Xlimaktum Samuel

11 Chu Nahás tiku ammonita xwanit katatalakakxtulh ksoldados xlakata namakgstiliwili chu natalatlawa kachikin Jabés, anta kʼGalaad. Putum lakchixkuwin xalak Jabés wanikgolh Nahás: «Kakilatatlawaw akgtum talakkaxlan chu nakkaskujnaniyan». 2 Nahás tiku ammonita xwanit kgalhtinalh: «Nakkatatlawayan akgtum talakkaxlan, pero wi tuku nakkaskiniyan: mimputumkan nakkatamakxtuniyan milakgastapukan xalak mimpakgastakatkan. Chuna nakmamaxani putum Israel». 3 Lakgkgolotsin xalak Jabés wanikgolh: «Kakinkamaxki akgtujun kilhtamaku xlakata nakkamalakgachayaw makatsininanin xliputum xtiyat Israel. Chu komo niti namin kinkalakgmaxtuyan, naktamakamastayaw». 4 Akxni makatsininanin chankgolh kʼGuibeá niku xlama Saúl kamakatsinikgolh uma putum tiku xalak kachikin chu xputumkan pixlanka tsukukgolh tasakgo.

5 Saúl xkitaspitma kkapukuxtun, xkapulalimima xʼanimales. Chu kgalhskininalh: «¿Tuku akgspulama kachikin? ¿Tuku xlakata xputumkan tasamakgolh?». Wa xlakata litachuwinanka tuku xwankgonit lakchixkuwin xalak Jabés. 6 Akxni Saúl kgaxmatli, xʼespíritu Dios maxkilh litliwakga chu xla lu sitsilh. 7 Kachipalh tantiy toro, laktsu laktsu katlawalh chu tlawalh pi makatsininanin xlinkgolh kgalhatunu xliwa toro kxliputum xtiyat Israel, chu xlakan xwantilhakgo: «¡Wa uma tuku nakaʼakgspula xwakax chu xtoros tiku ni nastalani Saúl chu Samuel!». Akxni kgaxmatkgolh uma, putum israelitas lu tsukukgolh pekuanikgo Jehová, akxtum lakkaxlakgolh chu taxtukgolh xlakata naʼankgo tlawakgo guerra. 8 Alistalh Saúl kaputlekgelh anta kBézec: xwilakgolh akgtutu ciento mil israelitas chu puxamakaw mil lakchixkuwin xalak Judá. 9 Chu kawanikgolh makatsininanin tiku xminkgonit: «Wa uma tuku kakawanitit lakchixkuwin xalak Jabés, anta kʼGalaad: “Chali, akxni tastunumaja,* nakalakgmaxtukanatit”». Wa xlakata makatsininanin ankgolh chu kawanikgolh uma lakchixkuwin xalak Jabés, chu xlakan lu paxuwakgolh. 10 Alistalh lakchixkuwin xalak Jabés kawanikgolh ammonitas: «Chali naktamakamastayaw chu tlan nakilatlawaniyaw tuku tlan akxilhatit».

11 Lichali Saúl pulaktutu la kamapitsilh ksoldados. Akxni nina kxkgakga,* tanukgolh asta kxpuitat niku xwilakgolh ammonitas chu kamakgnitilhakgolh asta akxni xtastunumaja. Ammonitas lu taʼakgawanikgolh wa xlakata tiku lakgtaxtukgolh xʼakstukan tsalakgolh. 12 Chu latamanin wanikgolh Samuel: «¿Tiku ni xlakaskinkgo pi Saúl kimapakgsinakan xlitaxtulh? Kakamakamastatit xlakata nakamakgniyaw». 13 Pero Saúl wa: «La uku niti katimakgnika, xlakata la uku Jehová lakgmaxtunit Israel».

14 Alistalh, Samuel kawanilh kachikin: «Kaʼaw kʼGuilgal xlakata amakgtum nawamparayaw pi Saúl mapakgsina». 15 Wa xlakata putum kachikin ankgolh kʼGuilgal, chu anta kxlakatin Jehová mapakgsina limaxtuka Saúl. Alistalh makamaxkika Jehová tamakamastan xla takaksni, chu Saúl chu putum israelitas lu lipaxuwakgolh uma kilhtamaku.