KAMANAN KGALHSKININANKGO
¿La tlan nakimakgtaya Biblia? Pulaktum: Kaputsa kBiblia tuku lhuwa xtapalh
«Klitsakgsanit naklikgalhtawakga Biblia, pero lu lhman kmakgkatsi» (Briana, tiku kgalhi 15 kata).
¿Nachuna makgkatsiya? Komo chuna, uma artículo namakgtayayan.
¿Tuku xlakata lu xlakaskinka nalikgalhtawakgaya Biblia?
¿Lakpuwana pi lilakgachanit likgalhtawakgakan Biblia? Max chuna lakpuwana xlakata akxilha pi Biblia maktum libro nema limin lhuwa páginas, lu laktsu xaletra chu ni kgalhi dibujo. ¡Nipara tsinu xtachuna televisión chu videos!
Pero kalilakpuwanti uma: komo xtekgsti akgtum xamakgan cofre niku tajuma tesoro, ¿ni xlikana pi lakapala xmakgalhkgeputu?
Biblia xtachuna uma cofre. Anta natekgsa liskgalala nema xtachuna perlas chu uma liskgalala namakgtayayan:
Nalaksaka tuku tlan.
Tlan nakatalalipina minatlatni.
Nakatekgsa xatlan amigos.
Ni lu nalakgaputsaya.
¿Tuku xlakata maktum libro xamakgan tlan nakinkamakgtayayan? Xlakata «wa Dios masta putum tuku tatsokgnit kxaSanto Tatsokgni» (2 Timoteo 3:16). Uma wamputun pi tastakyaw nema min kBiblia, wa xtastakyaw tiku tlakg lanka xlakatsukut.
Biblia la akgtum cofre nema litsama liskgalala chu xtachuna akgtum cofre niku tajuma lhuwa perlas.
¿Tuku tlan natlawaya xlakata nalikgalhtawakgaya Biblia?
Pulaktum wa pi nalikgalhtawakgaya lata niku tsuku asta niku sputa. Uma namakgtayayan nakatsiya tsinu putum tuku lichuwinan Biblia. Tipalhuwa la tlan nalikgalhtawakgaya. Kalichuwinaw pulaktiy la tlan natlawaya:
Tlan nalikgalhtawakgaya makatunu libros chuna la min kBiblia, lata kʼGénesis asta kʼApocalipsis (Revelación), chu chuna nalikgalhtawakgakgoya 66 libros.
Tlan nalikgalhtawakgaya chuna la latilhalh tuku talichuwinan kBiblia.
Tlan natlawaya uma: Anta ksección 4-A xla folleto Tuku liputsananikan xTachuwin Dios, natekgsa akgtum lista nema lichuwinan chuna la latilhalh tuku tlakg xlakaskinka kxlatamat Jesús.
Xlipulaktiy wa pi nalaksaka akgtum liʼakxilhtit nema namakgtayayan nalakkaxtlawaya mintaʼakglhuwit. Kalilakpuwanti uma:
¿Kgalhiputuna amigos nema xlikana namakgtayakgoyan? Komo chuna, kalikgalhtawakga xliʼakxilhtit David chu Jonatán (1 Samuel, capítulo 18 asta 20). Alistalh katlawa tuku min niku wan: «Cómo encontrar amigos de verdad» xlakata tlakg nakatsiya la tlan namakgtayayan uma liʼakxilhtit.
¿Katsiputuna la tlan natayaniya akxni namatlawiputunkana tuku nitlan? Kalikgalhtawakga tuku titaxtulh José chu kaʼakxilhti tuku tlawalh xlakata ni natlawa tuku nitlan (Génesis, capítulo 39). Alistalh katlawa tuku min niku wan: «Cómo resistir las tentaciones» chu «Acusado falsamente», nema namasiyaniyan tuku tlan natlawaya.
¿Katsiputuna la tlan namakgtayayan oración? Kalikgalhtawakga tuku titaxtulh Nehemías (Nehemías, capítulo 2). Alistalh katlawa tuku min niku wan: «Jehová contestó su oración» nema namasiyaniyan tuku tlan natlawaya.
Tlan natlawaya uma: Akxni nalikgalhtawakgaya Biblia, kaputsa niku miʼakstu natawilaya chu niti o nitu namakglhuwiyan.
Xlipulaktutu wa pi nalikgalhtawakgaya akgtum liʼakxilhtit o akgtum salmo chu alistalh nalilakpuwana la namakgtayayan. Akxni likgalhtawakganitata, katlawa umakgolh takgalhskinin:
¿Tuku xlakata Jehová matsokgninalh umakgolh tachuwin anta kBiblia?
¿Tuku kimasiyani uma xlakata la likatsi Jehová chu xlakata la tlawa akxni wi tuku tlawa?
¿La nakimakgtaya kkilatamat tuku aku klikgalhtawakgalh?
Tlan natlawaya uma: Kalakkaxwili tuku natlawaya. Kamaklakaskinti «Programa de lectura de la Biblia» nema wi ksitio xla Internet, xlakata natsokgwiliya tuku kilhtamaku tsuku likgalhtawakgaya Biblia.