Xlimaktum Samuel
30 Xlituxama akxni David chu ksoldados chankgolh Ziclag, amalequitas xtanukgonit anta chu ksur,* Ziclag xʼakgchipakanit chu klhkuyuwilikanit. 2 Xkalinkanit lakpuskatin chu putum tiku xwilakgolh kkachikin, lata xaʼaktsujku asta tiku lankata xwanit. Niti makgnikgolh, pero kalinkgolh. 3 Akxni chankgolh, David chu ksoldados akxilhkgolh pi klhkuyuwilikanit kachikin chu xkachilinkanit xlakpuskatinkan, xlakgkgawasankan chu xlaktsumankan. 4 David chu ksoldados lu lipekua tsukukgolh tasakgo. Tasakgolh asta akxni nialh xkgalhikgo litliwakga xlakata chuntiya natasakgo. 5 Chatiy xlakpuskatin David, Ahinoam xalak Jezreel chu Abigaíl xalak Carmelo, tiku xpuskat Nabal xwanit, na xkalinkanit. 6 David lu xlakgaputsama, xlakata lakchixkuwin xlichuwinamakgo pi xʼaktalamakgniputunkgo, xlakata xputumkan lu xlakgaputsamakgo xlakata xkalinkanit xlakgkgawasankan chu xlaktsumankan. Pero David putsalh Jehová xDios xlakata natatliwakglha.
7 Alistalh David wanilh sacerdote Abiatar, xkgawasa Ahimélec: «Katlawa litlan, kakilitani efod».* Wa xlakata Abiatar liminilh efod. 8 Chu David kgalhskilh Jehová: «¿Kkastalani umakgolh kgalhananin? ¿Nakkamataxtuka?». Xla kgalhtilh: «Chuna, kakaputsastalani, xlakata nakamataxtuka chu nakamakglhtiya putum tuku linkgonit».
9 David chu akgchaxan ciento ksoldados tunkun tsukukgolh tlawankgo chu chankgolh kxpuxkga Besor, niku makgapitsi soldados tamakgxtakgkgolh. 10 David chuntiya kataʼalh akgtati ciento ksoldados, pero akgtiy ciento tamakgxtakgkgolh xlakata lu xtlakgwankgonit chu nila xpatakutkgo xpuxkga Besor.
11 Ksoldados tekgskgolh chatum egipcio chu linikgolh David. Maxkikgolh liwat chu chuchut, 12 nachuna maktiy xatalakchitani pasas chu aktsu xatalakchitani higos nema kamaskakakanit. Akxni walh uma, tatliwakglhpa, xlakata nitu xwayanit chu ni xwanit chuchut akgtutu kilhtamaku chu akgtutu tsisni. 13 Chu David kgalhskilh: «¿Niku xala wix? ¿Tiku mimalana?». Xla kgalhtilh: «Akit egipcio, chu kskujni chatum amalequita klitaxtu. Kimalana kiʼakgxtakgmakgalh xlakata tuxamata la ktatatlalh. 14 Akinin kʼakgchipaw ksur xtiyatkan keretitas, xtiyat Judá chu ksur kxtiyat Caleb, chu klhkuyuwiliw Ziclag». 15 Akxni kgaxmatli uma, David kgalhskilh: «¿Tlan xkilipi niku wilakgolh umakgolh kgalhananin?». Chu xla kgalhtilh: «Komo kimalaknuniya kxtukuwani Dios pi ni nakimakgniya, chu ni nakimakamastaya kxmakan kimalana, naklinan niku wilakgolh kgalhananin».
16 Wa xlakata lilh, chu anta xwilakgolh, kalakgwan xmakgolh, xwayamakgolh chu xkgotmakgolh. Xlipaxuwamakgo pi xlinkgonit lhuwa tuku xtapalh xalak xtiyatkan filisteos chu xalak xtiyat Judá. 17 Chu David katalachipalh chu katalatlawalh lata tsisa asta akxni tsiswalh. Niti tsalalh; kajwatiya lakgtaxtukgolh akgtati ciento lakchixkuwin tiku xkgewilakgolh xcamelloskan chu tsalakgolh. 18 David kamakglhtipa putum tuku amalequitas xlinkgonit chu kalakgmaxtulh chatiy xlakpuskatin. 19 Nitu xtsankga, chu putum kamaspitka: lata tiku aktsujku asta tiku lankata. Kamaspitparakgolh xlakgkgawasankan chu xlaktsumankan, chu nachuna tuku xkatapakgsini. David kgalhipa putum tuku xmakgkgalhankanit. 20 Nachuna David katatamakgxtakgli putum borregos chu wakax. Chu ksoldados akxtum katalinkgolh putum xʼanimaleskan. Xwankgo: «Wa uma tuku lhuwa xtapalh makglhtinalh David».
21 Alistalh David alh niku xwilakgolh akgtiy ciento ksoldados tiku lu xtlakgwankgonit chu nila xtaʼankgo, chu xtamakgxtakgkgonit kxpuxkga Besor. Chu xlakan taxtukgolh xlakata natatanokglhkgo David chu tiku akxtum xtaʼankgo. Akxni kalakgtalakatsuwilh David kakgalhskilh la xwilakgolh. 22 Pero kxlakgstipankan tiku xtaʼankgonit David, xwilakgolh makgapitsi lakchixkuwin tiku nitlan xlikatsikgo chu ni kaliʼakxilhputu chu tsukukgolh wankgo: «Xlakan ni kinkataminkgon, wa xlakata ni katikamaxkiw nipara tsinu tuku kilakgmaxtuw, kajwatiya nakamaxkiyaw chatunu chatunu xpuskatkan chu xkamanankan. Kakamaxkika chu kaʼankgolh». 23 Pero David kawanilh: «Nichuna, kinatalan, nichuna katlawanitit tuku Jehová kinkamaxkinitan. Xla kinkakuentajtlawan chu kinkamakamaxkin umakgolh kgalhananin tiku kinkatalatlawakgon. 24 ¿Lakpuwanatit pi wi tiku nakatatayayan? Putum wixin watiya tuku namakgamakglhtinanatit: tiku kilalh ktatalachipat chu tiku tamakgxtakgli xlakata nakuentajtlawa tuku kinkatapakgsiniyan. Putum wixin lakxtum tuku nakamaxkikanatit». 25 Lata ama kilhtamaku, David lakkaxwililh uma, chu akgtum limapakgsin litaxtulh kʼIsrael chu chuna tlawakan asta la uku.
26 Akxni David taspitli kZiclag, kamalakgachanilh tuku lhuwa xtapalh lakgkgolotsin xalak Judá tiku xʼamigos xwankgonit. Kamalakgachanilh uma tachuwin: «Uma tuku lhuwa xtapalh milakan, akgtum tamaskiwin* nema kamakglhtiw xtalatlawananin Jehová». 27 Xla kamalakgachanilh tiku xalak Betel, tiku xalak Ramot nema xwi kNégueb,* tiku xalak Jatir, 28 tiku xalak Aroer, tiku xalak Sifmot, tiku xalak Estemoa, 29 tiku xalak Racal, chu tiku xalak xkachikinkan jerahmeelitas, tiku xalak xkachikinkan quenitas, 30 tiku xalak Hormá, tiku xalak Borasán, tiku xalak Atac, 31 tiku xalak Hebrón chu putum kachikinin niku David chu ksoldados xtitaxtukgonit.