¿La xlikatsit xaxlikana kstalanina Cristo? | ¿Tuku kinkawaniyan Biblia?

Kxlikalanka katiyatni lhuwa latamanin wankgo pi kstalaninanin Cristo litaxtukgo. Pero tuku katlawanikgo amakgapitsin limasiya pi nichuna. Amakgapitsi kaj xʼakstukan kapaxkikan, nitlan kalikatsinikgo amakgapitsin chu amakgapitsin kaʼakgskgawikgo tiku tamakgaxtokgkgo. Putum uma tlawa pi makgapitsi latamanin nialh nakatsikgo tiku xaxlikana kstalaninanin Cristo.

¿La likatsikgo tiku xaxlikana kstalaninanin Cristo?

Ni tuwa nawanaw pi kstalaninanin Cristo litaxtuyaw, pero ni kajwatiya talakaskin nawanaw pi kstalanina Cristo litaxtuyaw. Biblia masiya pi kstalanina Cristo xlitlawat tuku masiyalh Jesús (Hechos 11:26). Jesús wa: «Komo kgalhakgaxpatatit kintachuwin, xlikana kistalaninanin litaxtuyatit» (Juan 8:31). Xlikana pi nipara chatum lataman tlan makgantaxti putuminika tuku masiyalh Jesús. Maski chuna, tiku xlikana kstalanina Cristo litaxtu liskuja xlakata namakgantaxti chu nalilatama chali chali tuku lichuwinalh Jesús. Kalichuwinaw makgapitsi liʼakxilhtit.

Kstalaninanin Cristo xlikana kapaxkikgo amakgapitsin

Tuku wa Jesús: «Kkamaxkiman xasasti limapakgsin: pi kalapaxkitit minchatunukan; chuna la kkapaxkinitan, nachuna wixin kalapaxkitit minchatunukan» (Juan 13:34, 35).

Tuku tlawalh Jesús: Jesús xlikana kapaxkilh putum latamanin, maski xkgalhikgo o ni xkgalhikgo tumin o tanu xkilhtsukutkan xwanit. Kamapaksalh tiku xtatatlakgo, kamawilh tiku xtsinksmakgolh chu asta mastalh xlatamat xpalakatakan amakgapitsin (Mateo 14:14-21; 20:28).

Tuku tlawakgo kstalaninanin Cristo: Limasiyakgo pi kapaxkikgo latamanin akxni kalakgalhamankgo, ni kalaksakpaxkikgo chu akxni katapatikgo amakgapitsin. Na kamakgtayakgo tiku maklakaskinkgo tamakgtay chu xatapaxuwan wi tuku limakgxtakgkgo xlakata nakamakgtayakgo amakgapitsin (1 Juan 3:16).

Kstalaninanin Cristo ni akgskgawinankgo

Tuku wa Jesús: «Akit [...] xaxlikana» (Juan 14:6).

Tuku tlawalh Jesús: Jesús nikxni akgskgawinalh. Nikxni kaʼakgskgawilh amakgapitsin xlakata xtlawakgolh tuku xla xlakaskin chu nikxni tlawalh pi xkanajlakgolh tuku ni xaxlikana. Xlilakgapaskan xlakata ankgalhin xwan tuku xaxlikana, maski uma xtlawalh pi xkgalhilh taʼakglhuwit (Mateo 22:16; 26:63-67).

Tuku tlawakgo kstalaninanin Cristo: Ni akgskgawinankgo chu ni kgalhanankgo. Mastakgo lilakgaxokgon, tlan skujnin litaxtukgo chu makgatsikgo hora nema kaskinikan kxtaskujutkan (Romanos 13:5-7; Efesios 4:28). Nitu akgskgawinamakglhtinankgo, ni akgskgawinankgo akxni tlawakgo examen k’escuela chu ni akgskgawinankgo akxni putsakgo taskujut o akxni malakgatsamakgo kapsnat (Hebreos 13:18).

Kstalaninanin Cristo tlan kalikatsinikgo putum latamanin

Tuku wa Jesús: «Kakilakgtantit, putum wixin tiku lu tlakgwanitantita chu lu tsinka mintakukakan, chu akit nakkamajaxayan. Kalipitit kimukiwi chu katlawatit chuna la akit, xlakata akit ni xaluku chu ktaktuju, komo chuna natlawayatit natatliwakglhatit. Xlakata kimukiwi ni tuwa linkan chu tuku kkaskiniyan nalipinatit ni tsinka» (Mateo 11:28-30).

Tuku tlawalh Jesús: Jesús tlan xlikatsi chu tlan xkamamakgkatsini amakgapitsin. Tlan xkalikatsini kamanan, xkamakgoxomixi tiku xtaxlajwanikgonit chu ni xkamaktuju amakgapitsin (Marcos 10:13-15; Lucas 9:11).

Tuku tlawakgo kstalaninanin Cristo: Xatapaxuwan katachuwinankgo amakgapitsin; ni kakilhnikgo chu ni katlawanikgo tuku nitlan (Efesios 4:29, 31, 32). Kalilakgaputsakgo amakgapitsin chu lakputsakgo la nakamakgtayakgo (Gálatas 6:10).

Kstalaninanin Cristo ni akgskgawikgo tiku tamakgaxtokgo

Tuku wa Jesús: «Tuku Dios makxtum tlawalh, ni kamapapitsilh chixku» (Marcos 10:9).

Tuku tlawalh Jesús: Maski ni tamakgaxtokgli, kawanilh tiku xmakgaxtokgkgo pi ni xlaʼakgskgawikgolh (Mateo 19:9). Na liwana kawanilh tuku kuenta xlitlawatkan xwanit xlakata nitu xlaktlawalh xtamakgaxtokgatkan (Mateo 5:28).

Tuku tlawakgo kstalaninanin Cristo: Ni tlawakgo tuku nitlan xmamakgkatsinilh tiku tamakgaxtokgkgo (Hebreos 13:4). Xchatiykan lapaxkikgo chu lamaxkikgo kakni (Efesios 5:28, 33).