Xlimaktum Samuel
9 Xwi chatum chixku xalak xtribu Benjamín tiku xwanikan Quis. Xkgawasa Abiel, xkgawasa Zeror, xkgawasa Becorat, xkgawasa Afías. Uma benjaminita xkgalhi lhuwa tumin. 2 Xkgalhi chatum xkgawasa tiku xwanikan Saúl, kgawasaku xwanit chu lu stlan xtasiya. Ni xʼanan nipara chatum israelita tiku tlakg stlan xtasiya nixawa xla. Tlakg chalhman xwanit nixawa amakgapitsin, amakgapitsin kaj kxpakgxtun* xchanikgo.
3 Akgtum kilhtamaku tsankgakgolh xburros* Quis, xtlat Saúl. Chu Quis wanilh xkgawasa Saúl: «Katlawa litlan, kalipi chatum skujni chu kapit putsaya burros nema tsankgakgolh». 4 Xlakan lakgatsalakgolh putum kxkasipijni Efraín chu xtiyat Salisá, pero ni katekgskgolh. Titaxtukgolh kxtiyat Saalim, pero na ni katekgskgolh anta. Lakgatsalakgolh putum xtiyat benjaminitas, pero ni xtasiyakgo.
5 Akxni chankgolh ktiyat nema xtapakgsini Zuf, Saúl wanilh kskujni tiku akxtum xtaʼan: «Kaʼaw, kataspitwi, max kintlat natsuku kinkalilakgaputsayan chu nialh wa nakalilakgaputsa burros». 6 Pero kskujni wanilh: «Kaʼakxilhti, kʼuma kachikin wi chatum kskujni Dios, chatum chixku tiku lu maxkikan kakni. Putum tuku wan, kgantaxtu. Kaʼaw akxilhaw. Max xla tlan nakinkawaniyan niku tlan naʼanaw». 7 Saúl wanilh kskujni: «Pero komo naʼanaw, ¿tuku naliniyaw? Nialh kgalhiyaw kaxtalanchu. Ni kgalhiyaw tuku tlan namaxkiyaw kskujni xaxlikana Dios. ¿Wi tuku kinkaʼakgataxtuniyan?». 8 Kskujni wanipa: «Kaʼakxilhti, kchipanit aktsu plata.* Nakmaxki kskujni xaxlikana Dios chu xla nakinkawaniyan niku tlan naʼanaw». 9 (Makgasa, anta kʼIsrael, akxni chatum lataman wi tuku xkgalhskimputun Dios, xwan: «Kaʼaw akxilhaw chixku tiku malakawanikan». Xlakata la uku tiku kalilakgapaskan palakachuwinanin, pulana xkalimapakuwikan tiku xkamalakawanikan). 10 Alistalh Saúl wanilh kskujni: «Lu tlan, kaʼaw». Chu ankgolh kkachikin niku xwi kskujni xaxlikana Dios.
11 Akxni xtalakakxtumakgolh xlakata xchankgolh kkachikin, katatanokglhkgolh makgapitsi laktsuman tiku xʼamakgolh xkgatnankgo chu kakgalhskinkgolh: «¿Anta unu wi chixku tiku malakawanikan?». 12 Xlakan kgalhtikgolh: «Chuna, kaʼakxilhtit, xla aku chilh. Kalakapalatit, milh xlakata latamanin xalak kachikin amakgolh tlawakgo akgtum tamakamastan niku mastakan takaknin. 13 Akxni nachipinatit kkachikin, natatanokglhatit. Lakapala kapitit, xlakata nina an wayan niku mastakan takaknin. Xlakata latamanin nina katiwayankgolh asta akxni xla nachin chu nasikulunatlawa tamakamastan. Kajwatiya chuna tlan natsukukgo wayankgo tiku kawanikanit pi kaʼankgolh. Komo lakapala napinatit, namataxtukatit». 14 Wa xlakata talakakxtukgolh kkachikin. Chu akxni xʼamakgolh kxpuitat kachikin, akxilhkgolh Samuel, pi xmima kalakgapaxtokga xlakata akxtum xʼankgolh niku mastakan takaknin.
15 Xlikgotana akxni Saúl nina xchan, Jehová xwaninit* Samuel: 16 «Chali watiya uma hora nakmalakgacha chatum chixku xalak xtiyat Benjamín. Nalaksaka xlakata xmapakgsina kachikin Israel nalitaxtu. Xla nalakgmaxtu kinkachikin kxmakankan filisteos. Xlakata kakxilhnit xtapatin kinkachikin chu xtalakgaputsitkan kilakgchinit asta unu». 17 Akxni Samuel akxilhli Saúl, Jehová wanilh: «Wa uma chixku tiku klitachuwinan “Wa tiku namapakgsi kinkachikin”».
18 Alistalh Saúl talakatsuwinilh Samuel kxʼitat xmalakcha kachikin chu kgalhskilh: «Katlawa litlan, ¿tlan xkiwani niku wi xchik chixku tiku malakawanikan?». 19 Samuel kgalhtilh Saúl: «Akit tiku akxilha tamalakawanin. Kakimpulani niku mastakan takaknin. La uku akxtum nakintawayanatit chu chali tsisa tlan napinatit. Nakwaniyan putum tuku katsiputuna.* 20 Ni kakalilakgaputsa burros nema tsankgakgolh tuxamata, xlakata katekgskaja. Nachuna, ¿tiku tapakgsini putum tuku lhuwa xtapalh anan kʼIsrael? ¿Ni mila chu putum xfamilia mintlat?». 21 Akxni kgaxmatli uma, Saúl kgalhtinalh: «Pero ¿ni xalak Benjamín akit, tlakg xaʼaktsu tribu xalak Israel? ¿Chu ni wa kifamilia tiku tlakg nitu litaxtu xliputum familias xalak xtribu Benjamín? ¿Tuku xlakata chuna kiwaniya?».
22 Alistalh Samuel lilh Saúl chu kskujni niku xwayamaka chu maxkilh tlakg xatlan laktawilh xliputum tiku anta xwilakgolh. Max puxamakaw lakchixkuwin xwilakgolh. 23 Samuel wanilh tiku xtlawa liwat: «Kalita liwa nema kmaxkin chu kwanin pi xmaki». 24 Wa xlakata xtlawana liwat limilh xatakgatsin akglhtantun* chu wililh kxlakatin Saúl. Chu Samuel wa: «Wa uma tuku xmakinikanita. Kawat xlakata xmakikanit xlakata nawaya uma kilhtamaku, xlakata akit kwa “Wi tiku kkawaninit kaminkgolh”». Wa xlakata ama kilhtamaku Saúl tawayalh Samuel. 25 Alistalh taktakgocha niku xmastakan takaknin chu ankgolh kkachikin, chu Samuel chuntiya takgalhchuwinalh Saúl kxʼakgstin chiki. 26 Lichali sokg takikgolh. Akxni kxkgakgamaja, Samuel tasanilh Saúl tiku klhtatama kxʼakgstin chiki, chu wanilh: «Katakaxti, chu kaj ni makgat akxtum naktaʼanan ktiji». Wa xlakata Saúl takaxli chu xchatiykan taxtukgolh. 27 Akxni xtaktamakgocha kxtankilhtin kachikin, Samuel wanilh Saúl: «Kawani miskujni pi kapulalh». Chu kskujni pulalh. Samuel wampa: «Pero wix katamakgxtakgti unu, xlakata nakmaxkiyan akgtum xtamakatsin* Dios».