Jesús chatum Sacerdote tiku lakgalhamaninan

1, 2. 1) ¿Tuku xlakata Jehová makamilh xKgawasa kKatiyatni? 2) ¿Tuku nalichuwinanaw kʼuma artículo? (Hebreos 5:​7-9).

TITAXTUNITA max 2,000 kata lata Jehová makamilh xKgawasa tiku tlakg xpaxki unu kKatiyatni. ¿Tuku xlakata makamilh? Xlakata xkalakgmaxtulh latamanin ktalakgalhin chu klinin chu xlakata xlaktlawalh putum tuku nitlan tlawanit Satanás (Juan 3:16; 1 Juan 3:8). Jehová na xkatsi pi tuku xtitaxtulh Jesús unu kKatiyatni xʼama makgtaya xlakata tlakg tlan Sacerdote xlitaxtulh, uma wamputun pi xkinkalakgalhaman chu xʼakgatekgsli tuku makgkatsiyaw. Jesús Sacerdote litaxtulh akxni tamunulh, kkata 29.a

² Kʼuma artículo nalichuwinanaw la makgtayalh Jesús tuku titaxtulh kKatiyatni xlakata tlakg xalakgalhamana Sacerdote xlitaxtulh. Lu xlakaskinka liwana naʼakgatekgsaw uma xlakata nakinkamakgtayayan natalakatsuwiniyaw Jehová chu natlawaniyaw oración, liwaka akxni lu nitlan limakgkatsiyaw kintalakgalhinkan o tuku nitlan tlawanitaw (kalikgalhtawakga Hebreos 5:​7-9).

XKGAWASA DIOS NEMA TLAKG XPAXKI MILH KKATIYATNI

3, 4. ¿La talakgpalilh xlatamat Jesús akxni milh kKatiyatni?

³ Lhuwa akinin max minit kilhtamaku wi tuku talakgpalinit kkilatamatkan. Max talakaskinit namakgxtakgaw kachikin niku lu xlakgatiyaw chu talakaskinit nakamakgxtakgaw kifamiliajkan chu kiʼamigoskan. Akxni chuna kinkaʼakgspulayan, lu tuwa tamakgkatsi. Pero maski wi tuku talakgpali kxlatamatkan latamanin, nipara tsinu tatalakxtumi tuku Jesús tlawalh xlakata xmilh latama unu kKatiyatni. Xliputum xkamanan Dios, Jesús wa tiku tlakg xlakaskinka xlitaxtu. Jehová lu xpaxki chu xla ankgalhin xatapaxuwan xtawi xTlat (Sal. 16:11; Prov. 8:30). Pero Filipenses 2:7 kinkamasiyaniyan pi Jesús xatapaxuwan «makgxtakgli putum tuku xkgalhi» xlakata xmilh kKatiyatni chu xkatalatamalh tiku makglakgalhinanin xlitaxtukgo.

⁴ Na kalilakpuwaw la xwanit xlatamat Jesús akxni aktsujku xwanit. Xla lakachilh kʼakgtum familia niku ni lhuwa tuku xkgalhikgo. Tamakamastan nema tlawakgolh xnatlatni akxni lakachilh, limasiya pi ni lhuwa tumin xkgalhikgo (Lev. 12:8; Luc. 2:24). Nachuna, akxni mapakgsina Herodes katsilh pi xlakachinit, xmakgniputun. Xlakata ni xmakgnika, tsalakgolh kʼEgipto chu anta latamakgolh makgapitsi kilhtamaku (Mat. 2:​13, 15). ¡Putum uma limasiya pi xlatamat Jesús lu talakgpalilh!

5. ¿Tuku akxilhli Jesús akxni xlama unu kKatiyatni chu la makgtayalh uma xlakata tlakg tlan Sacerdote xlitaxtulh? (Na kaʼakxilhti dibujo).

⁵ Akxni Jesús kilatamachi kKatiyatni, akxilhli pi lhuwa latamanin xpatinamakgo. Makgkatsilh la tamakgkatsi akxni niy chatum tiku lu paxkiyaw xlakata nikgolh makgapitsi tiku xla xkalakgapasa chu xkapaxki, chuna la xtlat, José. Akxni xlichuwinampula Dios, katatanokglhli tiku xkgalhikgo lepra, tiku nila xʼakxilhkgo, nila xkgaxmatkgo, tiku nila xtlawankgo, o tiku xlipuwamakgo xlakata xninit chatum xkgawasakan o xtsumatkan, chu Jesús kalakgalhamalh putum umakgolh latamanin (Mat. 9:​2, 6; 15:30; 20:34; Mar. 1:​40, 41; Luc. 7:13). Xlikana pi akxni xwilacha kʼakgapun xʼakxilhnit la patinankgo latamanin, pero akxni kilachi kKatiyatni tlakg liwana akgatekgsli la makgkatsikgo (Is. 53:4). Tuku titaxtulh makgtayalh tlakg liwana naʼakgatekgsa talipuwan chu talakgaputsit nema kgalhikgo latamanin. Xla na patinalh, tlakgwalh chu lakgaputsalh chuna la akinin.

