Chatiy natalan tiku na katatapakgsikgo Lakgkgolotsin tiku Pulalinankgo
KILHTAMAKU 5 xla octubre kata 2024, mastaka akgtum tamakatsinin ktamakxtumit nema tlawakan akgatunu kata: tala Jody Jedele chu Jacob Rumph katatapakgsikgolh Lakgkgolotsin tiku Pulalinkgo xtatayananin Jehová. Xchatiykan makgasata lata skujnanimakgo Jehová.
Jody Jedele chu xpuskat, Dámaris
Tala Jody lakachilh kMisuri (Estados Unidos). Xnatlatni masiyanikgolh tuku xaxlikana. Xlakan xlamakgo niku ni lhuwa xtatayananin Jehová xʼanankgo. Wa xlakata natalan kxlikalanka Estados Unidos xʼankgo makgtayanankgo anta xlakata xlichuwinankgolh Dios, chu chuna tala Jody kalakgapasli lhuwa natalan. Akxni akxilhli pi kxkachikin Jehová lu lapaxkikan chu makxtum wilaka, lu matliwakglhli. Tamunulh 15 xla octubre kata 1983 chu lu xlakgati xlichuwinan Dios. Wa xlakata, precursor regular litaxtulh septiembre kata 1989, akxni masputulh xtakgalhtawakga kʼescuela.
Akxni xla chu xtala tsumat laktsujku xwankgonit, xnatlatni xkalinkgo kBetel. Uma kamakgpuwantinilh pi na kskujputunkgolh anta. Chu xchatiykan chuna tlawakgolh. Septiembre kata 1990, Jody tsukulh makgtayanan kBetel xalak Wallkill. Xapulana skujli kDepartamento de Limpieza chu alistalh kDepartamento de Servicios Médicos.
Ama kilhtamaku, lakatsu ksucursal xwilakgo congregaciones nema xchuwinankgo español chu lakapala xtalhuwimakgo, chu xtalakaskin natalan lakchixkuwin tiku xmakgtayanankgolh. Tala Jody tsukulh an kʼakgtum congregación xaʼespañol chu tsukulh katsini uma tachuwin. Ni makgas titaxtulh lakgapasli chatum precursora tiku na xalak xcircuito xwanit, xwanikan Dámaris. Titaxtulh kilhtamaku, tamakgaxtokgkgolh chu Dámaris na tsukulh skuja kBetel.
Kkata 2005 taxtukgolh kBetel xlakata xtalakaskin xkuentajtlawakgolh xtse Jody chu xnatlatni Dámaris. Putum uma kilhtamaku precursores regulares litaxtukgolh, chu tala Jody makglhuwa makgalhtawakgena litaxtulh kʼEscuela xla Precursor. Na makgtayanalh kComité de Enlace con los Hospitales chu kComité Regional de Construcción nema xmakgtayanama niku xlakan xlamakgo.
Kkata 2013 kaʼinvitarliparaka kBetel, pero uma kilhtamaku kawanika pi xmakgtayanankgolh ktaskujut nema xtlawamaka kWarwick. Lata ama kilhtamaku na makgtayanankgonit kPatterson chu kWallkill. Tala Jody makgtayananit kDepartamento Local de Diseño y Construcción chu Servicios de Información sobre Hospitales. Marzo kata 2023, xmakgtayana Comité de Servicio limaxtuka. Jody lichuwinan tsinu la makgkatsinit akxni lakgayawakanit tanu tanu taskujut. Xla wan: «Min kilhtamaku lu lilakgaputsayaw akxni kinkalakgayawakanan xasasti taskujut. Pero uma kilhtamaku kililakapastakatkan pi lu xlakaskinka nalipawanaw Jehová, xlakata wa Jehová tiku tlawa pi chuna kakikgantaxtulh».
Jacob Rumph chu xpuskat, Inga
Tala Jacob lakachilh kCalifornia (Estados Unidos). Akxni aktsujku xwanit, xtse nialh alh ktamakxtumit chu nialh lichuwinalh Dios. Maski chuna, lu xliskuja nakamasiyani xkamanan tuku masiya Biblia. Uma kilhtamaku, Jacob na x’an lakgapaxialhnan xnana, tiku kskujnani Jehová, chu xla lu makgtayalh xlakata xkatsiputulh xaxlikana. Wa xlakata akxni Jacob xkgalhi 13 kata skilh pi xmakgalhtawakgeka. Chu 27 xla septiembre kata 1992, tamunulh. Nachuna, xtse tsukupa an ktamakxtumit chu tsukupa lichuwinan Dios, chu xtlat chu xnatalan na tsukukgolh matliwakglhkgo xtakanajlakan chu na tamunukgolh.
Akxni tala Jacob kgawasaku xwanit, x’akxilha pi precursores lu xpaxuwakgo. Wa xlakata, akxni masputulh xtakgalhtawakga k’escuela, precursor litaxtulh, septiembre kata 1995. Kkata 2000, alh makgtayanan kʼEcuador, niku tlakg xtalakaskin tiku xlichuwinankgolh Dios. Anta lakgapasli Inga, chatum precursora xalak Canadá, chu alistalh tamakgaxtokgkgolh. Akxni aku xtamakgaxtokgkgonit, makgtayanankgolh k’akgtum aktsu kachikin xalak Ecuador niku kaj akgtum grupo x’anan. La uku, k’uma kachikin wi akgtum congregación niku anankgo lhuwa natalan.
Titaxtulh kilhtamaku precursores especiales kalimaxtuka, chu alistalh superintendentes de circuito. Kkata 2011 kawanika pi x’ankgolh kclase 132 xla Escuela de Galaad. Akxni masputukgolh uma escuela, lakalhuwa niku kamalakgachaka xlakata xmakgtayanankgolh, chu chuna la titaxtunit kilhtamaku tipalhuwa taskujut nema kalakgayawakanit, milh kilhtamaku betelitas litaxtukgolh, misioneros chu superintendentes de circuito. Jacob na kgalhinit talakgalhaman pi makgalhtawakgena nalitaxtu k’Escuela xla Tiku lichuwinankgo xTamapakgsin Dios.
Xlakata xʼanan pandemia xla COVID-19, tala Jacob chu xpuskat taspitkgolh kʼEstados Unidos. Kawanika pi xmakgtayanankgolh kBetel xalak Wallkill. Anta Departamento de Servicio masiyanilh tala Jacob la xmakgantaxtilh taskujut nema xʼamaka lakgayawakan. Alistalh kamalakgachaka ksucursal xalak Ecuador, chu anta Jacob makgtapakgsilh kComité de Sucursal. Kkata 2023, kamalakgachaka kWarwick, chu kkata 2024 xmakgtayana Comité de Servicio limaxtuka. Akxni Jacob lakapastaka kachikinin niku makgtayanankgonit, xla wan: «Tuku tlakg xlakaskinka ni wa niku skujnanimaw Jehová, wata wa pi akxtum kataskujmaw kinatalankan».
Lu xtapalh liʼakxilhaw taskujut nema tlawakgo umakgolh natalan chu lu kapaxkiyaw (Filip. 2:29).