Xlimaktum Samuel
7 Wa xlakata lakchixkuwin xalak Quiryat-Jearim minkgolh, linkgolh xʼArca Jehová chu tatalakakxtukgolh kxchik Abinadab, nema xwi ksipi. Chu maskulunkikgolh xkgawasa Eleazar xlakata xkuentajtlawalh xʼArca Jehová.
2 Lhuwa kilhtamaku titaxtulh, akgpuxam kata, lata akxni Arca linka kQuiryat-Jearim. Chu putum israelitas tsukukgolh putsakgo* Jehová. 3 Samuel kawanilh putum israelitas: «Komo xliputum minakujkan lakgtaspitputumparayatit Jehová, kakalakgmakgantit dioses xalak atanu kachikinin chu tatlawamakgxtu xla Astoret, kamakamaxkitit Jehová minakujkan chu kajwatiya xla kaskujnanitit. Chu xla nakalakgmaxtuyan kxmakankan filisteos». 4 Chu israelitas kamakgankgolh Baales nema xkakgalhikgo chu tatlawamakgxtu xla Astoret chu kajwatiya Jehová tsukukgolh skujnanikgo.
5 Alistalh Samuel wa: «Kakamamakxtupitit putum israelitas anta kMizpá, chu akit naktlawani oración Jehová mimpalakatakan». 6 Wa xlakata, tamakxtumikgolh kMizpá. Makutukgolh chuchut kpozo chu xtakgamakgankgolh kxlakatin Jehová, chu kgalhxtakgnankgolh* ama kilhtamaku. Anta wankgolh: «Klakgalhinanitaw kxlakatin Jehová». Chu anta kMizpá Samuel tsukulh kaskujnani israelitas chuna la juez.
7 Akxni filisteos katsikgolh pi israelitas xtamakxtumikgonit kMizpá, xmapakgsinaninkan filisteos ankgolh katalatlawakgo israelitas. Akxni katsikgolh uma, israelitas lu kapekuanikgolh filisteos. 8 Wa xlakata israelitas wanikgolh Samuel: «Chuntiya kaskini Jehová kiDioskan pi kakinkamakgtayan chu kakinkalakgmaxtun kxmakankan filisteos». 9 Alistalh Samuel tiyalh tantum aktsu borrego chu makamaxkilh Jehová chuna la xalhkun tamakamastan. Samuel tasaskinilh Jehová pi xkamakgtayalh israelitas, chu Jehová kgalhtilh. 10 Akxni Samuel xmakamastama xalhkun tamakamastan, filisteos ankgolh katalatlawakgo Israel. Chu ama kilhtamaku Jehová tlawalh pi lu tliwakga xjililh anta niku xwilakgolh filisteos, chu tlawalh pi lu xpekuankgolh chu ni xkatsikgolh tuku natlawakgo, chu israelitas kamakgatlajakgolh. 11 Alistalh, lakchixkuwin xalak Israel taxtukgocha kMizpá chu kastalanikgolh chu kamakgnitilhakgolh filisteos asta ksur Bet-Car. 12 Alistalh Samuel tiyalh akgtum chiwix, wililh kxlakʼitat Mizpá chu Jesaná, chu limapakuwilh Ebenezér* xlakata wa: «Jehová kinkamakgtayanitan asta la uku». 13 Chuna kamakgatlajaka filisteos. Chu xlakan nialh tanukgolh ktiyat nema xkatapakgsini israelitas, chu Jehová chuntiya katalatlawalh filisteos akxni xlama Samuel. 14 Chu kachikinin nema filisteos xkamakglhtikgonit israelitas katapakgsiniparakgolh israelitas, lata kʼEcrón asta kʼGat. Israelitas kamakglhtiparakgolh filisteos tiyat nema xkatapakgsini umakgolh kachikinin.
Nachuna, israelitas katakgalhikgolh takaksni amorreos.
15 Samuel chuntiya juez kalitaxtunilh israelitas xliputum xlatamat. 16 Akgatunu kata wa uma tuku xtlawa. Xʼan kBetel, kʼGuilgal chu kMizpá, chu xkalakputsanani israelitas kʼumakgolh kachikinin. 17 Alistalh xtaspitpara kRamá, xlakata anta xwi xchik, chu anta na xkalakputsanani israelitas. Chu kRamá tlawanilh akgtum pumakamastan Jehová.