¿Tuku xlakata anan lhuwa tasitsi? | ¿Tuku kinkawaniyan Biblia?

Knoticias lu takgaxmata pi latamanin lu lasitsinikgo kaj xlakata ni lakxtum tasiyakgo, chu na lu takgaxmata pi anan guerras chu tatalachipat.

• «Guerra nema Israel chu Gaza kgalhikgo tlawanit pi latamanin natapapitsikgo chu nalawanikgo tuku nitlan» (The New York Times, 15 xla noviembre kata 2023).

• «Lata 7 xla octubre, latamanin kxlikalanka katiyatni tlakg lasitsinikgo, kamakgpuwantinikgo amakgapitsin xlakata na nalasitsini, chu xtasitsikan kamatlawi tuku nitlan» (Dennis Francis, presidente xalak Asamblea General de las Naciones Unidas, 3 xla noviembre kata 2023).

Tasitsi, guerrras chu tatalachipat nema anan ni kaks kinkamalakawaniyan. Biblia lichuwinan pi makgasa xʼanankgo latamanin tiku nitlan xlikatsikgo chu xlipaxuwakgo akxni xʼanan guerras, chu xtachuwinkan xlitaxtukgo la flechas (Salmo 64:3; 120:7; 140:1). Biblia masiya tuku xlakata anan lhuwa tasitsi.

Tasitsi masiya pi lamaw kxaʼawatiya kilhtamaku

Biblia masiya pi wi pulaktiy tuku tlawa pi kaʼanalh tsitsi.

1. 1. Lichuwinalh pi xʼama min kilhtamaku akxni latamanin nialh xʼamakgo lapaxkikgo (Mateo 24:12). Wa xlakata, nialh lamasiyanikgo tapaxkit wata lasitsinikgo (2 Timoteo 3:1-5).

2. 2. Biblia masiya pi «putum kakilhtamaku wi kxmakan Akgskgawini» (1 Juan 5:19; Apocalipsis 12:9, 12). Xtapuwan Akgskgawini tlawa pi kaʼanalh lhuwa tasitsi kkakilhtamaku.

Pero Biblia na masiya pi Dios nialh makgas namasputu putum tuku tlawa pi kaʼanalh tasitsi. Nachuna, naxapa putum talipuwan nema wilinit tasitsi. Biblia malaknu uma:

• «Dios nakaxakani putum xlakgpixtajatkan, chu nialhti katinilh, nialhti katilipuwa, nialhti katitasalh, nialhti katikatsanajwalh. Putum tuku xʼanan xapulana lakgsputkgonit nawan» (Apocalipsis 21:4).