Tiku tlakg kgalhikgo kamakgtayakgo tiku ni lhuwa tuku kgalhikgo

Xtatayananin Jehová lichuwinankgo Dios chu kamakgtayakgo latamanin kliwaka 200 países chu kachikinin. Pero xliputum umakgolh países kaj 35 liwana kakchani donaciones nema makgamakglhtinankgo. Wa xlakata, ¿tuku tlawakan niku ni anan lhuwa tumin?

Lakgkgolotsin tiku Pulalinkgo xtatayananin Jehová akxilhkgo taskujut chu tuku maklakaskinkgo kxtakanajlakan xlakskujnin Jehová. Lu kuenta tlawakan la maklakaskinkan tumin nema makglhtinankan. Komo akgtum sucursal makgamakglhtinan tlakg lhuwa tumin nixawa la maklakaskin, malakgachani tumin nema akgataxtuni atanu sucursales niku tlakg maklakaskinkan. Chuna stalanikgo xliʼakxilhtit xapulana kstalaninanin Cristo. Xlakan limaklakaskinkgolh tuku xkgalhikgo xlakata nakalimakgtayakgo natalan tiku ni lhuwa tuku xkgalhikgo chu chuna “akxtum xkakitaxtunilh” (2 Corintios 8:14).

¿La makgkatsikgo natalan akxni makgamakglhtinankgo tamakgtay nema kaʼakgataxtuni amakgapitsi sucursales? Akgtum liʼakxilhtit, kTanzania, niku latamanin kaj 2 dólares lilamakgo akgatunu kilhtamaku, limaklakaskinka tumin xlakata nakaxtlawakan Pukgalhtawakga xalak congregación Mafinga. Natalan xalak uma congregación wankgolh: «Lata kaxtlawaka kimPukgalhtawakgakan, tlakg lhuwa latamanin minkgo ktamakxtumit. Kpaxtikatsiniyaw xkachikin Jehová chu natalan xlakata xtalakgalhamankan. La uku kkgalhiyaw akgtum stlan Pukgalhtawakga niku nakkakninaniyaw Jehová».

Xlakata pandemia xla COVID-19, makgapitsi natalan xalak Sri Lanka ni kgalhikgonit lhuwa liwat. Chatum tiku chuna titaxtuma wa tala Imara Fernando chu aktsu xkgawasa Enosh. Pero xlakata donaciones xalak atanu países, makgamakglhtinankgolh tamakgtay nema xmaklakaskinkgo. Alistalh, tsokgwilikgolh maktum tarjeta nema xwan: «Kpaxtikatsiniyaw natalan tiku kinkalimasiyanikgon xtapaxkitkan kʼuma lu xatuwa kilhtamaku. Lu kpaxuwayaw xlakata kmakgtapakgsiyaw kʼuma familia chu chuntiya kskinaw kʼoración xlakata Jehová chuntiya kakamakgtayalh putum natalan kʼuma xaʼawatiya kilhtamaku».

Maski tanu tanu kachikinin niku lamakgo kinatalankan, xputumkan xatapaxuwan maskiwinankgo tuku kgalhikgo. Akgtum liʼakxilhtit, Enosh tlawalh aktsu xcajita niku namuju xdonaciones xlakata nakalimakgtaya familias tiku tlakg maklakaskinkgo. Guadalupe Álvarez na lu xatapaxuwan maskiwinan. Xla lama kʼakgtum kachikin xalak México niku ni lu anan tumin chu ni lhuwa kamaskgawikan skujnin. Pero xla lakputsa la namakgtayanan. Guadalupe wan: «Kpaxtikatsini Jehová xtapaxkit chu xtalakgalhaman. Kkatsi pi akxni kidonaciones akxtum katala amakgapitsin, lu kamakgtaya natalan tiku titaxtumakgo tuku tuwa».

Sucursales nema malakgachakgo tumin lu xatapaxuwan chuna tlawakgo. Anthony Carvalho, tiku makgtapakgsi kComité de Sucursal xalak Brasil, wan: «Lhuwa kata, makgapitsi sucursales kinkalimakgtayakgon tumin. Xlakata uma tamakgtay, taskujut lu staknit. La uku tlakg kkgalhiyaw tumin chu tlan kkamakgtayayaw amakgapitsin. Natalan lu xlakaskinka liʼakxilhkgo la lichuwinankan Dios kxlikalanka katiyatni chu akxilhkgo la namakgtayanankgo».

¿La tlan nakamakgtayakgo xtatayananin Jehová xnatalankan tiku titaxtumakgo tuku tuwa? Ni talakaskin namalakgachakgo xdonacioneskan ksucursales xalak atanu países. Tlan namujukgo xdonacioneskan kcajas nema wilakgo kPukgalhtawakga niku wan «Obra mundial» o na tlan namaklakaskinkgo donate.jw.org. Putum midonacioneskan lu lanka xtapalh.