Xlimaktum Samuel
13 Saúl xkgalhi [?]* kata akxni mapakgsina litaxtulh, chu akgtiy kata mapakgsinalh kʼIsrael. 2 Chu Saúl kalaksakli akgtutu mil soldados xalak Israel. Akgtiy mil xtawilakgolh Saúl anta kMicmash kxkasipijni Betel, chu akgtum mil xtawilakgolh Jonatán anta kʼGuibeá kxtiyat Benjamín. Chu amakgapitsin soldados kawanilh pi xtaspitparakgolh kxchikkan.* 3 Alistalh Jonatán kamakgatlajalh akgtum grupo xla soldados filisteos nema xwilakgolh kʼGueba, chu filisteos kgaxmatkgolh tuku xlanit. Chu Saúl tlawalh pi xmatasika akgalokgot kxlilakgatum kachikin chu xwanka: «¡Uma kakgaxmatkgolh hebreos!». 4 Chu putum israelitas kgaxmatkgolh uma tamakatsinin: «Saúl kamakgatlajalh akgtum grupo xla soldados filisteos, chu la uku filisteos ni kaʼakxilhputunkgo israelitas». Wa xlakata kamamakxtumika lakchixkuwin xlakata akxtum xtalakgolh Saúl kʼGuilgal.
5 Filisteos na tamakxtumikgolh xlakata nakatalatlawakgo israelitas. Xkgalhikgo puxamakaw mil putlaw nema xlitlawakgo guerra, akgchaxan mil tiku xkgetawilakgo kawayu chu lhuwa soldados chuna la xlilhuwa muntsaya nema anan kxkilhtun pupunu. Talakakxtukgolh kMicmash, kxʼeste Bet-Aven, chu anta tawilakgolh. 6 Chu lakchixkuwin xalak Israel lu tuwa tuku xtitaxtumakgolh xlakata xtalamakgasitsinkan. Wa xlakata tatsekgkgolh klaklanka lhuku, niku xtaskganit tiyat, klaklanka chiwix, klhuku kxtampin tiyat chu niku xmastokgkgo xchuchutkan. 7 Makgapitsi hebreos asta patakutkgolh kgalhtuchokgo Jordán chu ankgolh kxtiyat Gad chu Galaad. Pero Saúl chuntiya tamakgxtakgli kʼGuilgal, chu putum tiku tatamakgxtakgkgolh lu xpekuamakgo. 8 Kgalhkgalhilh akgtujun kilhtamaku asta akxni takgatsilh chuna la Samuel xlaklhkawilinit. Pero Samuel ni xchama kʼGuilgal chu ksoldados xmakgxtakgmakgolh. 9 Alistalh, Saúl wa: «Kakilaliminiw animales xlakata xalhkun tamakamastan chu tamakamastan xla takaksni». Chu tsukulh masta xalhkun tamakamastan.
10 Pero akxni makamastakgolh xalhkun tamakamastan, Samuel chalh. Chu Saúl alh tatanokglha xlakata namakgamakglhtinan.* 11 Samuel wanilh: «¿Tuku xlakata chuna tlawanita?». Saúl kgalhtilh: «Xlakata kakxilhli pi lakchixkuwin xkiʼakgxtakgmakgamakgo, chu wix ni xchitampat kilhtamaku chuna la xkiwaninita, chu filisteos tamakxtumimakgolh kMicmash. 12 Chu klakpuwa: “Filisteos nataktakgo kʼGuilgal xlakata nakintalatlawakgo chu akit ni kputsanit xtamakgtay Jehová”. Wa xlakata kmakgkatsilh pi kilimakamastat xwanit xalhkun tamakamastan».
13 Samuel wanilh Saúl: «Lu nitlan tuku tlawanita. Ni kgalhakgaxpatnita limapakgsin nema maxkin Jehová miDios. Komo xkgalhakgaxpatti, Jehová xtlawalh pi xmapakgsinanti kʼIsrael putum kilhtamaku. 14 Pero la uku mintamapakgsin ni katimakgapalalh. Jehová natekgsa chatum chixku tiku namakgapaxuwa xnaku. Chu Jehová xpuxku nalimaxtu xkachikin, xlakata wix ni tlawa tuku Jehová limapakgsin».
15 Alistalh Samuel taxtucha kʼGuilgal chu talakakxtulh kʼGuibeá kxtiyat Benjamín. Chu Saúl kaputlekgelh ksoldados; max akgchaxan ciento tiku xtatamakgxtakgkgonit. 16 Saúl, Jonatán chu ksoldados tiku xkatalamakgolhku tamakgxtakgkgolh kʼGueba kxtiyat Benjamín. Pero filisteos xwilakgolhku kMicmash. 17 Chu akgtutu grupos xla soldados taxtukgolh niku xwilakgolh filisteos. Akgtum grupo alh kxtiji Ofrá, niku xlakankan xtiyat Sual, 18 atanu grupo alh ktiji xla Bet-Horón, chu xliʼakgtutu grupo alh ktiji nema an niku kitapakgta xtiyat Benjamín lata anta niku tasiyayacha xakaxtum Zeboím, nema lakankan kxakaskakni tiyat.
19 Pero kxlilakgatum xtiyat Israel ni xʼanan chatum tiku xliskuja likan, xlakata filisteos xwankgonit: «Ni kakamaxkiw talakaskin hebreos natlawakgo nipara kgantum espada chu nipara kgantum lanza». 20 Chu putum israelitas xliʼanatkan xwanit niku xwilakgolh filisteos xlakata xkaxakanika* xlikankan nema xlilakgwaxnanankgo, xpicoskan, xʼhachaskan, chu tuku xlimakikgo xtachanankan. 21 Xlixokgotkan xwanit max akgtsayan gramos xla plata* xlakata xkaxakanika xlikankan nema xlilakgwaxnanankgo, xpicoskan, xliskujnikan nema kgantutu likan xkgalhi chu xʼhachaskan chu nachuna xkiwikan nema xkgalhi xakinkasajaja* likan. 22 Chu akxni xʼamakgo talatlawanankgo, soldados tiku xtaʼankgonit Saúl chu Jonatán ni xkgalhikgo nipara kgantum espada chu nipara kgantum lanza. Kajwatiya Saúl chu xkgawasa Jonatán xkgalhikgo tuku xlitalatlawanankgo.
23 Chu akgtum grupo xla soldados filisteos xʼankgonit kuentajtlawakgo tiji nema xtitaxtu kxakaxtum Micmash.