JESÚS KAʼAKGATEKGSNILH LATAMANIN

6. ¿Tuku kinkamasiyaniyan liʼakxilhtit nema maklakaskilh palakachuwina Isaías? (Isaías 42:3).

⁶ Akxni xlichuwinama Dios kKatiyatni, Jesús limasiyalh pi xkaʼakgatekgsni tiku ni lakgtliwakgan xwankgonit chu nitlan xkalikatsinikan. Chuna makgantaxtilh pulaktum tuku Dios malakpuwanilh palakachuwina Isaías pi xtsokgwililh. Tatsokgni xaHebreo wan pi latamanin tiku lakgtliwakgan chu lhuwa tuku kgalhikgo, litaxtukgo la lakstlan jardines nema lhuwa tuku makgalakgo chu chuna la laklanka kiwi (Sal. 92:12; Is. 61:3; Jer. 31:12). Pero lakglimaxkgenin, wankan pi litaxtukgo chuna la kgatit nema tachuntanit chu mecha nema mixmaja, chu latamanin nialh xlakaskinka liʼakxilhkgo uma (kalikgalhtawakga Isaías 42:3). Akxni Isaías limaklakaskilh umakgolh liʼakxilhtit, limasiyalh pi Jesús xʼama kapaxki chu xʼama kalakgalhaman tiku nialh xtapalh kaliʼakxilhkan.

7, 8. ¿La makgantaxtilh Jesús tuku xlichuwinanit palakachuwina Isaías?

⁷ Mateo wa pi Jesús makgantaxtilh tuku lichuwinalh Isaías: «Ni katilaktukxli xatalakchunta kgatit, chu ni katimamixilh akgtum mecha nema jima» (Mat. 12:20). Lhuwa milagros nema tlawalh Jesús wa litamakgtayakgolh tiku nitlan xkalikatsinikan o tiku xlakpuwankgo pi nialhla xʼama lakkaxla tuku xtitaxtumakgo. Kalilakpuwaw chixku tiku xlitsama lepra. Max lu xlipuwan xlakata xkatsi pi nialh xʼama paksa chu nialhla akxtum xkatatawilapa xfamilia chu xʼamigos (Luc. 5:​12, 13). O kalakapastakwi chixku tiku nila xkgaxmata chu na nila liwana xchuwinan. Max lu nitlan xlimakgkatsi akxni xʼakxilha pi amakgapitsin xatapaxuwan xkgalhchuwinankgo chu xla nila xmakgkgalhchuwinan (Mar. 7:​32, 33). Pero ni kajwatiya uma.

⁸ Kxkilhtamaku Jesús, lhuwa judíos xlakpuwankgo pi tiku xtatatlakgo o tiku wi tuku xkatsankgani kxmaknikan kaj xlakgaxokgomakgo xtalakgalhinkan o xtalakgalhinkan xnatlatnikan (Juan 9:2). Wa xlakata, tiku xtatatlakgo o wi tuku xkatsankgani kxmaknikan, xkalakgmakgankan. Pero Jesús kamapaksalh chu kamakgtayalh nalipawamparakgo Dios, chu chuna makgantaxtilh tuku palakachuwina Isaías xlichuwinanit. ¿Tuku kinkamasiyaniyan uma?

9. ¿La limasiya Hebreos 4:​15, 16 pi Jesús chatum Sacerdote tiku lu xalakgalhamana?

