh Timoteo: «Kpaxtikatsini Dios, […] chu ankgalhin klakapastakan akxni ktasaskin kkioración kakuwani chu katsisni» (2 Tim. 1:3). Pablo lhuwa tuku nitlan xtitaxtuma, chu tlan kajwatiya uma xlichuwinalh kxʼoración, pero limaxtulh kilhtamaku xlakata xkapalakaskilh amakgapitsin (2 Cor. 11:23; 12:​7, 8).

3. ¿Tuku xlakata min kilhtamaku patsankgayaw nakapalakaskinaw amakgapitsin?

³ Max namin kilhtamaku napatsankgayaw nakapalakaskinaw amakgapitsin. ¿Tuku xlakata? Sabrina,a chatum tala puskat, wan: «Kʼuma kakilhtamaku lhuwa tuku kilitlawatkan. Max kajwatiya natsukuyaw lilakgaputsayaw kintaʼakglhuwitkan chu kajwatiya nalichuwinanaw uma kkioracioneskan». Komo chuna kinkaʼakgspulaman, uma artículo lu nakinkamakgtayayan. Nalichuwinanaw tuku xlakata lu xlakaskinka nakapalakaskinaw amakgapitsin. Chu nalichuwinanaw la tlan chuna natlawayaw.

¿TUKU XLAKATA LU XLAKASKINKA?

4, 5. ¿Tuku xlakata wanaw pi «tlan kamakgtaya» amakgapitsin akxni kapalakaskinaw kkioracioneskan? (Santiago 5:16).

⁴ Akxni kapalakaskinaw amakgapitsin, lu kamakgtayayaw (kalikgalhtawakga Santiago 5:16). ¿Pero xlikana kamakgtayayaw amakgapitsin akxni kapalakaskinaw kkioracioneskan? Chuna. Jesús xkatsi pi apóstol Pedro xʼama wan pi ni xlakgapasa, wa xlakata wanilh: «Kskininit Dios mimpalakata xlakata mintakanajla ni nataxlajwani» (Luc. 22:32). Pablo na xkatsi pi oración lu makgtayanan. Wa xlakata, akxni xatachin xwi kxchik kRoma, tsokgnanilh Filemón: «Xpalakata miʼoracioneskan, akit max naktaxtu kpulachin chu tlan nakkalakgapaxialhnanan» (Filem. 22). Chu chuna lalh. Ni lhuwa kilhtamaku titaxtulh makgxtakgka chu tsukupa lichuwinan Dios.

⁵ Pero uma ni wamputun pi Jehová ankgalhin xlitlawat tuku waniyaw kkioracioneskan. Maski chuna, xla kuentajtlawa tuku lilakgaputsayaw chu min kilhtamaku tlawa tuku akinin skiniyaw. Xlakata katsiyaw pi Jehová chuna likatsi, kinkamakgpuwantiniyan nalitachuwinanaw tuku lilakgaputsayaw chu nalipawanaw pi xla natlawa tuku tlakg tlan kimpalakatakan (Sal. 37:5; kaʼakxilhti 2 Corintios 1:11 chu notas de estudio xaʼespañol).

6. ¿La litamakgtayayaw akxni kapalakaskinaw amakgapitsin? (1 Pedro 3:8).

⁶ Akxni kapalakaskinaw amakgapitsin, kinkamakgtayayan xalakgalhamana nawanaw (kalikgalhtawakga 1 Pedro 3:8). Chatum lataman tiku xalakgalhamana, kuentajtlawa tuku nitlan titaxtumakgo amakgapitsin chu kamakgtayaputun (Mar. 1:​40, 41). Michael, chatum kgolotsin xalak congregación, wan: «Akxni kkapalakaskin amakgapitsin kkioración, tlakg liwana kʼakgatekgsa tuku titaxtumakgo chu tlawa pi tlakg nakkapaxki maski xlakan ni katsikgo». Richard, atanu kgolotsin xalak congregación, lichuwinan atanu tuku tlan kitaxtu: «Akxni wi tiku palakaskinaw kkioracionkan, tlawa pi tlakg namakgtayaputunaw». Chu wampara: «Akxni makgtayayaw tiku palakaskiw kkioracionkan, xtachuna la xmakgtayanaw xkgantaxtulh tuku skiniw Jehová».

