Xlimaktum Samuel
3 Akxni chuna xlama, aktsu Samuel kskujnani Jehová chu Elí wa tiku xkuentajtlawa. Amacha kilhtamaku Jehová ni lu xkatachuwinan latamanin nipara wi tu xkamaʼakxilhni.
2 Akgtum kilhtamaku, Elí xma niku ankgalhin xtama (nialh lu liwana xlakawanan). 3 Limakgskgo nema xwi kxchik Dios nina xmamixikan, chu Samuel xma kxtemplo* Jehová, niku xwi Arca nema xtapakgsini Dios. 4 Alistalh Jehová tachuwinalh Samuel, chu Samuel kgalhtinalh: «Unu kwi». 5 Chu lakapala alh niku xwi Elí chu wanilh: «Malana, kintasani, unu kwi». Pero xla kgalhtilh: «Ni, nitu ktasaniman. Kakitapapara». Wa xlakata Samuel ampa tama. 6 Jehová amakgtum tachuwinampa: «¡Samuel!». Wa xlakata Samuel takilh chu alh niku xwi Elí chu wanilh: «Malana, kintasani, unu kwi». Pero xla kgalhtilh: «Ni, kinkgawasa, nitu ktasaniman. Kakitapapara». 7 (Samuel nina xlakgapasa Jehová chu nina xmakglhtinanit akgtum tamakatsinin* xpalakata Jehová). 8 Chu Jehová xlimakgtutu tachuwinampa: «¡Samuel!». Alistalh Samuel takilh chu alh niku xwi Elí chu wanilh: «Kintasani, unu kwi».
Anta Elí katsilh pi wa Jehová tiku kxakgatlima aktsu kgawasa. 9 Wa xlakata Elí wanilh Samuel: «Kakitapapara, komo natachuwinamparayan nawaniya “Kakiwani, Jehová, miskujni kgaxmatma”». Samuel ampa tama.
10 Alistalh Jehová tachuwinampa, chu chuna la xtlawanita, tasanipa: «¡Samuel, Samuel!». Chu Samuel kgalhtinalh: «Kakiwani, miskujni kgaxmatma». 11 Chu Jehová wanilh Samuel: «Kaʼakxilhti, kama tlawa kʼIsrael tuku namakgapekuan putum tiku nakgaxmata. 12 Ama kilhtamaku nakmakgantaxti putum tuku klichuwinanit xpalakata Elí chu xfamilia,* lata xkilhtsukut chu xlisputni. 13 Kawani pi putum kilhtamaku kama malakgaxokge xfamilia xlakata talakgalhin nema xla katsiya: pi xkamanan tlawamakgolh tuku nitlan chu nitlan lichuwinamakgo Dios kxlakatin, pero xla ni kastakyawanit. 14 Wa xlakata kmalaknuninit xfamilia Elí pi nipara tamakamastan nipara tamaskiwin* tlan naxapakgo xtalakgalhin xfamilia Elí».
15 Samuel chuntiya tamalh asta akxni xkgakgalh. Alistalh malakkilh xmalakcha xchik Jehová. Ni xlitachuwinamputun Elí tuku xmaʼakxilhnikanit xlakata xpekuan. 16 Pero Elí tasanilh Samuel chu wanilh: «¡Kinkgawasa, Samuel!». Xla kgalhtinalh: «Unu kwi». 17 Chu Elí kgalhskilh: «¿Tuku wanin? Katlawa litlan ni kakimatsekgni. Dios lu kamalakgaxokgen komo ni nakiwanikgoya putum tuku wanin». 18 Wa xlakata Samuel putum wanilh; nitu matsekgnilh. Elí wanilh: «Wa Jehová, katlawalh tuku xla tlan akxilha».
19 Samuel chuntiya stakli, chu Jehová xmakgtayama chu xmakgantaxti putum xtachuwin. 20 Putum Israel, lata kDan asta kBeer-Seba, akgatekgskgolh pi Samuel xlaksakkanit la xpalakachuwina Jehová. 21 Chu Jehová chuntiya tasiyalh kSiló, xlakata Jehová makatsinilh xtamakatsin anta kSiló, uma chuna lalh akxni Jehová makatsinilh xtachuwin.