⁹ (Kalikgalhtawakga Hebreos 4:​15, 16). Tlan nalipawanaw pi Jesús lu kinkalakgalhamanan. Tachuwin xagriego nema unu matitaxtikan «kinkaʼakgatekgsniyan akxni xlajwananaw», wamputun pi xla makgkatsi xtalipuwan chu xtakatsanajwat achatum. Tuku lichuwinankan xlakata milagros nema tlawalh Jesús masiya pi xla lu nitlan xlimakgkatsi akxni xʼakxilha pi amakgapitsin xpatinamakgo. Xla xkamapaksa latamanin pero ni kaj xlakata chuna xlitlawat xwanit, wata chuna xtlawa xlakata xkalakgalhaman chu xkamakgtayaputun. Kalilakpuwaw chixku tiku xkgalhi lepra. Jesús tlan lakgamakgat xmapaksalh, pero nichuna tlawalh, wata xamalh. Max makgasata xtitaxtunit lata niti kxamanit uma chixku. Na lu tlan likatsinilh chixku tiku nila xkgaxmata, xlakata makgat lilh akxni mapaksalh, niku ni xʼanankgo latamanin. Chu kalilakpuwaw akxni fariseo lakgmakgalh puskat tiku nitlan xlimakgkatsi xtalakgalhin. Uma puskat limaklakaskilh xlakgaxtajat xlakata xtuchakgelh Jesús chu limaskakanilh xchixit xtantun. Akxni Jesús akxilhli tuku fariseo xlakpuwama, xla kgalhmakgtayalh uma puskat (Mat. 8:3; Mar. 7:33; Luc. 7:44). Jesús nikxni kalakgmakgalh tiku xtatatlakgo chu tiku xtlawakgonit laklanka talakgalhin. Wata xatapaxuwan kamakgamakglhtinalh chu kalimasiyanilh talakgalhaman. Tlan nalipawanaw pi Jesús nachuna kinkalikatsiniyan la uku.

STALANIYAW XLIʼAKXILHTIT SACERDOTE NEMA KGALHIYAW

10. ¿Tuku tlan nakalimakgtayayaw kxtakanajlakan tiku nila kgaxmatkgo chu nila akxilhkgo? (Na kaʼakxilhti dibujos).

¹⁰ Xlakata stalaniputunaw xliʼakxilhtit Jesús, lu liskujaw nakapaxkiyaw latamanin, nakalakgalhamanaw chu nakaʼakgatekgsniyaw (1 Ped. 2:21; 3:8). Xlikana pi nila kamapaksayaw tiku nila kgaxmatkgo chu tiku nila akxilhkgo, pero tlan nakamakgtayayaw kxtakanajlakan. Akgtum liʼakxilhtit, kilikgalhtawakgakan tlawakanit kliwaka 100 tanu tanu tachuwin kxaseñas. Nachuna, kgalhiyaw kilikgalhtawakgakan kxabraille kliwaka 60 tachuwin chu anankgo videos kliwaka 100 tachuwin nema limin audiodescripciones. Putum uma tlan nalimaklakaskinaw xlakata nakamakgtayaya tiku ni kgaxmatkgo chu ni akxilhkgo xlakata nalakgapaskgo Jehová chu Jesús.

11. ¿La stalanima xkachikin Jehová xliʼakxilhtit Jesús? (Hechos 2:​5-7, 33; na kaʼakxilhti dibujos).

¹¹ Akxni Jesús xlakastakwananita, kamaxkilh espíritu santo kstalaninanin xlakata xlichuwinankgolh xatlan tamakatsinin «kxtachuwinkan» latamanin tiku xʼankgonit makgtlawakgo Fiesta xla Pentecostés (kalikgalhtawakga Hechos 2:​5-7, 33). Xkachikin Jehová nachuna tlawama la uku, chu lu liskujma xlakata nakamakgtaya latamanin xalak tanu tanu kachikinin. Xlakata nakamakgtaya, tlawanit likgalhtawakga nema takilhtinit kBiblia kliwaka 1,100 tachuwin. Makgapitsi umakgolh tachuwin nialh lhuwa tiku chuwinankgo. Chuna kitaxtu xpalakata makgapitsi tachuwin xalak continente americano. Xkachikin Jehová tlawanit likgalhtawakga kliwaka 160 tachuwin xalak uma continente xlakata latamanin tlan nakgaxmatkgo xatlan tamakatsinin kxtachuwinkan. Nachuna, matitaxtikanit kilikgalhtawakgakan kliwaka 20 tanu tanu la chuwinankan romaní. Chu uma kamakgtayanit lhuwa latamanin nalakgapaskgo xaxlikana.

12. ¿Tuku atanu tlawa xkachikin Jehová?

¹² Xkachikin Jehová ni kajwatiya kamakgtaya latamanin nalakgapaskgo xatlan tamakatsinin, wata na lakkaxwili taskujut nema tlawakan xlakata nakamakgtayakan natalan akxni wi tuku masputunan. Lhuwa mil natalan talaknukgo xlakata nakamakgtayakgo tiku maklakaskimakgo tamakgtay. Xkachikin Jehová na katlawa Pukgalhtawakga niku tlan natamakxtumikgo latamanin xlakata tlakg nakatsinikgo xpalakata tapaxkit nema Dios kakgalhini.

SACERDOTE TIKU TLAKG KGALHI LIMAPAKGSIN KINKAMAKGTAYAYAN KINCHATUNUKAN

13. ¿La kinkamakgtayayan Jesús?