7. Kalichuwinanti atanu la litamakgtayayaw akxni kapalakaskinaw amakgapitsin (Filipenses 2:​3, 4; na kaʼakxilhti dibujos).

⁷ Akxni kapalakaskinaw amakgapitsin, kinkamakgtayayan ni namalakatsaliyaw la akxilhaw tuku titaxtumaw (kalikgalhtawakga Filipenses 2:​3, 4). Xlakata lamaw kkakilhtamaku niku mapakgsinama Satanás, kimputumkan titaxtuyaw tuku tuwa (1 Juan 5:19; Apoc. 12:12). Akxni kapalakaskinaw amakgapitsin, kinkamalakapastakayan pi putum kinatalankan «kxlikalanka katiyatni nachuna patinamakgolh» (1 Ped. 5:9). Katherine, chatum precursora, wan: «Akxni kkapalakaskin amakgapitsin, kimalakapastaka pi ni kiʼakstu ktitaxtuma tuku nitlan. Uma kimakgtaya ni lu naklilakgaputsa tuku ktitaxtuma».

¿TIKU MAKLAKASKINKGO NAKAPALAKASKINAW?

8. ¿Tiku tlan nakapalakaskinaw kkioracioneskan?

⁸ ¿Tiku tlan nakapalakaskinaw kkioracioneskan? Tlan nakapalakaskinaw tiku kgalhikgo akgtum tajatat, kamanan tiku kalikgalhkgamanankan chu kamatlawiputunkan tuku nitlan kʼescuela o tiku linkgoya kata. Nachuna, lhuwa natalan kaliputsastalanimaka xlakata xtakanajlakan. Max tiku xalak xfamiliajkan kasitsinikgo o mapakgsinanin (Mat. 10:​18, 36; Hech. 12:5). Amakgapitsin makgxtakgkgonit xchikkan xlakata kxkachikinkan anan taʼakglhuwit xpalakata política chu amakgapitsin patinamakgo xlakata wi tuku masputunan. Max ni kalakgapasaw umakgolh natalan, pero akxni kapalakaskinaw kkioracioneskan, makgantaxtimaw limapakgsin tuku wa Jesús, pi nalapaxkiyaw kinchatunukan (Juan 13:34).

9. ¿Tuku xlakata talakaskin nakapalakaskinaw kkioracioneskan natalan tiku kgalhikgo lhuwa taskujut kxkachikin Jehová chu xlakpuskatinkan?

⁹ Na tlan nakapalakaskinaw natalan tiku kgalhikgo lhuwa taskujut kxkachikin Jehová, chuna la Lakgkgolotsin tiku Pulalinankgo chu xmakgtayananin, Comités de Sucursal, tiku wi tuku kalakgayawakanit ksucursales, superintendentes de circuito, lakgkgolotsin xalak congregación chu siervos ministeriales. Lhuwa umakgolh natalan na wi tuku lu lilakgaputsakgo chu lhuwa tuku tlawakgo kimpalakatakan (2 Cor. 12:15). Mark, chatum superintendente de circuito, wan: «Pulaktum tuku tlakg tuwa kmakgkatsi, wa pi makgat kwi lata niku wilakgo kinatlatni. Xlakan linkgoya kata chu tatatlakgo. Maski kintala tsumat chu xchixku xatapaxuwan kakuentajtlawakgo, nitlan klimakgkatsi xlakata nila kkan kakuentajtlawa». Maski ni liwana katsiyaw tuku lilakgaputsakgo umakgolh natalan, tlan nakapalakaskinaw kkioracioneskan (1 Tes. 5:​12, 13). Na tlan nakapalakaskinaw xlakpuskatinkan, tiku xatapaxuwan makgtayakgo xlakchixkuwinkan xlakata chuntiya namakgantaxtikgo xtaskujutkan nema kalakgayawakanit.

