¿Anan akgtum tamapakgsin nema nikxni nalakxla chu tlan namapakgsinan kputum Katiyatni? | ¿Tuku kinkawaniyan Biblia?

Lhuwa tuku nitlan ka’akgspulama tamapakgsin xalak kakilhtamaku. Anan tatalachipat, nitlan kalichuwinankan mapakgsinanin xlakata lakgpalikgonit xvotoskan latamanin, chu klakalhuwa kachikinin latamanin lita’akglhuwikgo xlakata política chu katalalakatawakakgo mapakgsinanin.

Biblia wan pi anan akgtum Tamapakgsin nema nitila katilakxtlawalh chu ankgalhin natawila. Max litachuwinankanita uma Tamapakgsin. Wa Tamapakgsin nema Jesucristo lichuwinalh k’oración xla padrenuestro.

• «Wixin chuna natlawayatit mioracionkan: “KinTlatkan tiku wilapi kʼakgapun, katamasantujlilh mintukuwani. Kamilh minTamapakgsin. Kalalh mintalakaskin chuna la kʼakgapun nachuna kalalh kkatiyatni”» (Mateo 6:9, 10).

¿Tuku wan Biblia xlakata uma Tamapakgsin?

Biblia wan pi uma Tamapakgsin nikxni katilakxlalh

Uma Tamapakgsin wilacha k’akgapun.

• Jesús limapakuwilh «Tamapakgsin xalak akgapun» (Mateo 4:17; 5:3, 10, 19, 20). Wa xlakata, Jesús wa: «KinTamapakgsin ni xalak uma kakilhtamaku» (Juan 18:36).

Xtamapakgsin Dios natawila kxlakgxokgo xtamapakgsinkan latamanin.

• Biblia wan: «Nakalakxpula chu nakamasputu putum tamapakgsin [xalak kakilhtamaku], chu ama tamapakgsin xliputum kilhtamaku natawila» (Daniel 2:44).

Jesucristo wa namapakgsinan kʼuma Tamapakgsin, chu uma Tamapakgsin nikxni katimalakgsputuka.

• Biblia wan: «Xtamapakgsin akgtum tamapakgsin nema nikxni katisputli, ni katititaxtulh, xtamapakgsin nikxni katimalakgsputuka» (Daniel 7:13, 14).

Uma Tamapakgsin nalimin takaksni unu kKatiyatni chu nialh katiʼanalh tuku nakamakgapekuan latamanin.

• Biblia wan: «Chatunu chatunu natawila xtampin xakiwi xʼuvas chu xtampin xhiguera, chu ni katiʼanalh tiku nakamakgapekuan» (Miqueas 4:4).

Tlakg kakatsini xpalakata uma Tamapakgsin

Akxni Jesús kilachi unu kKatiyatni, «xlichuwinama xatlan tamakatsinin xla Tamapakgsin» (Mateo 9:35). Na lichuwinalh uma:

• «Xatlan tamakatsinin xla Tamapakgsin natalichuwinan kxlilakgatum katiyatni xlakata natamakatsininan kputum laklanka kachikinin, chu alistalh namin lisputni» (Mateo 24:14).

La uku lichuwinamaka xatlan tamakatsinin xla Tamapakgsin kliwaka 240 países chu klaktsu kachikinin. ¿Tuku tasikulunalin nalimin uma Tamapakgsin? ¿La tlan nalitamakgtayaya? Tlakg kakatsini xlakata uma Tamapakgsin.

Kaʼakxilhti video ¿Tuku xTamapakgsin Dios?