¹³ Jesús wa xatlan mapuchwayanina chu wa xlakata kinkamaxkiyan putum tuku maklakaskinaw xlakata tliwakga natawila kintakanajlakan (Juan 10:14; Efes. 4:7). Tuku nitlan titaxtuyaw kkilatamatkan, max nakinkamamakgkatsiniyan pi litaxtuyaw la kgantum kgatit nema tachuntanit o mecha nema mixmaja. Max lu nitlan limakgkatsiyaw xlakata tatatlayaw, xlakata wi tuku nitlan tlawaw makgasa o xlakata talamakgasitsinitaw chatum tala. Akxni titaxtuyaw uma, max tuwa nakinkakitaxtuniyaw nalilakpuwanaw kintakgalhkgalhinkan chu kajwatiya nalilakpuwanaw tuku titaxtumaw. Pero kalakapastakwi pi Jesús katsi putum tuku titaxtuyaw chu akgatekgsa la makgkatsiyaw. Chu xlakata xla xalakgalhamana, kinkamakgtayayan. Tlan nalimaklakaskin espíritu santo xlakata nakinkamatliwakglhan (Juan 16:7; Tito 3:6). Na tlan nakalimaklakaskin natalan xlakata nakinkamatliwakglhan chu nakinkamakgtayayan o tlan nakalimaklakaskin lakgkgolotsin, tiku litaxtukgo «akgtum tasikulunalin» kcongregación (Efes. 4:8).

14. ¿Tuku tlan natlawayaw komo taxlajwaninitaw?

¹⁴ Komo makgkatsiyaw pi lu taxlajwaninitaw chu nialh kgalhiyaw litliwakga, kalakapastakwi pi Jesús wa Sacerdote tiku tlakg kgalhi limapakgsin chu kalilakpuwaw la tlan nakinkamakgtayayan. Kalakapastakwi pi Jehová makamilh kKatiyatni ni kajwatiya xlakata xkinkalakgmaxtun, wata na makamilh xlakata tlakg liwana naʼakgatekgsa taʼakglhuwit nema titaxtuyaw. Akxni makgkatsiyaw pi lu taxlajwaninitaw xlakata makglakgalhinanin akinin o xlakata tuku nitlan tlawayaw, Jesús skgalalh wi xlakata nakinkamakgtayayan “kkilhtamaku akxni xlilat” (Heb. 4:​15, 16).

15. ¿Tuku makgtayalh chatum tala nataspita kcongregación?

¹⁵ Jesús na kapulalin kstalaninanin xlakata nakatekgskgo chu nakamakgtayakgo tiku tamakgatlinikgonit xkachikin Dios (Mat. 18:​12, 13). Kalichuwinaw xliʼakxilhtit Stefano.b Xla tamakxtuka kcongregación, chu 12 kata alistalh lakpuwa naʼan ktamakxtumit. Stefano wan: «Lu tuwa kmakgkatsilh naktanupara kʼakgtum Pukgalhtawakga, pero xaktaspitputun kxfamilia Jehová. Lakgkgolotsin tiku kintachuwinankgolh lu tlan kimakgamakglhtinankgolh. Xmin kilhtamaku lu nitlan xaklimakgkatsi xlakata xaktamakgatlininit Jehová chu nialh xakliskujputun naklakgtaspitpara. Pero natalan kimalakapastakakgolh pi Jehová chu Jesús xlakaskinkgo pi akit chuntiya xakliskujli naktaspita. Akxni makatsininanka pi akit xtatayana Jehová xaklitaxtupara, putum congregación xatapaxuwan kinkamakgamakglhtinankgon akit chu kifamilia. Titaxtulh kilhtamaku kimpuskat na tsukulh kgalhtawakga, chu la uku kimputumkan kskujnanimaw Jehová». Xapaxkina Sacerdote nema kgalhiyaw lu paxuwa akxni akxilha pi natalan kamakgtayakgo tiku nitlan limakgkatsikgo xtalakgalhinkan xlakata nataspitkgo kcongregación.

16. ¿Tuku xlakata lu paxtikatsiniyaw Jehová xlakata kgalhiyaw chatum Sacerdote tiku lu lakgalhamanan?

¹⁶ Akxni kilatamachi Jesús unu kKatiyatni, kamakgtayalh lhuwa latamanin akxni lu xmaklakaskimakgo tamakgtay. La uku tlan nalipawanaw pi na nakinkamakgtayayan akxni namaklakaskinaw. Chu nialh makgas, kxasasti kakilhtamaku, nakamakgtaya putum tiku nakgalhakgaxmatkgo Jehová xlakata nialh nakgalhikgo talakgalhin. Lu paxtikatsiniyaw kiDioskan Jehová xlakata lu kinkapaxkiyan chu kinkalakgalhamanan. Wa xlakata laksakli xKgawasa xlakata wa xlitaxtulh Sacerdote tiku tlakg kgalhi limapakgsin.