10, 11. ¿Lakgati Jehová akxni tlawayaw oraciones niku ni kamapakuwiyaw chatunu chatunu natalan?

¹⁰ Chuna la lichuwinanitaw, min kilhtamaku nila kapalakaskinaw kkioracionkan chatunu chatunu natalan. Wata max skiniyaw Jehová pi kakakuentajtlawalh putum natalan tiku tanumakgo kpulachin o tlan kakamamakgkatsinilh tiku lipuwamakgo xlakata nilh chatum tiku xpaxkikgo. Donald, chatum kgolotsin xalak congregación, wan: «Anan lhuwa natalan tiku titaxtumakgo tuku tuwa, wa xlakata kapalakaskinaw kʼoración putum umakgolh natalan».

¹¹ ¿Lakgati Jehová akxni tlawayaw oraciones niku ni kamapakuwiyaw chatunu natalan? ¡Chuna! Akinin nila katsiyaw tuku titaxtumakgo chatunu xlakskujnin. Wa xlakata tlan natlawayaw oraciones niku tlan nakapalakaskinaw putum natalan (Juan 17:20; Efes. 6:18). Umakgolh oraciones limasiya pi kapaxkiyaw «putum natalanin» (1 Ped. 2:17).

AKXNI KAPALAKASKINAW CHATUNU NATALAN

12. Komo nakalilakpuwanaw chatunu natalan, ¿tuku nakinkamakgpuwantiniyan natlawayaw?

¹² Kakalilakpuwaw natalan. Ni kajwatiya kakapalakaskiw putum natalan kkioracioneskan, na tlan nakapalakaskinaw xchatunukan. ¿Anan kmincongregación tiku kgalhi akgtum tajatat? ¿Anan chatum kgawasa o tsumat tiku lipuwama xlakata matlawiputunkan tuku nitlan kʼescuela? ¿Anan chatum tala tiku xʼakstu makgastakma xkgawasa o xtsumat chu liskujma namasiyani «xlimapakgsin Jehová»? (Efes. 6:4). Komo nakalilakpuwanaw chatunu natalan, nakinkamakgtayayan tlakg liwana nakaʼakgatekgsniyaw chu uma nakinkamakgpuwantiniyan nakapalakaskinaw kkioracioneskan (Rom. 12:15).b

13. ¿Tlan nakamapakuwiyaw kkioracioneskan natalan tiku ni kalakgapasaw?

¹³ Kakamapakuwiw natalan. Asta natalan tiku ni kalakgapasaw tlan nakamapakuwiyaw kkioracioneskan. Akgtum liʼakxilhtit, kakalilakpuwaw natalan tiku tanumakgo kpulachin kCrimea, kʼEritrea, kRusia chu kSingapur. Ksitio jw.org tlan nakatekgsaw xtukuwanikan.c Brian, chatum superintendente de circuito, wan: «Akxni ktsokgwili xtukuwani chatum tala tiku tanuma kpulachin chu pixlanka kwan xtukuwani, tlakg ni tuwa kmakgkatsi nakkilakapastaka alistalh chu tlan nakmapakuwi kkioración».

14, 15. ¿Tuku nakinkamakgtayayan liwana nakatsiyaw tuku nawaniyaw Jehová kkioracioneskan?

¹⁴ Liwana kawaniw Jehová tuku lakaskinaw. Michael, tiku lichuwinaw kpárrafo 6, wan: «Akxni klikgalhtawakga kjw.org tuku titaxtumakgo natalan tiku tanumakgo kpulachin, klilakpuwan tuku xaktlawalh komo anta xaktawi. Max xaklilakgaputsalh kimpuskat chu xaklakaskilh pi wi tiku xmakgtayalh xlakata xkgalhilh tuku xmaklakaskilh. Uma kimakgtaya nakwani Jehová tuku klakaskin katlawalh xpalakata natalan tiku tanumakgo kpulachin chu makgaxtokgkgo» (Heb. 13:​3, nota).

