Xlimaktum Samuel

5 Akxni filisteos tiyakgolh arca nema tapakgsini xaxlikana Dios, linkgolh lata kʼEbenézer asta kʼAsdod. 2 Alistalh, filisteos linkgolh arca nema tapakgsini xaxlikana Dios kxtemplo* Dagón chu wilikgolh kxpaxtun xtatlawamakgxtu Dagón. 3 Latamanin xalak Asdod sokg takikgolh lichali chu tekgskgolh xtatlawamakgxtu Dagón pi lakata xma kkatutsu. Lakata xʼanit kxlakatin xʼArca Jehová. Wa xlakata sakkgolh chu wiliparakgolh niku pulana xwilikgonit. 4 Lichali akxni sokg takikgolh, Dagón anta lakata xma kxlakatin xʼArca Jehová. Xʼakgxakga Dagón chu akgtiy xmakanin xkachukukanit chu xmakgolh niku xlaktanukan. Kajwatiya tuku xtasiya chuna la tantum skiti* nitu xtachukunit. 5 Wa xlakata, asta la uku, nipara ksacerdotes Dagón nipara atanu lataman tiku tanu kxtemplo Dagón, kʼAsdod, tatuta niku laktanukan.

6 Xmakan Jehová kamalakgaxokgelh latamanin xalak Asdod chu putum xkachikinin. Katlawanikgolh tuku nitlan akxni tlawalh pi xkataxtunikgolh tsitsi.* 7 Akxni lakchixkuwin xalak Asdod akxilhkgolh tuku xlama, wankgolh: «XʼArca Dios xalak Israel nila kinkatatamakgxtakgan, xlakata xmakan nitlan kinkalikatsininitan akinin chu kidioskan, Dagón». 8 Wa xlakata kamamakxtumika putum xmapakgsinaninkan filisteos chu kakgalhskinka: «¿Tuku natlawaniyaw xʼArca Dios xalak Israel?». Xlakan kgalhtinankgolh: «Kaliw xʼArca Dios xalak Israel anta kʼGat». Wa xlakata anta linka.

9 Akxni linkgolh Arca anta, xmakan Jehová malakgaxokgelh kachikin, chu latamanin lu pekuankgolh. Kamalakgaxokgelh putum latamanin xalak kachikin, tiku laktsujku chu tiku laklankata, chu kalitaxtunilh tsitsi. 10 Wa xlakata, linkgolh arca nema tapakgsini xaxlikana Dios kʼEcrón. Pero, akxni Arca lichanka anta, ecronitas pixlanka tsukukgolh wankgo: «¡Kinkaliminikan xʼArca Dios xalak Israel xlakata nakinkamakgnikanan akinin chu kinkachikinkan!». 11 Alistalh kamamakxtumikgoka putum xmapakgsinaninkan filisteos chu wankgolh: «Katamakxtutit unu xʼArca Dios xalak Israel. Kamaspitparatit niku tapakgsi xlakata ni naniyaw, nipara akinin chu kinkachikinkan». Xlakata tiku xalak kachikin lu xpekuankgonit xlakata xlakpuwankgo pi xʼamakgo nikgo. Xmakan xaxlikana Dios lu palha xkamalakgaxokgenit: 12 tiku ni nikgolh kalimalakgaxokgeka tsitsi. Latamanin xalak kachikin pixlanka kskinkgo tamakgtay, chu chuna la pixlanka xkatasakgo xchan asta kʼakgapun.