¹⁵ Komo nalilakpuwanaw tuku titaxtukgo chali chali natalan tiku wilakgo kpulachin, nakinkamakgtayayan liwana nakatsiyaw tuku naskinaw kkioracioneskan. Akgtum liʼakxilhtit, tlan naskiniyaw Jehová pi policías tiku kuentajtlawakgo pulachin tlan kakalikatsinikgolh natalan o pi mapakgsinanin kakamaxkikgolh talakaskin nakakninanikgo (1 Tim. 2:​1, 2). Na tlan naskiniyaw Jehová pi xatlan xliʼakxilhtitkan umakgolh natalan kakamatliwakglhi amakgapitsi natalan xala anta, chu pi kakamakgpuwantinilh tiku ni xtatayananin Jehová namakgamakglhtinankgo xatlan tamakatsinin (1 Ped. 2:12). Pero putum uma tuku lichuwinanitaw, na tlan chuna natlawayaw akxni nakapalakaskinaw kaxatikawa natalan chu ni kajwatiya tiku tanumakgo kpulachin. Komo nakalilakpuwanaw natalan, nakamapakuwiyaw kkioracioneskan chu liwana nawaniyaw Jehová tuku lakaskinaw pi kakalimakgtayalh, nalimasiyayaw pi lu kapaxkiyaw (1 Tes. 3:12).

KALAKAPASTAKWI PI DIOS KATSI LA TLAKG TLAN NAKINKAKGALHTIYAN

16. ¿Tuku kililakapastakatkan akxni tlawayaw oración? (Mateo 6:8).

¹⁶ Chuna la akxilhnitaw, kioracioneskan kgalhi lhuwa litliwakga chu tlan kamakgtaya amakgapitsin. Pero kililakapastakatkan pi Jehová katsi la tlakg tlan nakinkakgalhtiyan. Akxni tlawayaw oración, xla katsiya tuku amaw litachuwinanaw chu ni maklakaskin nawaniyaw la xlilakkaxtlawat tuku titaxtuma chatum tala. Xla tlakg liwana katsi tuku maklakaskinkgo kskujnin nixawa akinin (kalikgalhtawakga Mateo 6:8). Komo chuna, ¿tuku xlakata talakaskin nakapalakaskinaw kkioracioneskan amakgapitsin? Kʼuma artículo lichuwinanitaw makgapitsi tuku xlakata chuna kilitlawatkan. Pero wi atanu tuku xlakata: Akxni chuna tlawayaw, limasiyayaw pi kalilakgaputsaw amakgapitsin chu kapaxkiyaw. Chu Jehová lu paxuwa akxni akxilha pi stalaniyaw xliʼakxilhtit chu paxkinanaw.

17, 18. Kalichuwinanti akgtum liʼakxilhtit nema limasiya pi Jehová kuenta tlawa tuku wanaw kkioracioneskan.

¹⁷ Asta maski lakpuwanaw pi kioracioneskan ni kamakgtayama amakgapitsin, akxni kapalakaskinaw kinatalankan limasiyayaw pi kapaxkiyaw, chu Jehová xlakaskinka liʼakxilha uma. Kalilakpuwaw chatum tlat tiku kgalhi chatum aktsu xkgawasa chu aktsu xtsumat. Aktsu xkgawasa tatatla chu ma kputama, chu xtsumat puntsu puntsu wani: «Katlawa litlan, kamakgtaya kintala. Lu tatatla». Xtlat katsiya tuku xlitlawat, paxki xkgawasa chu kuentajtlawamaja, pero paxuwa akxni akxilha pi xtsumat paxki xtala pi asta wani kakuentajtlawalh.

¹⁸ Xtachuna la uma, Jehová lakaskin pi kakalilakgaputsaw amakgapitsin chu kakapalakaskiw kkioracioneskan. Chuna nalimasiyayaw pi ni kajwatiya lilakgaputsayaw tuku akinin titaxtumaw, wata na kalilakgaputsayaw natalan, chu Jehová ni katipatsankgalh (2 Tes. 1:3; Heb. 6:10). Nachuna, akxilhwi pi tuku wanaw kkioracioneskan tlan nalakgpali tuku titaxtuma chatum lataman. Wa xlakata, ¡ankgalhin kakapalakaskiw natalan kkioracioneskan!